ახალი ამბები

ბსუ-ში საზაფხულო სკოლა „კონსტიტუციური მართლმსაჯულება" გაიხსნა. საზაფხულო სკოლაში მონაწილეობს სხვადასხვა უნივერსიტეტის სამართლის საბაკალავრო და სამაგისტრო საგანმანათლებლო პროგრამის 30 სტუდენტი. სწავლებას გაუძღვებიან საქართველოს უნივერსიტეტის პროფესორი მარი მარინაშვილი და სამცხე-ჯავახეთის სახელმწიფო უნივერსიტეტის იურიდიული ფაკულტეტის დეკანი, პროფესორი დავით ხობელია. ხუთდღიანი საზაფხულო სკოლა „კონსტიტუციური მართლმსაჯულება" ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტისა და სამცხე-ჯავახეთის სახელმწიფო უნივერსიტეტის იურიდიული ფაკულტეტის ორგანიზებით იმართება.

ბსუ-ს პროექტი „აჭარის არქეოლოგიური ძეგლები გეოგრაფიულ საინფორმაციო სისტემაში“ შოთა რუსთაველის საქართველოს ეროვნული სამეცნიერო ფონდის შავი ზღვისა და ზღვისპირა რეგიონის კვლევების საგრანტო კონკურსის „შავი ზღვის ლურჯი განვითარება“ გამარჯვებულია. საგრანტო პროექტი მიზნად ისახავს აჭარის არქეოლოგიური ძეგლების გეოგრაფიული საინფორმაციო სისტემის შექმნას. აჭარის არქეოლოგიური ძეგლების გეოინფორმაციული სისტემის რუკაზე დატანა მნიშვნელოვანი სიახლეა არა მარტო რეგიონისათვის, არამედ ზოგადად შავიზღვისპირეთისათვის, რადგან ამ მასალის გამოჩენა გეოინფორმაციული სისტემის რუკაზე შეავსებს ინფორმაციულ ვაკუუმს. ელექტრონული არქეოლოგიური რუკის არსებობა გაზრდის შავიზღვისპირეთის კულტურული რესურსების მართვის ეფექტურობას, ხელს შეუწყობს კულტურული მემკვიდრეობის პოპულარიზაციას.

ტეხასის Prairie View A&M უნივერსიტეტში ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის აგრარული მიმართულების სტუდენტები: მერი წილოსანი, გიორგი კილასონია და ლუკა ნინიძე ამერიკის შეერთებული შტატების სოფლის მეურნეობის დეპარტამენტის USDA-ს კლიმატგონივრული სოფლის მეურნეობის ექსტენციის პროექტის ფარგლებში სტაჟირებას გადიან. სტუდენტები ეცნობიან აშშ-ის ექსტენციის სისტემას და მონაწილეობენ უნივერსიტეტის კვლევით და პრაქტიკულ აქტივობაში. კლიმატგონივრული სოფლის მეურნეობის ექსტენციის პროექტი დაფინანსებულია აშშ-ის სოფლის მეურნეობის დეპარტამენტის მიერ და ბათუმის შოთა რუსთაველის სახელმწიფო უნივერსიტეტთნ ერთად, სექტორული პლატფორმა „მომავლის ფერმერი“ ახორციელებს.

ბათუმის შოთა რუსთაველის სახელმწიფო უნივერსიტეტში კურსდამთავრებულთა გამოშვების საზეიმო ღონისძიება გაიმართა. მანტიებში გამოწყობილ კურსდამთავრებულებს უნივერსიტეტის რექტორის მოვალეობის შემსრულებელმა მერაბ ხალვაშმა, ადმინისტრაციის ხელმძღვანელმა მერაბ დიასამიძემ, რექტორის მოადგილეებმა თამარ სირაძემ და ანზორ ბერიძემ, ფაკულტეტების დეკანებმა, პროფესორ-მასწავლებლებმა და მოწვეულმა სტუმრება სწავლის დასრულება მიულოცეს, წარმატებები უსურვეს და სერტიფიკატები გადასცეს. ბსუ 2024 წელს ყველა საფეხურის საგანმანათლებლო პროგრამის 1200-მდე სტუდენტმა დაამთავრა.

ბსუ-ში ევროკავშირის მიერ დაფინანსებული ჟან მონეს კათედრის „უფრო ახლოს ევროკავშირთან“ ფარგლებში, ერთკვირიანი საზაფხულო სკოლა „ევროკავშირის კონკურენციის სამართალი“ გაიხსნა. საზაფხულო სკოლას ჟან მონეს კათედრის ხელმძღვანელი ბსუ-ს პროფესორი სოლომონ მენაბდიშვილი უძღვება და მასში მონაწილეობს საქართველოს სხვადასხვა უნივერსიტეტის 32 სტუდენტი. სწავლების მიზანია, სტუდენტებს მისცეს საბაზისო ცოდნა ევროკავშირის კონკურენციის სამართლის შესახებ. საზაფხულო სკოლის ფარგლებში განხილული იქნება ევროკავშირის კონკურენციის სამართლის შემდეგი საკითხები: კონკურენციის სამართალის წარმოშობა, მისი მიზნები, ეკონომიკური აგენტების შეთანხმებული მოქმედებები (კარტელები), კარტელის პასუხისმგებლობისაგან განთავისუფლების პირობები, ეკონომიკური აგენტების მიერ დომინანტური მდგომარეობის ფლობა.