ახალი ამბები

ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა 1989 წლის 9 აპრილს მთავრობის სასახლესთან საქართველოს დამოუკიდებლობისათვის დაღუპული გმირები გაიხსენეს. სტუდენტთა კონფერენციაზე ახალგაზრდებმა 26 წლის წინ განვითარებულ მოვლენებზე მოხსენებები წარმოადგინეს და ისტორიული დღის მნიშვნელობაზე იმსჯელეს. სესიის დასრულების შემდეგ უნივერსიტეტის ფოიეში ტრაგიკული მოვლენების ამსახველი ფოტოქრონიკის ჩვენება შედგა. სტუდენტებმა და პროფესორ-მასწავლებლებმა კიდევ ერთხელ პატივი მიაგეს 9 აპრილის ღამეს დაღუპულ მამულიშვილებს, მათი ხსოვნის უკვდავსაყოფად სანთლები დაანთეს, ზღვისპირა პარკში მემორიალი ტიტებითა და გვირგვინით შეამკეს.

სასტუმრო ,,DIVAN ბათუმის“ გენერალური მენეჯერი ბულენთ ავქუთ სუზერი ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებს შეხვდა. სასტუმროს გენერალურმა მენეჯერმა ახალგაზრდებს საერთაშორისო ბრენდი ,,,DIVAN ბათუმი“ წარუდგინა და ტურიზმის ფაკულტეტთან პარტნიორობის სტრატეგიის მნიშვნელობასთან ერთად დასაქმების შესაძლებლობებზე ესაუბრა. ივლისში 10 სტუდენტი ბოდრუმში სასტუმრო „DIVAN“-ის ქსელში ორთვიან პრაქტიკას გაივლის და ანაზღაურებას მიიღებს 500 აშშ დოლარის ოდენობით. დღემდე თანამშრომლობის ფარგლებში სხვადასხვა საერთაშორისო ბრენდის კომპანიებში ტურიზმის ფაკულტეტის 200-მდე სტუდენტია დასაქმებული. სასტუმრო ,,DIVAN“ ბათუმი მეოთხე საერთაშორისო ბრენდია, რომელთანაც ბსუ-ს ტურიზმის ფაკულტეტი აქტიურად თანამშრომლობს.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ორგანიზებით პროექტის - „უნივერსიტეტი-სკოლას“ ფარგლებში აბიტურიენტებისათვის ზოგად უნარებში იმიტირებული გამოცდა ჩატარდა. ღონისძიებაში მონაწილეობა მიიღო ბათუმის 20-მდე საჯარო და კერძო სკოლის, ასევე ფერიის, ქობულეთის, მახინჯაურის, ხელვაჩაურის, ორთაბათუმის, კირნათისა და ხულოს დამამთავრებელი კლასების 250-მა აბიტურიენტმა. იმიტირებული გამოცდა ფილოსოფიის დეპარტამენტის ასოცირებულმა პროფესორმა ლალი ანთიძემ და ფილოსოფიის სტუდენტბმა ჩაატარეს.

ბათუმის შოთა რუსთაველის სახელმწიფო უნივერსიტეტში რექტორის მოვალეობის შემსრულებლის არჩევნები გაიმართა. აკადემიური ხარისხის მქონე აკადემიური და სამეცნიერო პერსონალის უმრავლესობამ ხუთ კანდიდატს შორის მხარი ასოცირებულ პროფესორ მერაბ ხალვაშს დაუჭირა. არჩევნებში 312 ამომრჩევლიდან მონაწილეობა 299-მა მიიღო. უმაღლესი საგანმანათლებლო დაწესებულების საარჩევნო კომისიის კენჭისყრის ოქმის საფუძველზე ხმები შემდეგნაირად გადანაწილდა: ასოცირებული პროფესორი მერაბ ხალვაში - 107 ხმა, ასოცირებული პროფესორი ირაკლი ბარამიძე - 80 ხმა, რამაზ ხალვაში - 60 ხმა, ვლადიმერ ბალაძე - 36 ხმა, ასოცირებული პროფესორი მალხაზ ნაკაშიძე - 9 ხმა, ხოლო 7 ხმა ბათილად ჩაითვალა.

საქართველოს განათლებისა და მეცნიერების მინისტრმა თამარ სანიკიძემ, ათასწლეულის გამოწვევის ფონდის აღმასრულებელმა დირექტორმა მაგდა მაღრაძემ, აჭარის განათლების, კულტურისა და სპორტის მინისტრმა გიორგი თავამაიშვილმა და აშშ-ის სან დიეგოს სახელმწიფო უნივერსიტეტის (SDSU) საქართველოს დეკანმა კენ უოლშმა ბათუმის შოთა რუსთაველის სახელმწიფო უნივერსიტეტში პროექტ „სან დიეგოს სახელმწიფო უნივერსიტეტი და საქართველო 2020“ წარდგინება გამართეს. 30-მილიონიან პროექტს 2014 წლიდან ათასწლეულს გამოწვევის ფონდი საქართველოსა და ამერიკის ათასწლეულის გამოწვევის კორპორაციის (MCC) ფარგლებში ახორციელებს და მიზნად ისახავს ამერიკული საბაკალავრო პროგრამების ამოქმედებას. სან დიეგოს სახელმწიფო უნივერსიტეტი 2015-2016 სასწავლო წლიდან მსურველებს საგანმანათლებლო პროგრამებს სთავაზობს ქიმიის, ბიოლოგიის, ელექტრონული ინჟინერიის, კომპიუტერული ინჟინერიის, ხოლო მომავალი სასწავლო წლიდან კომპიუტერული მეცნიერების, სამრეწველო და სამოქალაქო მშენებლობის მიმართულებით.