ახალი ამბები

აჭარის ავტონომიური რესპუბლიკის განათლების, კულტურისა და სპორტის სამინისტრო ახორციელებს სტუდენტური დახმარების ახალ მიზნობრივი პროგრამის მეორე ეტაპს 2012 წელს ერთიანი ეროვნული გამოცდების შედეგად ჩარიცხული სტუდენტებისათვის.პროგრამის ფარგლებში 2012 წელს უმაღლეს საგანმანათლებლო პროგრამებზე ჩარიცხული სტუდენტები აჭარის ა.რ. ბიუჯეტიდან მიიღებენ დაფინანსებას. სასწავლო გრანტი, რომლის მაქსიმალური ოდენობა შეადგენს 2500 ლარს, გაიცემა სასწავლო წლის განმავლობაში ორჯერ, სემესტრის მიხედვით.

ევროპისა და ამერიკის წამყვანი უნივერსიტეტების პროფესორ-მასწავლებლებს უნივერსიტეტის რექტორი, პროფესორი ალიოშა ბაკურიძე შეხვდა და სამომავლო თანამშრომლობის გეგმებზე ესაუბრა. საქართველოს განათლებისა და მეცნიერების სამინისტროს ფინანსური ხელშეწყობით უცხოელი მეცნიერები ბათუმის შოთა რუსთაველის სახელმწიფო უნივერსიტეტის სტუდენტებისა და აკადემიური პერსონალისათვის ლექციებს წაიკითხავენ. ამერიკელი, გერმანელი, ესტონელი და პოლონელი ექსპერტები ახალგაზრდებს საინფორმაციო ტექნოლოგიების, საჯარო ადმინისტრირების, საინჟინრო ტექნოლოგიების, სტრატეგიული მენეჯმენიტისა და ეკონომიკის მიმართულებით მსოფლიო მეცნიერების თანამედროვე მიღწევებს გააცნობენ. რსუ-ს ინიციატივით უმაღლეს საგანმანათლებლო დაწესებულებას პარალელურად ეწვევიან უცხოეთში მოღვაწე ცნობილი ქართველი მეცნიერები და სხვადასხვა სპეციალობის სტუდენტებს საკუთარ გამოცდილებას გაუზიარებენ. ერთწლიანი პროექტი პირველად ხორციელდება და მომავალში ტრადიციულ სახეს მიიღებს

ბათუმის შოთა რუსთაველის სახელმწიფო უნივერსიტეტში III საერთაშორისო სამეცნიერო კონფერენცია ,,ბათუმი- წარსული და თანამედროვეობა“ გაიხსნა. 60-მდე ქართველი და უცხოელი მეცნიერი ქალაქის წარსულისა და თანამედროვეობის კვლევებს, ურბანული განვითარების ტენდეციებს და ქალაქისათვის დამახასიათებელი არქიტექტურის შესწავლის, ასევე ადგილობრივი ფოლკლორის, კულტურული ცხოვრების, დემოგრაფიული თუ კონფესიური ვითარების კვლევებს წარმოადგენენ. კონფერენცია ბათუმის შოთა რუსთაველის სახელმწიფო უნივერსიტეტის სამეცნიერო ცენტრის ნიკო ბერძენიშვილის ჰუმანიტარულ და სოციალურ მეცნიერებათა მიმართულების ისტორიისა და არქეოლოგიის განყოფილებისა და ქალაქ ბათუმის მერიის ორგანიზებით ტარდება. III საერთაშორისო კონფერენციაზე წარმოდგენილი მოხსენებები სამეცნიერო კრებულში დაიბეჭდება.

ისტორიული ტაო-კლარჯეთის კომპლექსური და ინტერდისციპლინური კვლევის შედეგებს ეძღვნება II - საერთაშორისო კონფერენცია "ტაო-კლარჯეთი". ოთხდღიანი სამეცნიერო სესია ბათუმის შოთა რუსთაველის სახელმწიფო უნივერსიტეტში იმართება და მასში 35-მდე უცხოელი და 80-მდე ქართველი მეცნიერი მონაწილეობს. პროექტის მიზანია დაინტერესებულ მკვლევართა მეტი კოორდინირება, ისტორიული ტაო-კლარჯეთისადმი სამეცნიერო ინტერესის კიდევ უფრო გაღვივება, ერთობლივი საერთაშორისო პროექტების განხორციელება და განადგურების საფრთხის წინაშე მდგარი მიკრორეგიონებისა და ძეგლების შესწავლის გააქტიურება, რომლებიც კაშხლების მშენებლობის გამო უახლოეს მომავალში დაიტბორება. სამეცნიერო კონფერენცია ხელნაწერთა ეროვნული ცენტრის, შოთა რუსთაველის ეროვნული სამეცნიერო ფონდისა და ბათუმის შოთა რუსთაველის სახელმწიფო უნივერსიტეტის ხელშეწყობით ტარდება.

ბათუმის შოთა რუსთაველის სახელმწიფო უნივერსიტეტისა და საქართველოს მათემატიკოსთა კავშირის ორგანიზებით მათემატიკოსთა მესამე საერთაშორისო კონფერენცია გაიხსნა. 139 ქართველი, ამერიკელი, გერმანელი, პოლონელი, თურქი და სომეხი მეცნიერი ბოლო ერთი წლის განმავლობაში წარმოებული სამეცნიერო კვლევა-ძიების შედეგებს განიხილავს. მათემატიკოსები ერთკვირიანი სამეცნიერო კონფერენციის ფარგლებში ერთმანეთს გამოცდილებას გაუზიარებენ, დარგის აქტუალურ საკითხებზე იმსჯელებენ და შემდეგი სექციების მიმართულებით იმუშავებენ: ნამდვილი და კომპლექსური ანალიზი, ტოპოლოგია, ალგებრა და რიცხვთა თეორია, დიფერენციალური განტოლებები და მათემატიკური ფიზიკა, ალბათობის თეორია და სტატისტიკა, ფინანსური მათემატიკა, გამოყენებითი ლოგიკა და პროგრამირება, ბუნებრივი ენების ლოგიკა და გამოთვლითი ლინგვისტიკა, მათემატიკური მოდელირება და რიცხვითი ანალიზი, მათემატიკური განათლება და ისტორია, უწყვეტ გარემოთა მექანიკა.