ბათუმის შოთა რუსთაველის სახელმწიფო უნივერსიტეტმა მონაწილეობა მიიღო თბილისში გამართულ პროფესიული განათლების ქართულ-გერმანულ დღეებში. ღონისძიების ფარგლებში ორდღიანი კონფერენცია „უნარები საქართველოსთვის - პროფესიული განათლების ქართულ-გერმანული დღეები“ ჩატარდა. სესიაზე, რომელსაც 200-მდე ექსპერტი და მოწვეული სტუმარი ესწრებოდა პროფესიული განათლების მნიშვნელოვანი საკითხები განიხილეს. გერმანელმა ექსპერტებმა ქართველ კოლეგებს პროფესიული განათლების მიმართულებით გამოცდილება გაუზიარეს.

ბათუმის შოთა რუსთაველის სახელმწიფო უნივერსიტეტში ზუსტ მეცნიერებათა და განათლების ფაკულტეტის ორგანიზებით სტუდენტთა და მოსწავლეთა მეშვიდე სამეცნიერო კონფერენცია გაიმართა. წელს პირველად კონფერენციაში მონაწილეობა მიიღეს ბსუ-ს პროფესიული განათლების სტუდენტებმა. პროფესიული განათლების თემატიკას კონფერენციის ცალკე სექცია დაეთმო. სტუდენტებმა მოხსენებები წარმოადგინეს მედიცინის, ფარმაციის, ინფორმაციული ტექნოლოგიების და სკოლამდელი აღზრდის მიმართულებებით.

ბათუმის შოთა რუსთაველის სახელმწიფო უნივერსიტეტის პროფესიული განათლების მასწავლებლებისათვის მასწავლებელთა პროფესიული განვითარების ეროვნულმა ცენტრმა „პროფესიული განათლების მასწავლებელთა და დირექტორთა განვითარების სახელმწიფო პროგრამის“ ფარგლებში დამტკიცებული პედაგოგიური პროგრამის კურსის განხორციელება დაიწყო. 5 სასწავლო მოდულისაგან შემდგარი პედაგოგიური პროგრამის სრული კურსის დასრულების შემდეგ კურსდამთავრებულებს გადაეცემათ პროფესიული განათლების მასწავლებლის სერტიფიკატები. პირველ ეტაპზე პედაგოგიურ პროგრამის კურსს გაივლის ბსუ-ს პროფესიული განათლების 24 მასწავლებელი. პროგრამა მასწავლებელთა პროფესიული განვითარების ეროვნული ცენტრის მიერ გაეროს განვითარების ფონდთან თანამშრომლობით შემუშავდა. პირველი პროფესიული პედაგოგიური კურსის პილოტირება ჩატარდა 2016 წელს.

ბათუმის შოთა რუსთაველის სახელმწიფო უნივერსიტეტში „სამუშაოს მაძიებელთა პროფესიული მომზადება-გადამზადების და კვალიფიკაციის ამაღლების“ 150-საათიანი სახელმწიფო პროგრამა ამოქმედდა. ამ ეტაპზე ხუთი პროგრამის, ბაგა-ბაღის აღმზრდელის, ბუღალტრული აღრიცხვის, ვებპროგრამისტის, ელექტრონული და ციფრული მოწყობილობის დიაგნოსტიკოს-შემკეთებლის და მეფუტკრის პროგრამებზე პროფესიულ გადამზადებას 43 მსმენელი გადის. სწავლის წარმატებით დასრულების შემდეგ კურსდამთავრებულებს სერტიფიკატები გადაეცემათ.

წარმატებით დასრულდა ბათუმის შოთა რუსთაველის სახელმწიფო უნივერსიტეტის პროფესიული საგანმანათლებლო პროგრამების ავტორიზაციის პროცესი. საგანმანათლებლო დაწესებულებას პროფესიული საგანმანათლებლო პროგრამების განხორციელების უფლება 6 წლის ვადით მიენიჭა. ვულოცავთ სტუდენტებსა და პროფესორ-მასწავლებლებს ამ მნიშვნელოვან გამარჯვებას.