ახალი ამბები

ბათუმის შოთა რუსთაველის სახელმწიფო უნივერსიტეტის ბიბლიოთეკაში ევროკავშირის კუთხე გაიხსნა. პროექტი სახელწოდებით ”საქართველო ევროპაში” არასამთავრობო ორგანიზაციის ”ახალი თაობა - ახალი ინიციატივა” ორგანიზებით ხორციელდება, მისი მიზანია მოსახლეობის ინფორმირება ევროკავშირისა და ევროინტეგრაციის პროცესების შესახებ. ევროკავშირის კუთხე ბათუმის შოთა რუსთაველის სახელმწიფო უნივერსიტეტის გარდა საქართველოს პარლამენტის ეროვნულ ბიბლიოთეკაში და საქართველოს საუნივერსიტეტო ქალაქებში - თბილისში, ქუთაისში, თელავში, ფოთში და ახალციხეში გაიხსნა.

საარჩევნო სისტემების საერთაშორისო ფონდი (IFES) და ამერიკის შეერთებული შტატების საერთაშორისო განვითარების სააგნტო (USAID) ახორციელებენ პროექტს ,,ნდობის გაზრდა საარჩევნო პროცესებისადმი“. პროგრამა ითვალისწინებს საზოგადოების და განსაკუთრებით ახალგაზრდების ცნობიერების ამაღლებას გენდერულ და ქალის პოლიტიკურად გაძლიერების საკითხებზე. პროექტის ფარგლებში თბილისის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის პროფესორმა, ფსიქოლოგიის დოქტორმა ირინა ჟვანიამ საჯარო ლექცია წაიკითხა თემაზე: ,,გენდერული თანასწორობა და ქალის პოლიტიკურად გაძლიერება“.

ცნობილი მეცნიერის, ისტორიის მეცნიერებათა დოქტორის, ბათუმის შოთა რუსთაველის სახელმწიფო უნივერსიტეტის პროფესორ-ემერიტუსის სერგო დუმბაძის დაბადებიდან 75 და სამეცნიერო-პედაგოგიური მოღვაწეობის 50 წლისადმი მიძღვნილი საიუბილეო სხდომა გაიმართა. ღვაწლმოსილ პროფესორს ღირსშესანიშნავი თარიღი ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ, პროფესორ-მასწავლებლებმა, კოლეგებმა და საზოგადოების წარმომადგენლებმა მიულოცეს და მკვლევრის ცხოვრებასა და სამეცნიერო საზოგადოებრივ საქმიანობაზე ისაუბრეს. მეცნიერის კვლევის სფეროს საქართველოს უახლესი პერიოდის მნიშვნელოვანი მოვლენები და სამხრეთ-დასავლეთ საქართველოს გამოჩენილ ადამიანთა მოღვაწეობის წარმოჩენა წარმოადგენს. სერგო დუმბაძე სამხრეთ-დასავლეთ საქართველოს ისტორიის ნარკვევების ოთხტომეულის მეოთხე ტომის თანაავტორი, 500-მდე საგაზეთო წერილის, სამეცნიერო სტატიის, მოგონების, მეცნიერული რეცენზიის, 60-მდე მეცნიერული ნაშრომის და 10 მონოგრაფიის ავტორია. სერგო დუმბაძის ინიციატივით სოფელ ბაკოში სახალხო დღესასწაული ,,სელიმობა“ დაწესდა.

პოტსდამის უნივერსიტეტს ოთხდღიანი სამუშაო ვიზიტით ბათუმის შოთა რუსთაველის სახელმწიფო უნივერსიტეტის განათლებისა და მეცნიერებათა ფაკულტეტის დეკანი, ასოცირებული პროფესორი მარინა ქორიძე, სასწავლო პროცესის მართვის დეპარტამენტის უფროსი, პედაგოგიკის დოქტორი მადონა მიქელაძე და ევროპეისტიკის დეპარტამენტის ასისტენტ პროფესორი ნელი ახვლედიანი ეწვივნენ. ვიზიტი მიზნად ისახავდა ორ უმაღლეს საგანმანათლებლო დაწესებულებას შორის თანამშრომლობის გაღრმავებას, ერთობლივი სასწავლო-სამეცნიერო პროექტების დაგეგმვასა და განხორციელებას. ქართველმა და გერმანელმა კოლეგებმა შეხვედრებზე ისეთ მნიშვნელოვან საკითხებზე იმსჯელეს, როგორიცაა: პროფესორ-მასწავლებელთა და სტუდენტთა გაცვლითი პროგრამების ამოქმედება, კვლევების წარმოება განათლების მიმართულებით, პედაგოგიური პრაქტიკა ქართველი და გერმანელი პროფესორების თანახელმძღვანელობით, განათლების მიმართულების პროგრამების ექსპერტიზა და ენების ცენტრის შექმნა. პოტსდამის უნივერსიტეტის დელეგაცია ბათუმს საპასუხო ვიზიტით 2013 წელს ეწვევა.

საქართველოში ამერიკის საელჩოსა და საერთაშორისო განათლების ცენტრის ორგანიზებით ბათუმის შოთა რუსთაველის სახელმწიფო უნივერსიტეტში ამერიკული განათლების დღე აღინიშნა. საქართველოში ამერიკის საელჩოს კულტურის ატაშემ ლოლა პეტროვამ, ინგლისური ენის ექსპერტმა კარლა მორტენსინმა, საერთაშორისო განათლების ცენტრისა და დიპლომატიური კორპუსის წარმომადგენლებმა ნინო ინაიშვილმა, თეა კუჭუხიძემ, თამარ ქარჩავამ სტუდენტებს აშშ-ის მთავრობის მიერ დაფინანსებული გაცვლითი პროგრამები გააცნეს. წარდგინების დასასრულს პროგრამების „მშვიდობის კორპუსის“, „ისწავლე და ასწავლე საქართველოსთვის“ მოხალისეებისა და ამერიკული უნივერსიტეტების კურსდამთავრებულების მონაწილეობით დისკუსია გაიმართა თემაზე: „სტუდენტური ცხოვრება ამერიკაში“.