ახალი ამბები

შოთა რუსთაველის „ვეფხისტყაოსნის“ პირველი ბეჭდური გამოცემის 300 წლისადმი მიძღვნილი ღონისძიება ჩატარდა. უმაღლესი საგანმანათლებლო დაწესებულების ეზოში მოეწყო პოემის საჯარო კითხვა დევიზით: „ვეფხისტყაოსანი“ საქართველოა, საქართველო - „ვეფხისტყაოსანი“, მხატვარ ზურაბ ხაბაძის ნახატების გამოფენა და თეატრალიზებული წარმოდგენა. განათლებისა და მეცნიერებათა ფაკულტეტის დაწყებითი განათლების სპეციალობის სტუდენტები „ვეფხისტყაოსანს“ ერთი საათის განმავლობაში ზეპირად კითხულობდნენ. პოემის საჯარო კითხვა მესამე წელია ბათუმის შოთა რუსთაველის სახელმწიფო უნივერსიტეტის პედაგოგიკურ მეცნიერებათა დეპარტამენტის ორგანიზებით იმართება.

ბათუმის შოთა რუსთაველის სახელმწიფო უნივერსიტეტში რექტორის არჩევნები ჩატარდა. აკადემიური საბჭოს ყველა წევრმა პროფესორ ალიოშა ბაკურიძეს ერთხმად დაუჭირა მხარი და მეორე ვადით აირჩია. კენჭისყრის დაწყებამდე რექტორობის კანდიდატმა უმაღლესი საგანმანათლებლო დაწესებულების საკანონმდებლო ორგანოს წევრებს სამოქმედო გეგმა გააცნო და უნივერსიტეტის განვითარების პერსპექტივებზე ესაუბრა. უნივერსიტეტში დაინერგება ინტეგრირებული სწავლება, ელექტრონული საგანმანათლებლო პროგრამები და ინგლისურენოვანი სასწავლო კურსები. შეიქმნება საერთაშორისო მასშტაბის სამეცნიერო ჟურნალი, გაიზრდება გაცვლითი პროგრამების რაოდენობა. ასევე ჩამოყალიბდება სასწავლო პროცესისა და სამეცნიერო-კვლევითი მუშაობის ეფექტური მართვის სისტემა.

მასწავლებელთა პროფესიული განვითარების ეროვნული ცენტრის წარმომადგენლებმა ბათუმის შოთა რუსთაველის სახელმწიფო უნივერსიტეტის სტუდენტებს პროგრამა ”ქართული ენა მომავალი წარმატებისთვის” წარუდგინეს. პროგრამა საქართველოს პრეზიდენტის ინიციატივით 2011 წლიდან ხორციელდება და სამცხე-ჯავახეთში, ქვემო ქართლსა და კახეთში მცხოვრები ეთნიკური უმცირესობებისათვის ქართულ ენის შესწავლას ითვალისწინებს. ცენტრი 2012-2013 სასწავლო წლისათვის მასწავლებლების შერჩევას იწყებს. კონკურსში მონაწილეობის მიღება აკრედიტებული უმაღლესი სასწავლებლის ბაკალავრიატის კურსდამთავრებულებს შეუძლიათ, რომელთაც საქართველოს განათლებისა და მეცნიერების სამინიტრო ერთი აკადემიური წლის მუშაობის საფუძველზე, მაგისტრატურას სრულად დაუფინანსებს. პედაგოგებს, რომლებსაც მასწავლებლის სასერტიფიკატო გამოცდებში მონაწილეობის მიღება და პედაგოგიური პრაქტიკის გაგრძელება სურთ, პროგრამის ფარგლებში მიღებული გამოცდილება ერთწლიან სამუშაო სტაჟში ჩაეთვლებათ.

თანამშრომლობის მემორანდუმს მოაწერეს ხელი ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და აკაკი წერეთლის სახელმწიფო უნივერსიტეტის რექტორმა, პროფესორმა გიორგი ღავთაძემ. ხელშეკრულება ერთობლივი სასწავლო-საგანმანათლებლო პროექტების განხორციელებას, კონფერენციებისა და სემინარების ჩატარებას, სამეცნიერო პოტენციალის გამოყენებას, გამოცდილების გაზიარებას, საჯარო ლექციების წაკითხვასა და საბიბლიოთეკო ფონდით სარგებლობას ითვალისწინებს. მხარეები ხელს შეუწყობენ სტუდენტებისთვის გაცვლითი პროგრამების ამოქმედებას და მსოფლიოს წამყვან სასწავლო-სამეცნიერო ცენტრებთან ერთობლივი კვლევების ჩატარებას.

ბათუმის შოთა რუსთაველის სახელმწიფო უნივერსიტეტში გაიხსნა ბათუმის II საერთაშორისო სიმპოზიუმი ლექსიკოგრაფიაში. სამდღიანი სიმპოზიუმის მუშაობაში ჩართული არიან საქართველოს თითქმის ყველა უნივერსიტეტისა და სამეცნიერო ცენტრის წარმომადგენლები, ცნობილი მეცნიერები, ლექსიკოგრაფები იტალიიდან, გერმანიიდან, ჰოლანდიიდან, ისრაელიდან, შვედეთიდან, პორტუგალიიდან, ლატვიიდან, ლიტვიდან, რუსეთიდან და უკრაინიდან. ხუთი სექციის მიმართულებით 150-მდე მოხსენება იქნება წარმოდგენილი ლექსიკოგრაფიის აქტუალურ საკითხებზე. სიმპოზიუმის ფარგლებში საჯარო ლექციებს წაიკითხავენ ცნობილი ქართველი და უცხოელი ლექსიკოგრაფები, გაიმართება დისკუსია მრგვალ მაგიდასთან თემაზე: „ელექტრონული კორპუსები და მათი გამოყენების პერსპექტივები ქართულ ლექსიკოგრაფიაში“.