ახალი ამბები

გაეროს მოდელირებული ახალგაზრდული ასამბლეა სასტუმრო „ლეოგრანდში’’ საზიეომოდ დაიხურა. გამოვლინდა სარეზოლუციო პროექტების გამარჯვებული სტუდენტები და მოსწავლეები. პროექტის გამარჯვებული ბათუმის შოთა რუსთაველის სახელმწიფო უნივერსიტეტის საერთაშორისო ურთიერთობების 1-ლი კურსის სტუდენტი ირინე ტაკიძე გახდა, რომელიც 2 თვით უცხოეთში სტაჟირებაზე გაემგზავრება. დახურვის ცერემონიაზე ორგანიზატორებმა პროექტში მონაწილე ლიდერი სტუდენტები, ორგანიზატორები და ღონისძიების მხარდამჭერები სერტიფიკატებით დააჯილდოეს.

ბათუმის შოთა რუსთაველის სახელმწიფო უნივერსიტეტში ევროპის დღე რამდენიმე ღონისძიებით აღინიშნა. კვირეული ისტორიის სპეციალობის სტუდენტთა კონფერენციით -„ევროპა და საქართველო“ გაიხსნა. შედგა ფილმის „მოგზაურობა ეროპაში“ ჩვენება. უმაღლესი საგანმანათლებლო დაწესებულების წარმომადგენლებმა სტუდენტებს საზღვარგარეთ სწავლის პირობები გააცნეს და გაცვლითი პროგრამების შესახებ პრეზენტაციები წარუდგინეს. ღონისძიების ფარგლებში სტუდენტებმა სახელწოდებით -„ევროპა იწყება საბერძნეთით“ ანტიკური სამოსის დეფილე გამართეს, ასევე საფრანგეთის, გერმანიის, ინგლისისა და სლავური სამყაროების კუთხეები მოაწყვეს, სადაც ნაციონალური სამზარეულო, ტანსაცმელი და ტრადიციები წარმოადგინეს.

ბათუმის შოთა რუსთაველის სახელმწიფო უნივერსიტეტში აზერბაიჯანის ყოფილი პრეზიდენტის ჰეიდარ ალიევის 93 წლის იუბილესთან დაკავშირებით აზერბაიჯანისმცოდნეობის აუდიტორია გაიხსნა. აუდიტორია აზერბაიჯანის რესპუბლიკის გენერალმურმა კონსულმა ქალაქ ბათუმში რაშად ისმაილოვმა, ბსუ-ს რექტორის მოვალეობის შემსრულებელმა მერაბ ხალვაშმა, აჭარის ა.რ. უმაღლესი საბჭოს თავმჯდომარემ ავთანდილ ბერიძემ და აჭარის ა.რ. განათლების, კულტურისა და სპორტის მინისტრმა გიორგი თავამაიშვილმა გახსნეს. ბათუმის შოთა რუსთაველის სახელმწიფო უნივერსიტეტსა და აზერბაიჯანის უმაღლეს საგანმანათლებლო დაწესებულებებს შორის უკვე რამდენიმე წელია მოქმედებს სტუდენტთა და პროფესორ-მასწავლებელთა გაცვლითი პროგრამები, მიმდინარე სასწავლო წელს მემორანდუმი გაფორმდა აზერბაიჯანის არქიტექტურისა და მშენებლობის უნივერსიტეტთან, რომელიც ერთობლივი საგანმანათლებლო პროგრამების ამოქმედებას ითვალისწინებს. აზერბაიჯანისმცოდნეობის აუდიტორია ხელს შეუწყობს ორ ქვეყანას შორის თანამშრომლობის კიდევ უფრო გაღრმავებას და საგანმანათლებლო და კულტურული პროექტების განხორციელებას.

დღეს, სასტუმრო „ჰილტონ ბათუმში“გაეროს მოდელირებული ახალგაზრდული ასამბლეა გაიხსნა. ფორუმი ბათუმის შოთა რუსთაველის სახელმწიფო უნივერსიტეტის თვითმმართველობის ორგანიზებით 8-10 მაისის ჩათვლით ტარდება და მასში 400-მდე დელეგატი მონაწილეობს. ასამბლეის მიზანი ახალგაზრდების როლის გაზრდა გლობალური მიზნების განხორციელებაში და იმ ძირითად 17 გამოწვევაზე მსჯელობაა, რომლის წინაშეც დგას მსოფლიო: განათლება, ეკოლოგია, ჯანდაცვა, სიღარიბის დაძლევა. მონაწილე დელეგატები 2 დღის განმავლობაში სხვადასხვა თემაზე გამართულ სესიებში, კინოჩვენებებსა და დებატებში მიიღებენ მონაწილეობას. აგრეთვე, დაგეგმილია ოფიციალური ვიზიტები აჭარის ა/რ სამთავრობო სტრუქტურებსა და დიპლომატიურ ორგანიზაციებში.

ბათუმის შოთა რუსთაველის სახელმწიფო უნივერსიტეტში პროფესორის, პოლიტიკურ მეცნიერებათა დარგის ექსპერტის კორნელი კაკაჩიას საჯარო ლექცია გაიმართა თემაზე: „უმაღლესი განათლება საქართველოში: მიღწევები, გამოწვევები, პერსპექტივები“. საჯარო ლექციაზე მომხსენებელმა პროფესორ-მასწავლებლებსა და სტუდენტებს საქართველო- ევროკავშირის შეთანხმების შესახებ გზამკვლევი წარუდგინა და მისი იმპლემენტაციის ხელშეწყობაზე ისაუბრა. ექსპერტმა ყურადღება გაამახვილა საქართველოს უმაღლესი განათლების სისტემაში მიმდინარე პრობლემებზე, გამოწვევებსა და პერსპექტივებზე, რომელსაც ბოლონიის პროცესი ქართული უნივერსიტეტების წინაშე აყენებს.