ქუთაისის აკაკი წერეთლის სახელმწიფო უნივერსიტეტში ვილიამ კროუფორდმა, ჩრდილოეთ არიზონას უნივერსიტეტის ასოცირებულმა პროფესორმა სემინარი ჩაატარა თემაზე: „კვლევის თანამედროვე მეთოდები ლინგვისტიკაში და კორპუს-ლინგვისტიკის როლი ინგლისური ენის როგორც მეორე უცხოური ენის სწავლების პროცესში“. შეხვედრაზე მიწვეულ იყვნენ ბათუმის შოთა რუსთაველის სახელმწიფო უნივერსიტეტის ინგლისური ფილოლოგიის სპეციალობის პროფესორ-მასწავლებლები. სემინარზე განხილული იყო ლინგვისტური ასპექტების კვლევისათვის აუცილებელი თანამედროვე მეთოდები, ხაზი გაესვა ქართულ აუდიტორიაში ინგლისური ენის სწავლების პროცესში კორპუს-ლინგვისტიკის მნიშვნელობას. სემინარის მონაწილეებს სერტიფიკატები გადაეცათ.

13 აპრილიდან 3 მაისის ჩათვლით, ჰუმანიტარულ მეცნიერებათა ფაკულტეტის დეკანი, ბსუ-ს ოფიციალური დელეგაციის წევრი მარინა გიორგაძე საქართველოში ჩინეთის სახალხო რესპუბლიკის საელჩოს სავაჭრო-ეკონომიკურ საკითხთა მრჩევლის მიწვევით იმყოფებოდა ჩინეთის სახალხო რესპუბლიკაში, ქალაქ პეკინში. პროფესორმა მარინა გიორგაძემ ჩინური ენის საერთაშორისო კოლეჯში (BICC-Beijing International Chinese College) მონაწილეობა მიიღო ჩინური ენისა და კულტურის სემინარში. სემინარის პროგრამით გათვალისწინებული იყო ლექციები ჩინურ ენასა და კულტურაში, ასევე ჩინეთის ეკონომიკისა და პოლიტიკის საკითხებზე. ვიზიტის ფარგლებში მოეწყო საინტერესო ექსკურსიები ჩინეთის ღირსშესანიშნაობების დასათვალიერებლად, პეკინსა და შენჯენში. შედგა საინტერესო შეხვედრები სხვადასხვა ოფიციალურ პირებთან.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტთან არსებული არაფორმალური განათლების ცენტრის ორგანიზებით იმიტირებული გამოცდა ჩატარდა ზოგად უნარებში. 12, 13, 24, 25, 26, 27 აპრილს ბსუ-ს საგამოცდო ცენტრში ჩატარებულ იმიტირებულ გამოცდაში აჭარის საჯარო და კერძო სკოლების 400-მა მოსწავლემ მიიღო მონაწილეობა. ღონისძიება მიზნად ისახავდა აბიტურიენტების მომზადებას ეროვნული გამოცდებისათვის.

ბათუმის შოთა რუსთაველის სახელმწიფო უნივერსიტეტში მოსწავლეთა სამეცნიერო კონფერენცია ჩატარდა თემაზე: „ახლო აღმოსავლეთი და საქართველო“. სესიის მუშაობა წარიმართა შემდეგი სექციების მიმართულებით: ახლო აღმოსავლეთისა და საქართველოს ისტორიული ურთიერთობები და ახლო აღმოსავლეთისა და საქართველოს კულტურული, ენობრივი და ლიტერატურული ურთიერთობები.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ასისტენტ პროფესორმა ირმა ბაგრატიონმა სკოლა-ლიცეუმის „მასტერ-კლასის“ X, XI და XII კლასების მოსწავლეებისათვის საჯარო ლექცია წაიკითხა თემაზე: „ხელოვნების არსი და დანიშნულება“ და წარმოადგინა სალექციო თემატიკის შესაბამისი პრეზენტაცია პოპულარულ-აქტუალური ვიდეო-ინსტალაციების სახით. მომხსენებელმა დეტალურად განიხილა ხელოვნების დანიშნულების საკითხი როგორც სამოქალაქო, ისე საეკლესიო ცხოვრებაში, ხელოვნების ძირითადი ფუნქციების თავისებურებანი, ხელოვნების ნაწარმოების არსებობის წესის სპეციფიკისა და შეფასების კრიტერიუმების კვლევის პრობლემები.