ბათუმის შოთა რუსთაველის სახელმწიფო უნივერსიტეტში ,,Erasmus+”-ის ეროვნული ოფისის ხელმძღვანელმა საქართველოში მარიამ სულაშვილმა, ოფისის წევრებმა და ევროკავშირის „Erasmus+-ის პროგრამაში საქართველოს მონაწილეობის მიზანშეწონილობის კვლევის“ წარმომადგენლებმა - სებასტიან შვაიცერმა, ისრაელ პერალტმა და ნინა გოგოლაძემ ბათუმში მოქმედ საგანმანათლებლო დაწესებულებებს ,,Erasmus+“-ის პროგრამისა და მისი დაფინანსების შესაძლებლობები გააცნეს. საინფორმაციო შეხვედრის ფარგლებში, ჩატარდა ვორქშოფები, რომელიც მოიცავდა შემდეგ საგანმანათლებლო სექტორს: უმაღლესი განათლება, პროფესიული განათლება, ზრდასრულთა განათლება, ახალგაზრდობა, სპორტი და სკოლები.
რეგიონული შეხვედრების მიზანია მეტი ინფორმირებულობა, საზღვარგარეთ სწავლის ხელმისაწვდომობის გაზრდა და სხვადასხვა ინსტიტუციის გაცვლით პროგრამებში ჩართულობა.
საქართველო ,,Erasmus+“-ის პროგრამის პარტნიორი წევრია. იმისთვის, რომ ქვეყანა ასოცირებული წევრი გახდეს გაცვლითი პროგრამების მიმდინარეობას უცხოელი ექსპერტები დააკვირდებიან. პროექტი - “ერაზმუს+ პროგრამაში საქართველოს მონაწილეობის მიზანშეწონილობის კვლევა შესაძლებლობის განვითარებისათვის” ხორციელდება საქართველოში ევროკავშირის დელეგაციის ფინანსური მხარდაჭერითა და საქართველოს განათლებისა და მეცნიერების სამინისტროსთან თანამშრომლობით. პროექტის მიზანია საქართველოში ერაზმუს+ პროგრამის განხორციელების კვლევა და შესაძლებლობების განვითარება უმაღლესი, ზოგადი, პროფესიული განათლების, ზრდასრულთა განათლების, ახალგაზრდობისა და სპორტის სექტორებში.
| უკან |
