6-7 ოქტომბერს, ბათუმის შოთა რუსთაველის სახელმწიფო უნივერსიტეტში პროექტის „მედია და კულტურის მეცნიერების მიმართულების განვითარების’’ ფარგლებში, ქართველი და გერმანელი პროფესორების მონაწილეობით მედიისა და კულტურის საკითხებზე სემინარები და დისკუსიები გაიმართა.
მიმდინარე წელს ბსუ-ს მონაწილეობით 22 ახალი საერთაშორისო გაცვლითი პროგრამა დაფინანსდა. პროგრამის ფარგლებში, სტუდენტებსა და აკადემიურ პერსონალს საშუალება აქვთ ისწავლონ და კვალიფიკაცია აიმაღლონ ევროპის ქვეყნების შემდეგ უმაღლეს საგანმანათლებლო დაწესებულებებში: ავსტრია, ბულგარეთი, გერმანია, ესპანეთი, თურქეთი, იტალია, ლიტვა, ნორვეგია, რუმინეთი, პოლონეთი, საფრანგეთი, საბერძნეთი.
ბათუმის შოთა რუსთაველის სახელმწიფო უნივერსიტეტში ახალი სასწავლო წელი დაიწყო. პირველკურსელებს უნივერსიტეტის რექტორი მერაბ ხალვაში, ფაკულტეტების დეკანები, პროფესორ-მასწავლებლები შეხვდნენ, სტუდენტობა მიულოცეს და საუნივერსიტეტო ცხოვრება გააცნეს. 2016-2017 სასწავლო წელს ბსუ-ში 1015 პირველკურსელი ჩაირიცხა, რომელთაგან სასწავლო გრანტი 58-მა მიიღო, ხოლო 10 უფასო სახელმწიფო საგანმანათლებლო პროგრამაზე 419 ახალგაზრდა ისწავლის. საინფორმაციო შეხვედრების დასასრულს, ბაკურ სულაკაურის გამომცემლობისა და წიგნის მაღაზია „სანტა ესპერანსას“ ორგანიზებით წიგნის სამდღიანი ფესტივალი გაიხსნა. ღონისძიების ფარგლებში შეხვედრა გაიმართა მწერლებთან დათო ტურაშვილთან და ლაშა ბუღაძესთან.
შოთა რუსთაველის დარბაზში სამეცნიერო სკოლა გაიხსნა თემაზე: „ნეიროგანვითარებითი დარღვევები - მტკიცებულებები და შესაძლებლობები“. ერთი კვირის განმავლობაში ბათუმის შოთა რუსთაველის სახელმწიფო უნივერსიტეტისა და საქართველოს სხვადასხვა საგანმანათლებლო დაწესებულების სტუდენტებს ამერიკელი, პორტუგალიელი და ქართველი ექსპერტები ბავშვთა ადრეული განვითარების აქტუალურ საკითხებს გააცნობენ. მომხსენებლები ყურადღებას გაამახვილებენ სკოლამდელი ასაკის ბავშვის სკრინიგული შეფასებასა და ადრეული ინტერვენციას, ნეიროგანვითარებით დარღვევებთან ასოცირებულ გენეტიკურ სინდრომებს, ბავშვთა ადრეულ ინტერვენციას, ბავშვთა ადრეული განვითარებისა და ადრეული ინტერვენციის ინტეგრირებული მეცნიერებების საჭიროებასა და შეზღუდული შესაძლებლობების სოციალური მოდელს. პროექტის ფარგლებში ბსუ-ში იგეგმება ბავშვთა ადრეული განვითარების სასერტიფიკატო და სამაგისტრო პროგრამის შექმნა .
ფინეთის ამოს ანდერსონის შვედური უნივერსიტეტის ფილოსოფიის, კულტურისა და მენეჯმენტის ფაკულტეტის ხელმძღვანელმა, პროფესორმა ბენ კრისტენსონ უგლამ ვორკშოფი ჩაატარა თემაზე: „ევროპული თანამშრომლობა და შესაძლებლობები“. ღონისძიებაში ბათუმის შოთა რუსთაველის სახელმწიფო უნივერსიტეტის საერთაშორისო ურთიერთობებისა და ევროპისმცოდნეობის მიმართულების პროფესორ-მასწავლებლები და სტუდენტები მონაწილეობდნენ. შეხვედრა ევროპის კულტურის პარლამენტის 15-ე საიუბილეო გასვლითი სესიის ფარგლებში გაიმართა.
