ახალი ამბები

2016 წლის 25-29 თებერვალს, ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელი ასოც. პროფესორი მერაბ ხალვაში პოლონეთის ქალაქ ვროცლავში აჭარის დელეგაციის მიერ გამართულ ოფიციალური შეხვედრებში მონაწილეობდა. რექტორის მოვალეობის შემსრულებელმა შეხვედრები გამართა ვროცლავის უმაღლეს საბანკო სკოლისა და ფიზიკური აღზრდის აკადემიის რექტორებთან. შეხვედრის ძირითადი მიზანი იყო უნივერსიტეტებს შორის გაფორმებული ურთიერთთანამშრომლობის მემორანდუმით გათვალისწინებული პუნქტების განხორციელება. მხარეები შეთანხმდნენ ერთობლივი სამეცნიერო კონფერენციებისა და კვლევების ჩატარებაში, სამეცნიერო კრებულის გამოცემაში. მიმდინარე წლის აპრილ-მაისში ვროცლავის საბანკო უმაღლესი სკოლის მიერ მოწყობილ საერთაშორისო საზაფხულო სკოლაში მონაწილეობას მიიღებენ ბათუმის უნივერსიტეტის ბიზნესის მიმართულების სტუდენტები და პროფესორ-მასწავლებლები.

ბათუმის შოთა რუსთაველის სახელმწიფო უნივერსიტეტში ზამთრის სკოლა გაიხსნა. ზამთრის სკოლა, რომელიც სოციალურ მონაცემთა ანალიზს ეძღვნება, მიზნად ისახავს პროფესორ-მასწავლებლების, დოქტორების, მაგისტრანტებისა და არასამთავრობო ორგანიზაციების („Think Tank”, კვლევითი ან სხვა ტიპის ორგანიზაციების) წარმომადგენლების კვალიფიკაციის ამაღლებას სოციალურ მონაცემთა ანალიზში, მათთვის მონაცემთა ანალიზის მოწინავე მეთოდების სწავლებას და პრაქტიკული უნარ-ჩვევების გამომუშავებას.

ბათუმის შოთა რუსთაველის სახელმწიფო უნივერსიტეტმა ბრიტანულ ცენტრთან ორმხრივი თანამშრომლობის მემორანდუმი გააფორმა. მემორანდუმის ფარგლებში დაგეგმილია ერთობლივი საგანმანათლებლო და კულტურული ღონისძიებების განხორციელება და მათში ბსუ-ს სტუდენტების მაქსიმალური ჩართვა.

შოთა რუსთაველის სახელმწიფო უნივერსიტეტმა ბათუმის საჯარო და კერძო სკოლებში ღია კარის დღეები დაიწყო. უმაღლესი საგანმანათლებლო დაწესებულების პროფესორ-მასწავლებლები და სტუდენტები აბიტურიენტებისათვის პრეზენტაციებს მართავენ. მეთორმეტე კლასის მოსწავლეები უნივერსიტეტში სწავლების პირობებს, საგანმანათლებლო პროგრამებს, სტიპენდიებს, სოციალური და გაცვლით პროგრამებს, სამეცნიერო-კვლევითი საქმიანობას, სტუდენტური ცხოვრებასა და სიახლეებს ეცნობიან. მომავალ სტუდენტებს უნივერსიტეტის შესახებ დეტალური ინფორმაციის მისაღებად ბუკლეტები და საჩუქრები გადაეცემათ.
ღია კარის დღეები ბათუმის სკოლების შემდეგ აჭარის რაიონებში, სამეგრელოსა და გურიის რეგიონებში გაგრძელდება.

25 თებერვალს, საბჭოთა ოკუპაციის დღესთან დაკავშირებით ბათუმის შოთა რუსთაველის სახელმწიფო უნივერსიტეტში კინოჩვენება გაიმართა. ფილმი სახელად ‘’წუთისოფელი ‘’ საბჭოთა რუსეთის მე-11 წითელი არმიის თბილისში შეჭრას და 1921 წელს განვითარებულ მოვლენებს ასახავდა. კინოჩვენებას სპეციალური სტუმრის სტატუსით ფილმის მთავარი მოქმედი გმირი, საქართველოს სახალხო არტისტი მანუჩარ შერვაშიძე ესწრებოდა. მსახიობმა და რექტორის მოადგილემ, ინგა შამილიშვილმა აუდიტორიას 97 წლის წინ განვითარებული მოვლენები შეახსენეს და ფილმის მნიშვნელობაზე ისაუბრეს.
კინოჩვენება სტუდენტთა მხარდაჭერისა და მომსახურების სამსახურისა და სტუდენტთა სამეცნიერო ცენტრის ორგანიზებით გაიმართა და მას სტუდენტებთან ერთად პროფესორ-მასწავლებლებიც ესწრებოდნენ. ფილმის დასასრულს დისკუსია გაიმართა.