ახალი ამბები

შოთა რუსთაველის დარბაზში პრაქტიკული სემინარი ჩატარდა თემაზე: „ფერმერული მეურნეობებისა და გადამამუშავებელი ორგანიზაციების არსებული მდგომარეობა, მათი რეაბილიტაციისა და განვითარების პერსპექტივები აჭარაში“. ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის მეცნიერ-თანამშრომლებმა და აჭარის სოფლის მეურნეობის სამინისტროს წარმომადგენლებმა ფერმერული და კვების პროდუქტთა წარმოების სექტორებში მომუშავეთ დარგის სიახლეები, სამომავლო გეგმები და პროექტები გააცნეს. მომხსენებლებმა ასევე ისაუბრეს ისეთ საკითხებზე, როგორიცაა: „სასათბურე ტექნოლოგიები, მასალები და მოწყობილობები“, „მცირე სიმძლავრის გადამამუშავებელი ტექნოლოგიური ხაზები და ტექნოლოგიები“ და „ფერმერული გაერთიენებების ჩამოყალიბების მიზანშეწონილობა“. პრაქტიკული სემინარი უმაღლესი საგანმანათლებლო დაწესებულების სამეცნიერო-კვლევითი ცენტრის ორგანიზებით გაიმართა და მომავალშიც გაგრძლდება.

გერმანიის ფედერაციული რესპუბლიკის ბრანდენბურგის მიწის პარლამენტის მეცნიერების, კვლევისა და კულტურის კომისიის თავმჯდომარე იენს ლიპსდორფი, ქალაქ კოტბუსის თავისუფალ დემოკრატთა პარტიის ფრაქციის თავმჯდომარე, განათლების, სკოლების, სპორტისა და კულტურის კომისიის თავმჯდომარე სილკე ლუთერთი და თავისუფალ დემოკრატთა პარტიის წევრი მაიკე ჰოლთში ბათუმის შოთა რუსთაველის სახელმწიფო უნივერსიტეტს ეწვივნენ. უნივერსიტეტის რექტორთან, პროფესორ ალიოშა ბაკურიძესთან, აჭარის უმაღლესი საბჭოს განათლების, მეცნიერების, კულტურისა და სპორტის საკითხთა კომისიის თავმჯდომარესთან გიორგი მასალკინთან, ადმინისტრაციის ხელმძღვანელთან ედიშერ ჩავლეიშვილთან, ფაკულტეტების დეკანებთან და ადმინსტრაციის წარმომადგენლებთან გამართულ შეხვედრაზე დელეგაციის წევრებმა თანამშრომლობის მიმართულებებსა და სამომავლო გეგმებზე ისაუბრეს. მხარეებმა ყურადღება გაამახვილეს სტუდენტთა გაცვლითი პროგრამების განხორციელებაზე, პროფესორ-მასწავლებელთა კვალიფიკაციის ამაღლებაზე, გადამზადებასა და სტაჟირებაზე. იგეგმება რეგიონში ქართულ-გერმანული პროფესიული სასწავლებლის გახსნა და ენების ცენტრის დაფუძნება.

საქართველოს პარლამენტის ეროვნულ ბიბლიოთეკაში ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის ორგანიზებით „სამხრეთ–დასავლეთ საქართველოს ისტორიის ნარკვევების“ IV ტომის („აჭარა. 1921–1990 წლები“) პრეზენტაცია გაიმართა. წარდგინებაზე მკვლევრებმა წიგნის სტრუქტურაზე, მისი დაწერის ისტორიასა და ოთხტომეულის გამოცემის მნიშვნელობაზე ისაუბრეს. ნარკვევი სამეცნიერო-კვლევითი ცენტრის მეცნიერთა ჯგუფმა ოთარ თურმანიძის რედაქტორობით მოამზადა.

ბათუმის შოთა რუსთაველის სახელმწიფო უნივერსიტეტისა და ქუთაისის სახელმწიფო უნივერსიტეტის გუნდების შეხვედრა ფუტსალში ფრედ, ანგარიშით 2:2 დასრულდა. საუნივერსიტეტო ლიგის „ე“ ქვეჯგუფში მოასპარეზე უმაღლეს საგანმანათლებლო დაწესებულებებს შორის ყველაზე წარმატებული გუნდი „ბსუ“ მორიგ შეხვედრებს თბილისში 9-13 აპრილს გამართავს. პირველობა საქართველოს სპორტისა და ახალგაზრდობის საქმეთა სამინისტროს მხარდაჭერითა და საქართველოს საუნივერსიტეტო სპორტის ფედარაციის ორგანიზებით იმართება.

აჭარის უმაღლესი საბჭოს ჯანმრთელობის და სოციალურ საკითხთა კომისიის თავმჯდომარე ჯემალ ფუტკარაძე, აჭარის ჯანმრთელობის და სოციალური დაცვის მინისტრი ნუგზარ სურმანიძე და საქართველოს რესპირაციული ასოციაციის გამგეობის თავმჯდომარე ივანე ჩხაიძე ბათუმის შოთა რუსთაველის სახელმწიფო უნივერსიტეტის რექტორს, პროფესორ ალიოშა ბაკურიძეს შეხვდნენ. ვიზიტი მიზნად ისახავდა 2013 წლის 6-8 ივნისს, ბათუმში, სასტუმრო შერატონში დაგეგმილი ასთმის და ალერგიის საერთაშორისო კონგრესის საორგანიზაციო საკითხების მოგვარებას. შეხვედრაზე მხარეებმა განიხილეს კონგრესის მოსამზადებელი სამუშაოს მიმდინარეობა, კონგრესის მუშაობაში რიზეს და ტრაპზონის უნივერსიტეტის რექტორთა მონაწილეობის საკითხები და სამეცნიერო პროგრამის დეტალები. ასევე გამოითქვა რამდენიმე მოსაზრება სამეცნიერო სესიების თავმჯდომარეებთან, სოციალურ პროგრამასთან, გახსნის ცერემონიასთან, ტექნიკურ საკითხებში უნივერსიტეტის სტუდენტების მონაწილეობასთან დაკავშირებით