ცნობილი მეცნიერის, ფიზიკოსისა და საზოგადო მოღვაწის ხუსეინ ხალვაშის 100 წლის იუბილის აღსანიშნავად ბათუმის შოთა რუსთაველის სახელმწიფო უნივერსიტეტის ინიციატივით, ბათუმის მერიისა და საკრებულოს ხელშეწყობით, მემორიალური დაფა გაიხსნა. ღვაწლმოსილი მკვლევარი წლების განმავლობაში უნივერსიტეტში სამეცნიერო-პედაგოგიურ საქმიანობას ეწეოდა. ხუსეინ ხალვაშმა უმაღლეს სასწავლებელში ფიზიკის კათედრა დაარსა, რომელსაც 23 წლის განმავლობაში ხელმძღვანელობდა. უნივერსიტეტში გახსნილია ხუსეინ ხალვაშის სახელობის აუდიტორია და დაწესებულია სახელობითი სტიპენდია. ხუსეინ ხალვაშის ხელმძღვანელობით შეიქმნა მექანიკის, მოლეკულური ფიზიკის, ელექტროობა და მაგნეტიზმის, ოპტიკის, ელექტრო–რადიოტექნიკის, ფიზიკის მეთოდიკის, ასტრონომიის კაბინეტ-ლაბორატორიები. იგი მსოფლიო მნიშვნელობის დაკვირვებას ახდენდა თანამგზავრების მოძრაობაზე მის მიერვე შექმნილი ვიზუალური სადგურით. მის კალამს ეკუთვნის მონოგრაფია, ასამდე სამეცნიერო ნაშრომი და დამხმარე სახელმძღვანელოები. ხუსეინ ხალვაში აჭარიდან პირველი ახალგაზრდა იყო რომელმაც ფიზიკა-მათემატიკის ფაკულტეტი დაამთავრა, გახდა ფიზიკა-მათემატიკის მეცნიერებათა კანდიდატი. ინსტიტუტის სამეცნიერო საბჭომ მას მიანიჭა პროფესორის სამეცნიერო წოდება.
| უკან |
