ახალი ამბები

ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა საქართველოს თავდაცვის სამინისტროში გამართულ შეხვედრაში მიიღო მონაწილეობა. საქართველოს თავდაცვის მინისტრმა თინათინ ხიდაშელმა, მინისტრის მოადგილეებმა: დავით ებრალიძემ, ანა დოლიძემ და ბესიკ ლოლაძემ შეხვედრაზე უნივერსიტეტების რექტორებთან უმაღლეს საგანმანათლებლო დაწესებულებებთან სამომავლო თანამშრომლობის მიმართულებებზე ისაუბრეს. დაიგეგმა თავდაცვის აკადემიასთან ერთად ახალი სამაგისტრო პროგრამის მომზადება. ჯარისკაცები უნივერსიტეტში სხვადასხვა სახის კურსებს გაივლიან, ხოლო სამხედრო ნაწილებში საჯარო ლექციები და სემინარები ჩაუტარდებათ.

ცნობილ მეცნიერს, აღმოსავლეთმცოდნეს, ბსუ-ს კურსდამთავრებულს, მოსკოვის ლომონოსოვის სახელობის სახელმწიფო უნივერსიტეტის პროფესორ ფერიდე აცამბას ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საპატიო დოქტორის წოდება მიანიჭა და რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა შოთა რუსთაველის სახელობის მედალი გადასცა. პროფესორმა ფერიდე აცამბამ მნიშვნელოვანი წვლილი შეიტანა ბსუ-ს განვითარებაში, მას უმაღლეს საგანმანათლებლო დაწესებულებასთან ხანგრძლივი სამეცნიერო და პედაგოგიური ურთიერთობა აკავშირებს, უწევს მეცნიერულ, მეთოდურ და პროფესიულ დახმარებას. ღვაწლმოსილ პროფესორს გამოქვეყნებული აქვს 2 მონოგრაფია და 60-ზე მეტი სამეცნიერო სტატია არაბეთის ქვეყნების სოციალური სტრუქტურის პრობლემებისა და ისლამის რელიგიური ინსტიტუტების ფუნქციონირების საკითხებზე.

ირანის ისლამური რესპუბლიკის გენერალური კონსული ბათუმში ჰოსეინ მაშჰადი ბათუმის შოთა რუსთაველის სახელმწიფო უნივერსიტეტს ეწვია. რექტორის მოვალეობის შემსრულებელთან, ასოცირებულ პროფესორ მერაბ ხალვაშთან გამართულ გაცნობითი ხასიათის შეხვედრაზე დიპლომატიური კორპუსის წარმომადგენელმა ორი ქვეყნის საგანმანათლებლო-სამეცნიერო და კულტურულ ურთიერთობებზე ისაუბრა. მხარეები შეთანხმდნენ ერთობლივი სასწავლო-სამეცნიერო პროექტების განხორციელებაზე. დაიგეგმა ბსუ-ს ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტში სპარსული ენის სპეციალისტის მოწვევა, თავრიზის უნივერსიტეტთან თანამშრომლობის დამყარება და ფიტოპათოლოგიისა და ბიომრავალფეროვნების ინსტიტუტთან ერთად კვლევების წარმოება. ასევე ამოქმედდება გაცვლითი პროგრამები ჰუმანიტარული, საინჟინრო, ჯანდაცვისა და ტურიზმის მიმართულების სტუდენტებისათვის.

ილიას სახელმწიფო უნივერსიტეტის ტექნოლოგიების კომერციალიზაციის ოფისის ორგანიზებით ბათუმის შოთა რუსთაველის სახელმწიფო უნივერსიტეტში ტრენინგების ციკლი დაიწყო თემაზე: „ინოვაციების მენეჯმენტი და თანამედროვე ტექნოლოგიური ტენდენციები“. სამი დღის განმავლობაში უმაღლესი საგანმანათლებლო დაწესებულების პროფესორ-მასწავლებლები, მკვლევრები და დოქტორანტები ისეთ აქტუალურ საკითხებს გაეცნობიან, როგორიცაა: „ინოვაციების მენეჯმენტი და თანამედროვე ტექნოლოგიური ტენდენციები“, „ინოვაციური მეწარმეობა“ და „ინტელექტუალი საკუთრება და მისი დაცვის ღონისძიებები“.

საქართველოს მათემატიკოსთა კავშირის VI საერთაშორისო კონფერენცია გაიხსნა ბათუმის შოთა რუსთაველის სახელმწიფო უნივერსიტეტში. ხუთი დღის განმავლობაში 100-მდე ქართველი და უცხოელი პროფესორ-მასწავლებელი მოხსენებებს წარმოადგენს თანამედროვე მათემატიკის აქტუალურ საკითხებსა და ბოლო პერიოდში წარმოებული სამეცნიერო კვლევის შედეგებზე. სესია თერთმეტ სექციად იმუშავებს და შემდეგ მიმართულებებს მოიცავს: ალგებრა, ტოპოლოგია, გეომეტრია და რიცხვთა თეორია, გამოყენებითი ლოგიკა და პროგრამირება, დიფერენციალური განტოლებები და მათი გამოყენებები, ბუნებრივი ენების ლოგიკა და გამოთვლითი ლინგვისტიკა, მათემატიკური განათლება და ისტორია, მათემატიკური მოდელირება