9-13 ივნისს, ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის პროფესორი მალხაზ ნაკაშიძე „ერაზმუს+“-ის აკადემიური გაცვლითი პროგრამის ფარგლებში, სასწავლო ვიზიტით სიენას უნივერსიტეტს (იტალია) ეწვია. პროფესორმა მალხაზ ნაკაშიძემ უნივერსიტეტის სტუდენტებისთვის წაიკითხა ლექციები ევროკავშირის საკონსტიტუციო სამართლის, ევროკავშირში დემოკრატიის, კანონის უზენაესობის, ასევე საქართველოს ევროპული ინტეგრაციის გამოწვევების შესახებ. ვიზიტის ფარგლებში მალხაზ ნაკაშიძემ ჩაატარა სემინარი საქართველოს ევროინტეგრაციის საკითხზე, რომელშიც მონაწილეობდნენ მასპინძელი პროფესორი ტანია გროპი, უფროსი მკვლევარი ვალენტინა კარლინო და პიზას წმინდა ანას წამყვანი სწავლების სკოლის პროფესორი ჯუზეპე მარტინიკო. მხარეებმა ასევე მომავალი თანამშრომლობის შესაძლებლობები განიხილეს.

იურიდიული და სოციალურ მეცნიერებათა ფაკულტეტის სამართალმცოდნეობის საბაკალავრო საგანმანათლებლო პროგრამის სტუდენტებთან შეხვედრა გამართა ადვოკატმა მარიამ საბიაშვილმა. შეხვედრის ფარგლებში მარიამ საბიაშვილმა სტუდენტებს წარუდგინა თემა - „სარჩელის და შესაგებლის შედგენა“. მომხსენებელმა შეხვედრაზე დეტალურად განიხილა სარჩელისა და შესაგებლის მომზადება/შედგენასთან დაკავშირებული საკითხები.

მესამე მისიის ფარგლებში, ბათუმის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის იურიდიული კლინიკის ორგანიზებით, კლინიკის კოორდინატორის ნარგიზ ცეცხლაძის ხელმძღვანელობით, ბათუმის N16 საჯარო სკოლაში გაიმართა შეხვედრა. შეხვედრას ესწრებოდნენ სკოლის ადმინისტრაცია, პედაგოგები, IX, X და XI კლასების მოსწავლეები, ასევე უნივერსიტეტის სამართლის მიმართულების სტუდენტები -იურიდიული კლინიკის სტაჟიორები.

საზოგადოებრივ და პოლიტიკურ მეცნიერებათა დეპარტამენტის ასისტენტ-პროფესორმა გელა ირემაძემ ახალშენის საჯარო სკოლაში ჩაატარა შეხვედრა თემაზე „გაერთიანებული ერების ორგანიზაცია, მისი როლი მსოფლიო უსაფრთხოებაში". ღონისძიება ინტერაქციულ ფორმატში წარიმართა, მოსწავლეები აქტიურად ჩაერთნენ დისკუსიაში, დასვეს შეკითხვები და მიიღეს ამომწურავი პასუხები.

სამართლისა და საჯარო მმართველობის დეპარტამენტის ასისტენტ-პროფესორმა გიგა ფარტენაძემ სკოლა „ევრო -2000"- ში ჩაატარა საჯარო ლექცია თემაზე "არჩევნები და სამოქალაქო აქტივიზმი საქართველოში". შეხვედრა მიზნად ისახავდა ახალგაზრდებში საარჩევნო კულტურისა და დემოკრატიული ჩართულობის მნიშვნელობაზე ცნობიერების ამაღლებას. ლექციის ფარგლებში განხილული იყო როგორც საქართველოს საარჩევნო სისტემის განვითარება, ასევე მოქალაქეთა როლი და პასუხისმგებლობა დემოკრატიული პროცესების გამყარებაში. ლექციის ფარგლებში მოსწავლეებს შესაძლებლობა ჰქონდათ მონაწილეობა მიეღოთ სიმულირებულ ელექტრონულ კენჭისყრაში, რაც კიდევ უფრო საინტერესოს და ინტერაქტიულს ხდიდა შეხვედრას.