ახალი ამბები

დაუნის სინდრომის საერთშორისო დღეს ბათუმის შოთა რუსთველის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტმა რამდენიმე ღონისძიება მიუძღვნა. ფსიქოლოგიის სპეციალობის IV კურსის სტუდენტებმა უნივერსიტეტსა და ბათუმის #16 ბაღში საინფორმაციო-საგანმანათლებლო შეხვედრები ჩაატარეს. მომავალმა ფსიქოლოგებმა დაუნის სინდრომზე, მის გამომწვევ მიზეზებზე, მახასიათებელ თვისებებსა და დაუნის სინდრომის მქონე ბავშვებთან მომუშავე ფსიქოლოგის როლზე ისაუბრეს. ღონისძიების დასასრულს, მონაწილეებს საინფორმაციო ფლაერები დაურიგდათ.

ტყის საერთაშორისო დღე ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა ფაკულტეტმა ბოტანიკურ ბაღში გასვლით აღნიშნა. დალი ვარშანიძემ ბიოლოგიის საგანმანათლებლო პროგრამის სტუდენტებისათვის ლექცია წაიკითხა თემაზე: “ბოტანიკური ბაღის არსი და დანიშნულება“. ღონისძიების დასრულების შემდეგ, ახალგაზრდებმა ბოტანიკური ბაღი დაათვალიერეს და ბაღის თანამშრომლებთან ერთად, სხვადასხვა მცენარის ნერგები დარგეს. ტყის საერთაშორისო დღე გაეროს გენერალურმა ასამბლეამ 1971 წელს დააწესა.

უვიზო რეჟიმის შესახებ საინფორმაციო კამპანიის ფარგლებში, ბათუმის შოთა რუსთაველის სახელმწიფო უნივერსიტეტში სტუდენტებთან შეხვედრა გაიმართა. საინფორმაციო ცენტრის წარმომადგენლებმა და ექსპერტებმა ახალგაზრდებს ევროკავშირის, შენგენის ზონაში უვიზო მიმოსვლის წესები, ამ წესების დარღვევასთან დაკავშირებული რისკები და პრობლემები გააცნეს. ღონისძიება საგარეო საქმეთა სამინისტროსა და ნატოსა და ევროკავშირის შესახებ საინფორმაციო ცენტრის ორგანიზებით, სამოქალაქო სექტორთან თანამშრომლობითა და მიგრაციის პოლიტიკის განვითარების საერთაშორისო ცენტრის (ICMPD) მხარდაჭერით ჩატარდა.

ბათუმის შოთა რუსთაველის სახელმწიფო უნივერსიტეტსა და საზოგადოებრივ კოლეჯ „ახალ ტალღას“ შორის თანამშრომლობის მემორანდუმი გაფორმდა. ხელშეკრულება მიზნად ისახავს საგანმანათლებლო სასწავლო პროგრამებისა და პროექტების განხორციელებას. მხარეთა შეთანხმებით, ჩატარდება ერთობლივი სემინარები და ტრენინგები. მემორანდუმის ფარგლებში, კოლეჯის პროფესიული პროგრამის სტუდენტები სასწავლო პრაქტიკას გაივლიან ბსუ-ს ფიტოპათოლოოგიისა და ბიომრავალფეროვნების ინსტიტუტის ბაზაზე.

საქართველოს ახალგაზრდა იურისტთა ასოციაციის აჭარის ფილიალის წარმომადგენლებმა ბათუმის შოთა რუსთაველის სახელმწიფო უნივერსიტეტის სტუდენტებს სამთავრობო ელექტრონული პეტიციების პორტალი (ichange.gov.ge) წარუდგინეს. ichange.gov.ge მოქალაქეთა ელექტრონული პეტიციების ოფიციალური სამთავრობო პლატფორმაა, რომელსაც საქართველოს მთავრობის ადმინისტრაცია ღია მმართველობის პარტნიორობის (OGP) მეორე სამოქმედო გეგმის მიხედვით ახორციელებს. პორტალის დახმარებით საქართველოს ნებისმიერ სრულწლოვან მოქალაქეს შეუძლია პეტიციის საშუალებით საქართველოს მთავრობის ყურადღება გაამახვილოს მისთვის მნიშვნელოვან საკითხზე. შესაბამისი კრიტერიუმების დაკმაყოფილების შემთხვევაში, საქართველოს მთავრობა ვალდებულია, განიხილოს პეტიციაში აღწერილი საკითხი და მოახდინოს რეაგირება.