ახალი ამბები

გაზაფხულის სემესტრში, ბათუმის შოთა რუსთველის სახელმწიფო უნივერსიტეტში გაცვლითი პროგრამების ფარგლებში 12 უცხოელი სტუდენტი ისწავლის. ესპანელი, თურქი, ყაზახი, რუმინელი და აზერბაიჯანელი სტუდენტები განათლების, ჰუმანიტარულ მეცნიერებათა, სოციალურ და პოლიტიკურ მეცნიერებათა, ეკონომიკისა და ბიზნესისა და ტურიზმის ფაკულტეტების საგანმანათლებლო პროგრამებზე გააგრძელებენ სწავლას. ბსუ-ს რექტორის მოადგილე თამარ სირაძე, სტრატეგიული განვითარებისა და საერთაშორისო ურთიერთობათა დეპარტამენტის უფროსი გიორგი თავამაიშვილი ნახჭევანის უნივერსიტეტის პრორექტორთან ელშენ მამედოვთან ერთად, უცხოელ სტუდენტებს შეხვდნენ და წარმატებები უსურვეს.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის არაფორმალური განათლების ცენტრის ლიტერატურულ კლუბში 3-4 მარტს გაიმართა მხატვარ ლევან სონღულაშვილის ლექცია თემაზე: „ხელოვნება და კულტურა“ და თავისუფალი უნივერსიტეტის პროფესორის, ფილოსოფოსისა და ლიტერატურის კრიტიკოსის, ლექსო დორეულის ლექცია თემაზე: „სიკვდილის ლიტერატურული ისტორია“. ლევან სონღულაშვილმა საკუთარი შემოქმედების, თანამედროვე ვიზუალური ხელოვნების სპეციფიკის, ხელოვნებისა და კულტურის ისტორიული და თანამედროვე მიმართების შესახებ ისაუბრა. მომხსენებელმა ასევე განიხილა ქართული მოდერნისტული მხატვრობა, მხატვრობის ისტორიული და თანამედროვე ტენდენციები და შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტის სააქტო დარბაზში „ქართულ–აფხაზური საგას“ 10 წლისადმი მიძღვნილი საღამო გაიმართა. ღონისძიებას ბსუ-ს რექტორი მერაბ ხალვაში, აჭარის ა.რ. მთავრობის თავმჯდომარე ზურაბ პატარაძე, აჭარის ა.რ. მთავრობის წევრები, აფხაზეთის ა.რ. მთავრობის თავმჯდომარე ვახტანგ ყოლბაია, პროფესორ-მასწავლებლები, სტუდენტები, აჭარაში მცხოვრები აფხაზები და საზოგადოების წარმომადგენლები ესწრებოდნენ. საღამოს მონაწილეებმა ქართულ-აფხაზური ურთიერთობები შეაფასეს და სამომავლო გეგმებზე ისაუბრეს. ბსუ-ს აკადემიური საბჭოს გადაწყვეტილებით, უახლოეს მომავალში აფხაზური ენის სასწავლო კურსი ამოქმედდება.

საქართველოს შრომის, ჯანმრთელობისა და სოციალური დაცვის მინისტრმა დავით სერგეენკომ ბათუმის შოთა რუსთაველის სახელმწიფო უნივერსიტეტში შეხვედრა გამართა. მინისტრმა მედიკოსებს დაგეგმილი პროექტები გააცნო და სამკურნალო მედიკამენტების პროგრამაზე, მოქალაქის პორტალზე, ვაქცინაციაზე, წითელას ეპიდზედამხევდელობის გაუმჯობესებაზე, C ჰეპატიტის სკრინიგის, მკურნალობის გაფართოებაზე ისაუბრა. ღონისძიების ფარგლებში დავით სერგეენკომ ბსუ-ს იმუნოგენეტიკის ლაბორატორია დაათვალიერა და პროფესორ-მასწავლებლებთან ერთად სამომავლო თანამშრომლობის მიმართულებები განსაზღვრა.

დასრულდა ბათუმის შოთა რუსთაველის სახელმწიფო უნივერსიტეტის სოციალური პროექტი „პროფესორები მოსწავლეებისთვის“. ორი კვირის განმავლობაში უმაღლესი საგანმანათლებლო დაწესებულების 50-მდე პროფესორ-მასწავლებელმა ხელვაჩაურის, ქობულეთის ბათუმის საჯარო და კერძო სკოლებში პოპულარული ხასიათის ლექციები წაიკითხა ისეთ აქტუალურ საკითხებზე, როგორიცაა: საქართველო ევროინტეგრაციის გზაზე, კონსტიტუცია და დემოკრატიული მმართველობა, ბულინგის გამომწვევი მიზეზები, თაობები და ღირებულებები, ჯანსაღი ცხოვრების წესი, კრიტიკული აზროვნება და სხვ. პროექტი აჭარის განათლების, კულტურისა და სპორტის სამინისტროს მხარდაჭერით განხორციელდა და მიზნად ისახავდა, ახალგაზრდებში სამოქალაქო ცნობიერების ამაღლების ხელშეწყობას.