ახალი ამბები

„ერაზმუს +“- ის ეროვნული ოფისის კოორდინატორმა ლიკა ღლონტმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: "პლაგიატის პრობლემა და მასთან ბრძოლის პრაქტიკა". ლიკა ღლონტმა სტუდენტებს ქართულ აკადემიურ სივრცეში არსებული პლაგიატის შესწავლის პრობლემები, მასთან ბრძოლის და პრევენციის შემუშავების მეთოდები გააცნო და ხარისხის უზრუნველყოფის მნიშვნელობასა და განათლების ინტერნაციონალიზაციაზე ესაუბრა. საჯარო ლექცია ბსუ-ს სტუდენტური პროექტების კონკურსის - „სტუდენტები აკადემიური განვითარებისთვის" ფარგლებში ჩატარდა.

ბათუმის შოთა რუსთაველის სახელმწიფო უნივერსიტეტში აუტიზმის ცნობადობის ამაღლების საერთაშორისო დღე აღინიშნა. ბიოლოგიის საგანმანათლებლო პროგრამის I კურსის და ფსიქოლოგიის საგანმანათლებლო პროგრამის II კურსის სტუდენტებმა საინფორმაციო შეხვედრა გამართეს. ღონისძიებაზე სტუდენტებმა თემატური პრეზენტაციები და ვიდეორგოლები წარმოადგინეს აუტიზმის გენეტიკის, აუტიზმის სპექტრის დიაგნოსტირებისა და მკურნალობის გზებზე. 2007 წელს გაეროს გენერალური ასამბლეის გადაწყვეტილებით 2 აპრილი აუტიზმის ინფორმაციის გავრცელების მსოფლიო დღედ გამოცხადდა.

"სტუდენტთა სამეცნიერო საზოგადოება ბსუ"-ს ორგანიზებით სტუდენტური პროექტის: "სტუდენტები აკადემიური განვითარებისთვის" წარდგინება გაიმართა. პროექტის ფარგლებში, ბათუმის შოთა რუსთაველის სახელმწიფო უნივერსიტეტის რექტორი, მერაბ ხალვაში სტუდენტებს შეხვდა. რექტორმა ყურადღება გაამახვილა სამეცნიერო კვლევების მნიშვნელობაზე, ამ მიმართულებით მიმდინარე გამოწვევებზე და სტუდენტების აქტუალურ შეკითხვებს უპასუხა. ღონისძიებას პროექტის ფარგლებში შერჩეული სხვადასხვა საგანმანათლებლო პროგრამის სტუდენტები ესწრებოდნენ.

„სიკეთე ახალისებს“ - ამ სახელწოდებით ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებმა და ადმინისტრაციის თანამშრომლებმა ბათუმის „მაკდონალდსში“ საქველმოქმედო აქცია გამართეს. აქციაში ბსუ-ს რექტორთან მერაბ ხალვაშთან ერთად მონაწილეობა მიიღო აჭარის განათლების, კულტურისა და სპორტის მინისტრმა ინგა შამილიშვილმა. აქციის მონაწილეებმა რამდენიმე საათით „მაკდონალდსის“ მომსახურე პერსონალის პროფესია შეითავსეს და სტუმრებს გაუმასპინძლდნენ. შემოსული თანხის 20% უნივერსიტეტის სტუდენტთა მხარდაჭერის ფონდში გადაირიცხება. საქველმოქმედო აქცია მუსიკალურად „ბსუ ბენდმა“ გააფორმა.

ბათუმის შოთა რუსთაველის სახელმწიფო უნივერსიტეტმა ხულოს, შუახევისა და ქედის მუნიციპალიტეტებში ღია კარის დღე გამართა. რექტორის მოადგილემ თამარ სირაძემ და პროფესორ-მასწავლებლებმა აბიტურიენტებს უნივერსიტეტის საგანმანათლებლო პროგრამები, სტიპენდიები, პრიორიტეტები, საუნივერსიტეტო ცხოვრება, გაცვლითი და სოციალური პროგრამები, სწავლის პირობები გააცნეს. ბსუ-ს წარდგინების დასასრულს, მომავალ სტუდენტებს უნივერსიტეტის საინფორმაციო ბუკლეტებთან ერთად, სამახსოვრო საჩუქრები გადაეცათ.