ახალი ამბები

ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა მერაბ ხალვაშმა და საქართველოს იუსტიციის მინისტრმა თეა წულუკიანმა თანამშრომლობის მემორანდუმს მოაწერენ ხელი. ხელშეკრულების მიზანია უმაღლესი საგანმანათლებლო დაწესებულების სამართლმცოდნეობის მიმართულების საგანმანათლებლო პროგრამის სტუდენტთა პროფესიული მომზადების ხელშეწყობა, სამეცნიერო-საგანმანათლებლო მეთოდური სიახლეების დანერგვა, საჯარო ლექციების ჩატარება და სხვადასხვა სახის კვლევითი და სამეცნიერო პროექტების ერთობლივი განხორციელება. მემორანდუმის ფარგლებში იურიდიული ფაკულტეტის სტუდენტები პრაქტიკასა და სტაჟირებას გაივლიან პარტნიორი დაწესებულების შესაბამის სტრუქტურულ ერთეულებში.

ბათუმის შოთა რუსთაველის სახელმწიფო უნივერსიტეტის ემერიტუს-პროფესორის, სამხრეთ-დასავლეთ საქართველოს სამეცნიერო-კვლევითი ცენტრის უფროსი მეცნიერ-თანამშრომლისა და ღვაწლმოსილი პროფესორის მერი ცინცაძის 85 წლისადმი მიძღვნილი საიუბილეო სხდომა გაიმართა შოთა რუსთაველის დარბაზში. მკვლევარს იუბილე მიულოცეს, წარმატებები უსურვეს და მის ღვაწლზე ისაუბრეს უნივერსიტეტის რექტორის მოვალეობის შემსრულებელმა მერაბ ხალვაშმა, პროფესორ-მასწავლებლებმა და სტუდენტებმა. პროფესორ მერი ცინცაძეს მნიშვნელოვანი წვლილი მიუძღვნის ენათმეცნიერების განვითრებაში, გამოქვეყნებული აქვს ათეულობით სამეცნიერო ნაშრომი და მონოგრაფიები, ეწევა სარედაქციო საქმიანობას. ცნობილ მეცნიერს წილად ხვდა ქართველ მკვლევართა შორის პირველად ესაუბრა კლარჯული კილოს შესახებ, სამეცნიერო მიმოქცევაში შემოეტანა ქართული ენათმეცნიერებისათვის უცხო დიალექტის მასალები.

ბათუმის შოთა რუსთაველის სახელმწიფო უნივერსიტეტს ქვემო სილეზიის სავიევოდოს დელეგაცია ეწვია. ვროცლავის ფიზიკური აღზრდის საუნივერსიტეტო სკოლის ტურიზმის კათედრის ხელმძღვანელი პიოტრ ოლესნიევჩი, ვროცლავის უმაღლეს საბანკო სკოლის კანცლერი მარეკ ნატალი, ვიცე-კანცლერი ბარბარა სცეპანიკი და მცირე საექსპერიმენტო-საპროდუქციო კომპანიის წარმომდგენელი ივან მაკრავი უნივერსიტეტის რექტორის მოვალეობის შემსრულებელს მერაბ ხალვაშს, რექტორის მოადგილეებსა და ფაკულტეტების დეკანებს შეხვდნენ. პოლონეთის უმაღლესი საგანმანათლებლო დაწესებულებების წარმომადგენლები ბსუ-ს სასწავლო პროგრამებს გაეცნენ და თანამშრომლობის პირობებზე შეთანხმდნენ. მხარეებმა მემორანდუმს ხელი სასტუმრო „ჰილტონ ბათუმში“ გამართული შეხვედრის შემდეგ მოაწერეს. დოკუმენტი მიზნად ისახავს ერთობლივ საგანმანათლებლო პროგრამებთან ერთად, სამეცნიერო პროექტების განხორციელებასა და გაცვლითი პროგრამების ამოქმედებას.

კომპანია „ჯეოსელის“ საგანმანათლებლო-შემეცნებითი პროექტის „ჯეოსელ-ჰაბი ბათუმში“ პრეზენტაცია ჩატარდა ბათუმის შოთა რუსთაველის სახელმწიფო უნივერსიტეტში. დუტა სხირტლაძემ კომპანიის სხვა წარმომადგენლებთან და ექსპერტებთან ერთად სხვადასხვა ფაკულტეტის სტუდენტებს თანამედროვე ტექნოლოგიური მიღწევები, განვითარების ტენდენციები და მათი ეფექტიანად გამოყენების შესაძლებლობები წარუდგინეს. მათ ასევე ისაუბრეს ახალი თაობის ტელეკომზე, სმარტფონსა და მობილურნტერნეტზე, ინტერნეტსა და სოციალურ მედიაზე.

სტუდენტთა საინიციატივო ჯგუფის ორგანიზებით ბათუმის შოთა რუსთაველის სახელმწიფო უნივერსიტეტის სააქტო დარბაზში საქველმოქმედო კონცერტი გაიმართა. თბილისის ივანე ჯავახიშვილის სახელობის სახელმწიფო უნივერსიტეტის პოლიტიკურ-მეცნიერებათა ფაკულტეტის მეორე კურსის სტუდენტის ლუკა დავიანტის დასახმარებლად მსახიობ დუტა სხირტლაძის, ახალგაზრდა მომღერლებისა და პოეტების: ნიკო ბერიძის,გიორგი ნაკაშიძის, გრიგოლ ტვილდიანის, გიორგი კიკნაძის, სალომე ბეთლემელის, ხათუნა ათაბაძის, როინ აბუსელიძის, გურამ ღონღაძის, მარიამ კოიძის, დაჩი მეჯიდის, თეონა დეკანაძისა და ჯგუფ „ბაბილონის“ მონაწილეობით საღამო ჩატარდა. ღონისძიებიდან შემოსული თანხა სიმსივნით დაავადებული ახალგაზრდის მკურნალობას მოხმარდება.