ბათუმის შოთა რუსთაველის სახელმწიფო უნივერსიტეტს აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, საქართველოს პარლამენტის ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის წარმომადგენელი შორენა ახალაია, ქართველთა და აფხაზთა ერთობის საზოგადოება „ერთობა ხვალისთვის“ თავმჯდომარე გიორგი შერვაშიძე, მინისტრის მრჩეველი სალომე დოლიძე და დევნილთა მომსახურების სააგენტოს უფროსი ავთანდილ ქარაია ეწვივნენ. სტუმრები ბსუ-ს რექტორს, ტიტე აროშიძეს შეხვდნენ.
შეხვედრაზე ძირითადი ყურადღება გამახვილდა ბსუ-ში აფხაზური კვლევების ცენტრის გახსნის საკითხზე. ცენტრის მიზანი იქნება სამშვიდობო პოლიტიკის გააქტიურებაში, ახალგაზრდების ინიციატივების განხორციელების ხელშეწყობა და აფხაზ თანატოლებთან კომუნიკაციების დამყარების გზების მოძიება. რექტორმა ხაზი გაუსვა აფხაზური კვლევების ცენტრის გახსნის მნიშვნელობას, რომელიც გახდება აქტიური პლატფორმა ახალგაზრდების დაახლოების პროცესში.
შეხვედრას ესწრებოდნენ პროფესორები, რომლებიც აჭარაში მცხოვრებ აფხაზთა გადმოსახლების, დამკვიდრებისა და ცხოვრების ისტორიას სწავლობენ. მეცნიერებმა სტუმრებს გადასცეს მათი ნაშრომი „აფხაზები აჭარაში - წარსული და თანამედროვეობა“, რომელშიც კომპლექსურადაა შესწავლილი აფხაზთა ისტორია აჭარაში. შეხვედრას ასევე ესწრებოდნენ ბსუ-ს რექტორის მოადგილე მერაბ ხალვაში და სტუდენტთა კარიერული განვითარების, სპორტისა და კულტურის დეპარტამენტის უფროსი, ლევან ტარიელაძე.
ვიზიტის ფარგლებში, აფხაზეთის ავტონომიური რესპუბლიკის იძულებით გადაადგილებულ პირთა სამინისტროს წარმომადგენლებმა სასტუმრო ,,ლე მერიდიენში“ აჭარაში მცხოვრებ აფხაზებთან შეხვედრა გამართეს. ღონისძიებაში მონაწილება მიიღო ბსუ-ს რექტორმა ტიტე აროშიძემ, რომელმაც გამოსვლაში ქართულ-აფხაზურ ურთიერთობებზე ისაუბრა და მადლობა გადაუხადა იმ პირებს, რომლებმაც განსაკუთრებული წვლილი შეიტანეს ქართულ-აფხაზური ურთიერთობების განვითარებაში.
| უკან |
