ბათუმის შოთა რუსთაველის სახელმწიფო უნივერსიტეტში გერმანული ენის დღე გაიმართა. ღონისძიება გახსნეს და მონაწილეებს მიესალმნენ გერმანიის ელჩის მოადგილე საქართველიში ტანია ჰუტი, ავსტრიის ელჩი საქართველოში თომას მიულმანი და ბსუ-ს რექტორის მოადგილე თამარ სირაძე. ღონისძიების ფარგლებში ჩატარდა გაცვლითი პროგრამების წარდგენა და შეხვედრა გერმანული ენის მასწავლებლებთან, აბიტურიენტებთან, მოსწავლეებთან და მშობლებთან. გერმანიაში სწავლის მსურველებს DAAD-ის თბილისი რეგიონული ოფისის უფროსმა გებჰარდ როილმა სასტიპენდიო პროგრამები გააცნო. ასევე მოეწყო გამოფენა ავსტრიელი მწერლის, ინგებორ ბახმანის შესახებ, რომელმაც მსოფლიო ომი გამოიარა.

2-8 ივნისს, „ერაზმუს+“-ის გაცვლითი პროგრამის ფარგლებში, ბსუ-ს ჰუმანიტარულ მეცნიერებათა ფაკულტეტის ასისტენტ პროფესორი შოთა როდინაძე იმყოფებოდა ბიალისტოკის უნივერსიტეტში (პოლონეთი). შოთა როდინაძე დაესწრო აღნიშნული უნივერსიტეტის მიერ ორგანიზებულ სხვადასხვა უნივერსიტეტის პერსონალთა საერთაშორისო სატრენინგო კვირეულს. "საერთაშორისო კვირეულის" განმავლობაში სამუშაო შეხვედრები გაიმართა უნივერსიტეტის რექტორის მოადგილესთან ინტერნაციონალიზაციის ფარგლებში და სხვადასხვა ფაკულტეტების წარმომადგენლებთან. ვიზიტის ფარგლებში შოთა როდინაძე გაეცნო საგანმანათლებლო პროგრამებს, საუნივერსიტეტო ცხოვრებას, მიმდინარე სასწავლო პროცესსა და სიახლეებს, ასევე შეხვდა უნივერსიტეტის დეპარტამენტების, ლაბორატორიებისა, საგარეო ურთიერთობათა სამსახურის წარმომადგენლებს და დაიგეგმა სამომავლო ურთიერთთანამშრომლობის მიმართულებები.

ბათუმის შოთა რუსთაველის სახელმწიფო უნივერსიტეტის საერთაშორისო სამეცნიერო ჟურნალი „აღმოსავლეთმცოდნეობის მაცნე“ / „Herald of Oriental Studies” ტომი 7. №2. გამოვა 2024 წლის დეკემბერში, სამეცნიერო შრომების წარდგენის ბოლო ვადაა 2024 წლის 13 ნოემბერი. ჟურნალს აქვს „ღია ჟურნალის სისტემების“ (OJS–open journal syst¬ems) პროგრამული უზრუნველყოფა. სტატია უნდა წარმოადგენდეს გამოუქვეყნებელ სამეცნიერო კვლევას. მიმოხილვითი (ანალიტიკური) შინაარსის სტატიები არ მიიღება. ნაშრომის გამოქვეყნება გამოქვეყნება უფასოა.

30 მაისს, პარიზში, სორბონის უნივერსიტეტში გამართულ საერთაშორისო სამეცნიერო კონფერენციაში „ტურიზმის მიერ გამოწვეული განახლება, ურბანიზაცია და რეფორმები - საქართველოს შემთხვევა“ მონაწილეობა მიიღო ჰუმანიტარულ მეცნიერებათა ფაკულტეტის ისტორიის სპეციალობის დოქტორანტმა ნათია თავდგირიძემ. კონფერენცია მიზნად ისახავდა ტურიზმის მეშვეობით გამოწვეული რეგიონული ტრანსფორმაციისა და განვითარების საკითხების გაანალიზებას საქართველოს მაგალითზე. ქვეყნის სხვადასხვა რეგიონთან ერთად განსაკუთრებული აქცენტი გაკეთდა აჭარის რეგიონსა და ქალაქ ბათუმის ტურისტულ პოტენციალზე. სტუდენტმა ნათია თავდგირიძემ პროფესორ ნუგზარ მგელაძისა და ასოცირებულ პროფესორ მანუჩარ ლორიას თანაავტორობით მოხსენება წარადგინა თემაზე: „ეთნოგრაფიული ტურიზმი და სოციალური მედია საქართველოში“.

ჰარვარდის უნივერსიტეტის დევისის ცენტრის ქართველოლოგიის პროგრამის მიმართულებით ცხადდება ვაკანსია დირექტორის პოზიციაზე. დაინტერესებული აპლიკანტი უნდა ფლობდეს მაგისტრის ხარისხს პოლიტიკურ მეცნიერებებში, ან სხვა მომიჯნავე დარგში, უნდა ჰქონდეს განხორციელებული კვლევები და სამეცნიერო პუბლიკაციები საქართველოს ისტორიაზე, კულტურაზე, ლიტერატურასა და პოლიტიკაზე, ასევე, უნდა გააჩნდეს ბაკალავრიატისა და მაგისტრატურის საფეხურის სტუდენტების ასისტენტების მართვისა და ფორმალური სამეცნიერო პრეზენტაციების წარდგენის გამოცდილება. აღსანიშნავია, რომ აპლიკანტი უნდა ფლობდეს ქართულ ენას და ჰქონდეს ქვეყანაში მუშაობის მნიშვნელოვანი გამოცდილება.