პროფესიული პროგრამების მართვისა და უწყვეტი განათლების ცენტრის დირექტორი მადონა მიქელაძე ბსუ-ს პროფესიული განათლების მასწავლებლების წინაშე 2019 წელს ცენტრის მიერ გაწეული საქმიანობის ანგარიშით წარსდგა. მადონა მიქელაძემ ისაუბრა ცენტრის წინაშე არსებულ გამოწვევებზე და იმ ღონისძიებებზე, რაც ბსუ-ში აღნიშნული გამოწვევების აღმოფხვრის მიზნით ჩატარდა. კერძოდ, გაუმჯობესდა პროფესიული საგანმანათლებლო პროგრამების შემუშავების, განხორციელებისა და შეფასების, აგრეთვე სასწავლო პროცესის განხორციელებისა და მონიტორინგის მექანიზმები, შემუშავდა ახალი პროფესიული საგანმანათლებლო, ასევე პროფესიული მომზადებისა და პროფესიული გადამზადების პროგრამები.

საქართველოს განათლების ხარისხის განვითარების ეროვნულ ცენტრის პროფესიული მომზადების/პროფესიული გადამზადების პროგრამების განხორციელების უფლების მიმნიჭებელმა საბჭომ ბათუმის შოთა რუსთაველის სახელმწიფო უნივერსიტეტის პროფესიული გადამზადების პროგრამებს „უსაფრთხოების წესების დაცვა იატაკისა და ფილების სამუშაოების შესრულებისას“ და „უსაფრთხოების წესების დაცვა სამშენებლო კონსტრუქციების აწყობისას" განხორციელების უფლება მიანიჭა. ვულოცავთ სტუდენტებსა და პროფესორ-მასწავლებლებს მნიშვნელოვან გამარჯვებას და წარმატებებს ვუსურვებთ.

მაინცის უნივერსიტეტის პროფესორმა მარკუს ბიონერმა ბათუმის შოთა რუსთაველის სახელმწიფო უნივერსიტეტში საჯარო ლექცია და ვორკშოფი ჩაატარა თემაზე: „ხარისხის კულტურა, მართვა და მეთოდოლოგიური მიდგომები ლიდერებისთვის პროფესიულ განათლებაში“. პროფესორმა მარკუს ბიონერმა ბსუ-ს პროფესორ-მასწავლებლებს ისეთი აქტუალური საკითხები გააცნო, როგორიცაა პროფესიული საგანმანათლებლო სფეროს ხარისხის და სასწავლო პროცესის მართვა და სწავლება-სწავლის მეთოდოლოგია.

ბსუ-ს პროფესიული პროგრამების მართვისა და უწყვეტი განათლების ცენტრმა საჯარო სკოლებში ვებპროგრამირების მოკლევადიანი სასწავლო კურსი განახორციელა. ბსუ-ს რექტორმა მერაბ ხალვაშმა, რექტორის მოადგილემ თამარ სირაძემ, პროფესიული პროგრამების მართვისა და უწყვეტი განათლების ცენტრის უფროსმა მადონა მიქელაძემ სასწავლო კურსის მონაწილე მოსწავლეებს სერტიფიკატები გადასცეს, ხოლო პარტნიორი სკოლების დირექტორებს -კომპიუტერული ტექნიკა. ღონისძიების ფარგლებში მოსწავლეებმა უნივერსიტეტის მატერიალურ-ტექნიკური ბაზა დაათვალიერეს.

არასამთავრობო ორგანიზაცია „საორსა“-ს ორგანიზებით პროექტის „პროფესიების არჩევის პროგრამა“ ფარგლებში ქედის, შუახევის და ხულოს მუნიციპალიტეტების საჯარო სკოლების მოსწავლეებისათვის განათლების ფორუმი ჩატარდა. პროფორიენტაციის ფორუმის მონაწილე სკოლის მოსწავლეები სხვადასხვა უმაღლესი და პროფესიული საგანმანათლებლო დაწესებულებების წარმომადგენლებს შეხვდნენ და სხვადასხვა პროფესიებს გაეცნენ. ბათუმის შოთა რუსთაველის სახელმწიფო უნივერსიტეტის პროფესიული პროგრამების მართვისა და უწყვეტი განათლების ცენტრის წარმომადგენლებმა მოსწავლეებს ბსუ-ს პროფესიული საგანმანათლებლო პროგრამები და პროგრამებზე მიღების წესები წარუდგინეს.