სამხრეთ-დასავლეთ საქართველოს ოსმალთაგან განთავისუფლების ბრძოლის წინამძღოლის სელიმ ხიმშიაშვილის ტრაგიკული აღსასრულიდან 200 წლისთავი ბათუმის შოთა რუსთაველის სახელმწიფო უნივერსიტეტში კვირეულით აღინიშნება. 21-ე აუდიტორიას სელიმ ხიმშიაშვილის სახელი მიენიჭა და საზეიმოდ გაიხსნა, დაწესდა სელიმ ხიმშიაშვილის სახელობის სტიპენდია, შედგა საიუბილეო წიგნებისა და ფოტოების გამოფენა და ჩატარდა სტუდენტთა სამეცნიერო კონფერენცია.
ბათუმის შოთა რუსთაველის სახელმწიფო უნივერსიტეტის 80 წლის იუბილეს მიეძღვნა ჰუმანიტარულ მეცნიერებათა ფაკულტეტის დოქტორანტთა II სამეცნიერო კონფერენცია. ტრადიციული სამეცნიერო სესია 4 სექციაში მუშაობდა და მასში 50-მდე დოქტორანტი მონაწილეობდა. მომხსენებლებმა თემები ლიტერატურათმცოდნეობის, ფოლკლორის, პუბლიცისტიკის, ლინგვისტიკის, ისტორიის, ეთნოგრაფიისა და არქეოლოგიის მიმართულებით წარმოადგინეს.
ბათუმის შოთა რუსთაველის სახელმწიფო უნივერსიტეტის თეატრალურმა დასმა პარიზში ფრანგულ-ქართული კულტურის დღეების ღონისძიებაში მიიღო მონაწილეობა. უნივერსიტეტის სტუდენტები ფრანგი მაყურებლის წინაშე კომედიური ჟანრის სპექტაკლით - ,,ნაფტალინი“ წარსდგნენ. სპექტაკლი ლაშა ბუღაძის პიესის მიხედვით რეჟისორებმა: როინ დვალმა და გიორგი ფირცხალაიშვილმა დადგეს. პრემიერამ უცხოეთში წარმატებით ჩაიარა და ფრანგული პრესის დადებითი შეფასება დაიმსახურა.
ჰუმანიტარულ მეცნიერებათა ფაკულტეტის თურქული ფილოლოგიისა და თურქეთის მცოდნეობის სტუდენტებმა თეატრალიზებული წარმოდგენა გამართეს თემაზე: „ოჯახი“. 2014-2015 სასწავლო წლის შემაჯამებელ ღონისძიებაზე ახალგაზრდებმა ქართული და თურქული ოჯახების ტრადიციები წარმოადგინეს და მათ მნიშვნელობაზე ისაუბრეს. თურქეთის გენერალურმა კონსულმა ბათუმში იასინ თემიზ ქანიმ წარმოდგენის მონაწილეები სერტიფიკატებითა და კაპადოკიის ხუთდღიანი ტურით დააჯილდოვა.
უნივერსიტეტის 80 წლის იუბილესადმი მიძღვნილი პირველობა დაიწყო სტუდენტებისა და პროფესორ-მასწავლებლების მონაწილეობით სპორტის სხვადასხვა სახეობაში. საუკეთესო მონაწილეები გამოვლინდნენ დარტსში, გირების აჭიმვასა და ძალოსნობაში. დარტსში ქალთა შორის განათლების ფაკულტეტის ასისტენტ პროფესორმა დარეჯან გელაძემ გაიმარჯვა, ხოლო მამაკაცებს შორის - ბსუ-ს ადამიანური რესურსებს მართვის სამსახურის მთავარმა სპეციალისტმა კობა ჭანტურიამ. გირების აჭიმვაში გოგონათა შორის I ადგილი დაიკავა ინგლისური ფილოლოგიის III კურსის სტუდენტმა ანანო დვალიშვილმა, ვაჟებს შორის - სპორტის სპეციალობის IV კურსის სტუდენტმა მამუკა ჯორბენაძემ. ძალოსნობის გამარჯვებული სამართალმცოდნეობის სპეციალობის II კურსის სტუდენტი ზაზა ანანიძეა.
