ახალი ამბები

ორგანიზაცია „ქიბათექის“ ორგანიზებით ბათუმის შოთა რუსთაველის სახელმწიფო უნივერსიტეტს თურქი მწერლები და პოეტები ეწვივნენ. სააქტო დარბაზში გამართულ შეხვედრაზე სტუმრებმა პროფესორ-მასწავლებლებს, სტუდენტებს, აჭარის მწერალთა კავშირის წევრებს, საზოგადოების წარმომადგენლებს საკუთარი შემოქმედება გააცნეს და საქართველო-თურქეთის მეზობლურ ურთიერთობებზე ისაუბრეს. ღონისძიების დასასრულს, ჰუმანიტარულ მეცნიერებათა ფაკულტეტის თურქული ფილოლოგიის საგანმანათლებლო პროგრამის სტუდენტებმა თურქულ ენაზე ლექსები წაიკითხეს.

ბათუმის შოთა რუსთველის სახელმწიფო უნივერსიტეტს ალკალას უნივერსიტეტის წარმომადგენელი საქართველოში, ესპანურ-ქართული კულტურული ასოციაცია „იბერიის“ პრეზიდენტი, ესპანურ-ქართული სავაჭრო პალატის გენერალური მდივანი ქეთევან გორგილაძე ეწვია. რექტორის მოვალეობის შემსრულებელ, ასოცირებულ პროფესორ მერაბ ხალვაშთან გამართულ შეხვედრაზე მხარეებმა თანამშრომლობის პერსპექტივები და პრიორიტეტები განსაზღვრეს. მემორანდუმის ფარგლებში ბსუ-ს 3 სტუდენტი ალკალას უნივერსიტეტში ერთი სემესტრის განმავლობაში ისწავლის.

ბათუმის შოთა რუსთაველის სახელმწიფო უნივერსიტეტში ტემპუსის პროექტის -„უნივერსიტეტისმართვის ინტეგრირებული სისტემა: ევროგაერთიანების გამოცდილების გაზიარება“ ფარგლებში „მართვის თანამედროვე მეთოდების პროგრამული უზრუნველყოფის ცენტრი“ გაიხსნა. ცენტრში კომპიუტერულ მეცნიერებათა დეპარტამენტის პროფესორ-მასწავლებლები მეთოდურ დახმარებას გაუწევენ უნივერსიტეტის პერსონალს მართვის ინტეგრირებული სისტემების ეფექტურ დანერგვაში, დისტანციური სწავლებისთვის მოდულების დიზაინის შემუშავებასა და გამოყენებაში. ღონისძიების ფარგლებში უნივერსიტეტის რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა სხვადასხვა ქვეყნის უმაღლესი საგანმანათლებლო დაწესებულებისა და განათლების სამინისტროების 18-მდე წარმომადგენელს უმასპინძლა და პროექტის კოორდინატორებთან, კობლენც ლანდაუს უნივერსიტეტის (გერმანია) პროფესორ სერგეი ჩერნიშენკოსთან, ბსუ-ს ასოცირებულ პროფესორ ლელა თურმანიძესთან ერთად საკონსკულტაციო ცენტრი გახსნა.

თამარ მეფის ხსენების დღისადმი მიძღვნილი ინტელექტუალური თამაში „რა?სად? როდის?“ ჩატარდა ბათუმის შოთა რუსთაველის სახელმწიფო უნივერსიტეტში. შეჯიბრში ქალაქ ბათუმის ოცდაერთი საჯარო და კერძო სკოლის მოსწავლეები მონაწილეობდნენ. ჟიურის შეფასებით პირველი ადგილი მეთხუთმეტე საჯარო სკოლის გუნდმა „რკინის ჯვარმა“ დაიკავა, მეორე ადგილი მეათე სკოლის გუნდმა „ბალავარმა“ მოიპოვა და მესამე ადგილი სკოლა გორდას გუნდ „გორდას“და ლიცეუმ „ევრო 200-ის„ გუნდ „თამარიონს“ ერგო. ინტელექტუალური თამაშის მონაწილე ყველა ნაკრებს სერტიფიკატები გადაეცა, ხოლო ოთხ საკუთესო გუნდს სამახსოვრო საჩუქრები და ერთდღიანი ისტორიული შემეცნებითი ტური სამცხე-ჯავახეთში. ღონისძიება ბსუ-ს სტუდენტთა სამეცნიერო ცენტრის ორგანიზებითა და სტუდენტთა მხარდაჭერის და მომსახურების სამსახურის, სტუდენტური თვითმმართველობის, ბათუმის ბოტანიკური ბაღის, ბათუმის ავტოტრანსპორტის მხარდაჭერით გაიმართა.

შოთა რუსთაველის ეროვნულმა სამეცნიერო ფონდმა სახელმწიფო სამეცნიერო გრანტების კონკურსის შედეგები გამოაქვეყნა. 2014 წლის ფუნდამენტური კვლევებისათვის სახელმწიფო სამეცნიერო გრანტების, გამოყენებითი კვლევებისათვის სახელმწიფო სამეცნიერო გრანტებისა და დოქტურანტურის საგანმანათლებლო პროგრამების კონკურსში გამარჯვება მოიპოვა ბათუმის შოთა რუსთაველის სახელმწიფო უნივერსიტეტის პროფესორ-მასწავლებლების, მკვლევარებისა და დოქტორანტების ცხრა სამეცნიერო პროექტმა და სამმა სადოქტორო საგანმანათლებლო პროგრამამ.