ახალი ამბები

ბათუმის შოთა რუსთაველის სახელმწიფო უნივერსიტეტის სტუდენტური თვითმმართველობისა და კავკასიის გარემოსდაცვითი არასამთავრობო ორგანიზაციების ქსელის (CENN-ის) ორგანიზებით ერთობლივი ღონისძიება „სუფთა გარემო“ მოეწყო. სტუდენტებმა ბათუმის ახალი ბულვარის ტერიტორიაზე შავიზღვის სანაპირო ზოლი დაასუფთავეს. CENN-ის წარმომადგენლებმა აქციის მონაწილეებს აირწინაღები, ხელთათმანები, მაისურები და პოლიეთილენის პარკები დაურიგეს. ღონისძიების ფარგლებში ბსუ-ს სტუდენტურმა თვითმმართველობამ სტუდენტებს სიგელები გადასცა.

19-25 მარტს ბუდაპეშტის ოტვოშ ლორანდის სახელმწიფო უნივერსიტეტში საერთაშორისო კონფერენციის ფარგლებში ბათუმის შოთა რუსთაველის სახელმწიფო უნივერსიტეტის ადმინისტრაციის ხელმძღვანელი ჯემალ ანანიძე, ჰუმანიტარული ფაკულტეტის დეკანი პროფესორი მარინე გიორგაძე, ასოცირებული პროფესორი ხათუნა ბერიძე და ჰუმანიტარული ფაკულტეტის „ევროპეისტიკის“ სამაგისტრო პროგრამის სტუდენტი თამთა ნაგერვაძე იმყოფებოდნენ. ვიზიტის ფარგლებში ბათუმის შოთა რუსთაველის სახელმწიფო უნივერსიტეტსა და ოტვოშ ლორანდის უნივერსიტეტს შორის გაფორმდა თანამშრომლობის მემორანდუმი ერთობლივი საგანმანათლებლო პროგრამებისა და სასწავლო კურსების შექმნისა და განხორციელების მიზნით. დაიგეგმა მთარგმნელისა და თარჯიმნის მომზადების ერთობლივი სამაგისტრო-საგანმანათლებლო პროგრამის შექმნის პროცესში თანამშრომლობა პროფ. ი. ჰორვატთან (საერთაშორისო-სამაგისტრო პროგრამის ხელმძღვანელთან).

ღია კარის დღეების ფარგლებში ბათუმის შოთა რუსთაველის სახელმწიფო უნივერსიტეტის წარდგენა გაიმართა ოზურგეთის, ჩოხატაურისა და ფოთის საჯარო სკოლების მეთორმეტე კლასელებისთვის. უმაღლესი სასწავლებლის პროფესორ-მასწავლებლებმა მომავალ სტუდენტებს უნივერსიტეტის საგანმანათლებლო პროგრამები, სერვისები, სტუდენტური ცხოვრება, სამეცნიერო-კვლევითი საქმიანობა, სოციალური და გაცვლითი პროგრამები გააცნეს. შეხვედრის დასასრულს აბიტურიენტებს საინფორმაციო ბუკლეტები და სამახსოვრო საჩუქრები გადაეცათ.

ბათუმის შოთა რუსთაველის სახელმწიფო უნივერსიტეტი ბათუმის ცენტრალურ პარკში სიყვარულის ხეივნის გაშენების აქციას შეუერთდა. ბსუ-ს რექტორის მოადგილემ თამარ სირაძემ და უნივერსიტეტის სტუდენტებმა იაპონური ალუბლის ხეები დარგეს. სიყვარულის ხეივანში 135 იაპონური ალუბლის ხე დაირგო. აქცია ბათუმის გამწვანებისა და ლანდშაფტური დაგეგმარების სამსახურის ორგანიზებით გაიმართა.

„მეგობრები არ ითვლიან ქრომოსომებს!“ - ამ სლოგანით ბათუმის შოთა რუსთაველის სახელმწიფო უნივერსიტეტში დაუნის სინდრომის საერთაშორისო დღისადმი მიძღვნილი ღონისძიებები გაიმართა. საბუნებისმეტყველო მეცნიერებათა და ჯანდაცვის ფაკულტეტის სტუდენტებმა და პროფესორ-მასწავლებლებმა დაუნის სინდრომის შესახებ ცნობიერების ამაღლების მიზნით კონფერენცია ჩაატარეს. ბიოლოგიის II კურსის სტუდენტებმა ღონისძიებაზე წარადგინეს თემატური პრეზენტაციები: „დაუნის სინდრომის გენეტიკა“, „დაუნის სინდრომის მქონე ადამიანთა ფენოტიპური თავისებურებანი“, „დაუნის სინდრომის მქონე ცნობილი ადამიანები“ და „დაუნის სინდრომის მქონე ადამიანების სწავლების სტრატეგიები“. ახალგაზრდებმა ასევე ვიდეორგოლების ჩვენება მოაწყვეს და სხვადასხვა ტიპის აქტივობები გამართეს. იურიდიული და სოციალურ მეცნიერებათა ფაკულტეტის სტუდენტებმა მე-18 საჯარო ბაღის მასწავლებლებთან შეხვედრა ჩაატარეს დაუნის სინდრომის საკითხებზე და აღსაზრდელებთან ერთად ხეები დარგეს.