ახალი ამბები

შოთა რუსთაველის დარბაზში „Carnegie Research Fellowship Program“-ის ფარგლებში, საერთაშორისო განათლების ამერიკული საბჭოების საქართველოს ოფისის - დასავლეთ NIS-ის და სამხრეთ კავკასიის პროგრამების მენეჯერმა ალექსეი ხარლამოვმა საინფორმაციო შეხვედრა გამართა. პროექტის წარმომადგენელმა ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს კარნეგის გაცვლით პროგრამაში მონაწილეობა შესთავაზა. პროგრამა ითვალისწინებს 4-თვიანი კვლევითი პროექტების დაფინანსებას სოციალურ და ჰუმანიტარულ მეცნიერებათა მიმართულებით. წარმატებული აპლიკანტები სტიპენდიას 2014-2015 სასწავლო წლისთვის მიიღებენ და კვლევებს აშშ-ს პრესტიჟულ სასწავლებლებში აწარმოებენ

ევროპის იურისტ სტუდენტთა ასოციაცია ბათუმში - "ELSA ბათუმის" წარდგინება გაიმართა ბათუმის შოთა რუსთაველის სახელმწიფო უნივერსიტეტში. "ELSA ბათუმის" ხელმძღვანელმა, ბსუ-ს სტუდენტმა ლევან კუტუბიძემ სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებს საერთაშორისო სტუდენტური ორგანიზაციის საქმიანობა, სტუდენტთა გაცვლითი პროგრამები, სხვადასხვა სახის პროექტები, პრიორიტეტები და პერსპექტივები გააცნო. ევროპის იურისტ სტუდენტთა ასოციაცია 42 სახელმწიფოს 300-მდე უნივერსიტეტშია წარმოდგენილი და 32 ათას სტუდენტს აერთიანებს. ამ ეტაპზე საერთაშორისო ორგანიზაციაში ბსუ-ს 40 სტუდენტია გაწევრიანებული.

საქართველოს საბჭოთა ოკუპაციის დღისადმი მიძღვნილი ღონისძიებები ბათუმის შოთა რუსთაველის სახელწმიფო უნივერსიტეტში სახელმწიფო დროშის დაშვებით დაიწყო. უმაღლესი საგანმანათლებლო დაწესებულების რექტორის მოადგილემ, ასოცირებულმა პროფესორმა ირაკლი ბარამიძემ, პროფესორ-მასწავლებლებმა და სტუდენტებმა კიდევ ერთხელ გაიხსენეს საქართველოს დამოუკიდებლობისათვის დაღუპული გმირები და წუთიერი დუმილით პატივი მიაგეს მათ ხსოვნას. სტუდენტთა სამეცნიერო ცენტრის ორგანიზებით პროფესორმა ოთარ გოგოლიშვილმა ღია ლექცია ჩაატარა თემაზე: „25 თებერვალი - საბჭოთა ოკუპაციის დღე“.

ბათუმის შოთა რუსთაველის სახელმწიფო უნივერსიტეტის რექტორის მოადგილემ, ასოცირებულმა პროფესორმა ირაკლი ბარამიძემ და OTH რეგენსბურგის უმაღლესი სასწავლებლის პროფესორმა მარტინ ენზერმა თანამშრომლობის მემორანდუმს მოაწერეს ხელი. ხელშეკრულება ითვალისწინებს უმაღლესი საგანმანათლებლო დაწესებულებების ერთობლივი კონფერენციების, ტრენინგების, სემინარების ჩატარებასა და სტუდენტთა და პროფესორ-მასწავლებელთა გაცვლითი პროგრამების განხორციელებას. მემორანდუმის ფარგლებში შემუშავდება ერთობლივი საბაკალავრო საგანმანათლებლო პროგრამა „სოციალური მუშაკი“ და სამაგისტრო საგანმანათლებლო პროგრამა „სოციალური სამსახური“.

საქართველოს კონსტიტუციის მიღების 93 წლისადმი მიძღვნილი ღონისძიებები გაიმართა ბათუმის შოთა რუსთაველის სახელმწიფო უნივერსიტეტში. საქართველოს საკონსტიტუციო სასამართლოს თავმჯდომარემ გიორგი პაპუაშვილმა სტუდენტებისათვის საქართველოს კონსტიტუციის თემაზე საჯარო ლექცია წაიკითხა. უწყების ხელმძღვანელმა ახალგაზრდებს კონსტიტუციის შექმნის ისტორია, სამართლებრივი ასპექტები, 1921 წელს განვითარებული მოვლენები გააცნო და მომავალი სამართალდამცავების აქტუალურ შეკითხვებს უპასუხა. ლექციის დასასრულს, უმაღლესი საგანმანათლებლო დაწესებულების ფოიეში ქვეყნის პირველი კონსტიტუციის მიღების ამსახველი ფოტოგამოფენა მოეწყო.