კონფერენციები

2-14 სექტემბერს ბათუმის შოთა რუსთაველის სახელმწიფო უნივერსიტეტი უმასპინძლებს საზაფხულო სკოლას განათლების მიმართულების სტუდენტებისა და მასწავლებლობის სტატუსის მაძიებელი პირებისთვის: „ფორმალური ლოგიკის კანონების გამოყენება სწავლა - სწავლების პროცესში“. საზაფხულო სკოლა მიზნად ისახავს ლოგიკის, როგორც თეორიული მეცნიერების საფუძველზე სწავლა-სწავლების ახალი მოდელის შემუშავებას, რომელიც მიმართული იქნება სწავლისა და სწავლების პროცესის დახვეწისა და გაუმჯობესებისკენ, ასევე მოსწავლეებში კრიტიკული აზროვნების განვითარებისკენ. საზაფხულო სკოლა იმართება აჭარის ა.რ. განათლების, კულტურისა და სპორტის სამინისტროს საგრანტო პროექტის ფარგლებში. სკოლას წარუძღვებიან ბსუ-ს სპეციალისტები, ასოცირებული პროფესორი ლალი ანთიძე; ნებრასკა-ლინკოლნის უნივერსიტეტის განათლების მაგისტრი, ბსუ-ს ფილოსოფიის ბაკალავრი, იმედა იაკოვენკო; ასევე განათლების მოწვეული ექსპერტები: პაატა პაპავა და სიმონ ჯანაშია.

18-25 აგვისტოს, ბათუმის შოთა რუსთველის სახელმწიფო უნივერსიტეტში იურიდიული და სოციალურ მეცნიერებათა ფაკულტეტის ბაკალავრიატისა და მაგისტრატურის სტუდენტებისათვის იმართება საერთაშორისო საზაფხულო სკოლა „კონსტიტუციური დემოკრატია: თანამედროვე გამოწვევები“. საზაფხულო სკოლის მიზანია კონსტიტუციურ სამართალში, კერძოდ, კონსტიტუციური დემოკრატიის მნიშვნელოვანი ინსტიტუტების შესახებ სამართლის სკოლის სტუდენტების პროფესიული ცოდნის ამაღლება, საქართველოში უცხოელი სტუდენტების მობილობის ხელშეწყობა, სტუდენტებსა და პროფესორებს შორის თანამშრომლობის გაღრმავება.

8-12 ივლის, ბათუმის შოთა რუსთველის სახელმწიფო უნივერსიტეტში საზაფხულო სკოლა „თანამედროვე მიდგომები განათლების დარგში“ გაიმართება. ტრენერები როის ჯეფერსონ ჯორჯი და დავით დარსაველიძე მსმენელებს გააცნობენ განათლების დარგის კვლევების თანამედროვე მეთოდოლოგიას. საზაფხულო სკოლის მუშაობაში ბათუმის შოთა რუსთველის სახელმწიფო უნივერსიტეტის, ივანე ჯავახიშვილის სახელობის თბილისის სახელმწიფო უნივერსიტეტის, ქუთაისის აკაკი წერეთლის სახელმწიფო უნივერსიტეტის დოქტორანტები და განათლების დარგის კვლევებით დაინტერესებული პირები. საზაფხულო სკოლა თსუ-ს სტუდენტური პროექტის ფარგლებში ტარდება.

30 ივლისს -1 აგვისტოს, ბათუმის შოთა რუსთაველის სახელმწიფო უნივერსიტეტში, ERASMUS-ის პროექტის ARTIST-ის ფარგლებში გაიმართება საერთაშორისო კონფერენცია „პრაქტიკული კვლევა საბუნებისმეტყველო საგნების სწავლების გაუმჯობესებისთვის“. სესიაში მონაწილეობა შეუძლიათ უმაღლესი და საჯარო სკოლების აკადემიურ პერსონალს, პედაგოგებსა და საბუნებისმეტყველო საგნების სწავლების გაუმჯობესების საკითხებით დაინტერესებულ პირებს.

17-20 ივლისს ბათუმის შოთა რუსთაველის სახელმწიფო უნივერსიტეტისა და ივანე ჯავახიშვილის სახელობის თბილისის სახელმწიფო უნივერსიტეტის ერთობლივი კავკასიის მეექვსე საერთაშორისო სიმპოზიუმი „პოლიმერები და მოწინავე მასალები“ გაიმართება. საერთაშორისო სიმპოზიუმში მონაწილოებას მიიღებენ მეცნიერები საქართველოს, გერმანიის, საფრანგეთის, პოლონეთის, ბელგიის ყაზახეთის, ბელორუსიის, უკრაინის, სომხეთის, აზერბაიჯანის ირანის და სხვა ქვეყნების სამეცნიერო ცენტრებიდან. სიმპოზიუმის მიზანია პოლიმერებისა და მათ საფუძველზე მიღებული კომპოზიციური მასალების, კომპოზიტების სფეროში არსებული თანამედროვე სამეცნიერო-ტექნიკური ნამუშევრების შედეგების განხილვა და ახალი, პრაქტიკაში ფართოდ გამოყენებადი პოლიმერული მასალების წარმოჩენა.