ბათუმის შოთა რუსთაველის სახელმწიფო უნივერსიტეტს პარიზ ლოდრონის ზალცბურგის უნივერსიტეტის მკვლევარი, ბსუ-ს საპარტიო დოქტორი ფრანც კოკი ეწვია. სტუმარს ბსუ-ს რექტორი, ტიტე აროშიძე, სტრატეგიული განვითარებისა და საერთაშორისო ურთიერთიერთობის დეპარტამენტის ხელმძღვანელი მარინე გიორგაძე, იურიდიული და სოციალურ მეცნიერებათა ფაკულტეტის დეკანი ლევან ჯაყელი, და საზოგადოებრივ და პოლიტიკურ მეცნიერებათა დეპარტამენტის წარმომადგენლები შეხვდნენ.

საქართველოს მედიატორთა ასოციაციის თავმჯდომარემ, პროფესორმა ირაკლი ყანდაშვილმა ბათუმის შოთა რუსთაველის სახელმწიფო უნივერსიტეტის სამართალმცოდნეობის საბაკალავრო საგანმანათლებლო პროგრამის სტუდენტებისათვის საჯარო ლექცია წაიკითხა თემაზე: „მედიაცია - ახალი დავის გადაწყვეტის მექანიზმი და ახალი შესაძლებლობები“.

სამართლისა და საჯარო მმართველობის დეპარტამენტში სასწავლო კურსი „ადვოკატი სისხლის სამართლის პროცესში", რომელსაც ხელმძღვანელობს პროფესორი ომარ ფარტენაძე, დასრულდა იმიტირებული სისხლის სამართლის სასამართლო პროცესის ჩატარებით. ნაფიც მსაჯულთა შემადგენლობა შეირჩა მხარეების მიერ კანონმდებლობის შესაბამისად სხვადასხვა სპეციალობის სტუდენტებისგან. მოსამართლის ფუნქცია შეასრულა საქართველოს ადვოკატთა ასოციაციის წევრმა, ბსუ-ს კურსდამთავრებულმა თორნიკე ცივაძემ, რომელიც კვალიფიციურად გაუძღვა პროცესს. მხარეების შესავალი სიტყვების, მტკიცებულებების გამოკვლევის, დაკითხვისა და დასკვნითი სიტყვების შემდეგ ჩამოყალიბდა ნაფიც მსაჯულთა გადაწყვეტილება.

9-13 ივნისს, ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის პროფესორი მალხაზ ნაკაშიძე „ერაზმუს+“-ის აკადემიური გაცვლითი პროგრამის ფარგლებში, სასწავლო ვიზიტით სიენას უნივერსიტეტს (იტალია) ეწვია. პროფესორმა მალხაზ ნაკაშიძემ უნივერსიტეტის სტუდენტებისთვის წაიკითხა ლექციები ევროკავშირის საკონსტიტუციო სამართლის, ევროკავშირში დემოკრატიის, კანონის უზენაესობის, ასევე საქართველოს ევროპული ინტეგრაციის გამოწვევების შესახებ. ვიზიტის ფარგლებში მალხაზ ნაკაშიძემ ჩაატარა სემინარი საქართველოს ევროინტეგრაციის საკითხზე, რომელშიც მონაწილეობდნენ მასპინძელი პროფესორი ტანია გროპი, უფროსი მკვლევარი ვალენტინა კარლინო და პიზას წმინდა ანას წამყვანი სწავლების სკოლის პროფესორი ჯუზეპე მარტინიკო. მხარეებმა ასევე მომავალი თანამშრომლობის შესაძლებლობები განიხილეს.

იურიდიული და სოციალურ მეცნიერებათა ფაკულტეტის სამართალმცოდნეობის საბაკალავრო საგანმანათლებლო პროგრამის სტუდენტებთან შეხვედრა გამართა ადვოკატმა მარიამ საბიაშვილმა. შეხვედრის ფარგლებში მარიამ საბიაშვილმა სტუდენტებს წარუდგინა თემა - „სარჩელის და შესაგებლის შედგენა“. მომხსენებელმა შეხვედრაზე დეტალურად განიხილა სარჩელისა და შესაგებლის მომზადება/შედგენასთან დაკავშირებული საკითხები.