ბათუმის შოთა რუსთაველის სახელმწიფო უნივერსიტეტში ევროპელ მედიკოს სტუდენტთა ასოციაციის წარდგენა გაიმართა. საბუნებისმეტყველო მეცნიერებათა და ჯანდცვის ფაკულტეტის დეკანმა მარინა ქორიძემ, ორგანიზაციის კოორდინატორებმა, მედიცინის სპეციალობის სტუდენტებმა დავით ქობულაძემ და მეგი ინაიშვილიმა შეხვედრაზე ევროპელ მედიკოს სტუდენტთა ასოციაციის მნიშვნელობასა და პრიორიტეტებზე ისაუბრეს. ორგანიზაცია საშუალებას მისცემს საბუნებისმეტყველო მეცნიერებათა და ჯანდაცვის ფაკულტეტის სტუდენტებს აქტიურად ჩაერთონ სამედიცინო სფეროს საქმიანობაში და მონაწილეობა მიიღონ გაცვლით პროგრამებში.

კამპანია „უნივერსიტეტი-სკოლა“ ფარგლებში ბიოლოგიის I კურსის სტუდენტებმა ჭარნალის საჯარო სკოლის, სკოლა „გორდას“, ბათუმის მე–2 და მე–7 საჯარო სკოლის მოსწავლეებისათვის სამოდელო პრაქტიკული მეცადინეობა ჩაატარეს თემაზე: „ცხოვრების ჯანსაღი წესი“ (სასწავლო კურსი „ბიოლოგიის შესავალი“, ხელმძღვანელები: პროფესორი მარინა ქორიძე, ასოცირებული პროფესორი მარინა ნაგერვაძე). სტუდენტებმა თემატური ვიდეო რგოლების, პოსტერების, პრეზენტაციებისა და სხვადასხვა ტიპის აქტივობების საშუალებით ცხოვრების ჯანსაღი ცხოვრების წესის მნიშვნელობაზე ისაუბრეს. ღონისძიების ფარგლებში მოსწავლეები უნივერსიტეტის ინფრასტრუქტურას გაეცნენ.

ბათუმის სკოლის „ევრო 2000“-ის მოსწავლეებს ბათუმის შოთა რუსთაველის სახელმწიფო უნივერსიტეტში ასოცირებულმა პროფესორმა ლალი ჟღენტმა ღია ლექციაზე წაუკითხა თემაზე: „ბიოლოგია-სიცოცხლის შემსწავლელი მეცნიერება“. ლექციის დასრულების შემდეგ გაიმართა დისკუსია ბიოლოგიის აქტუალურ საკითხებზე. ღონისძიების ფარგლებში მოსწავლეები უნივერსიტეტის ინფასტრუქტურას, დაათვალიერეს ბოტანიკის, ზოოლოგიის, ანატომიის კაბინეტები, იმუნოგენეტიკის, ბიოტექნოლოგიის და ფარმაკოგნოზიის ლაბორატორიები. მოსწავლეებს საშუალება მიეცათ ერთმანეთისთვის დაედგინათ სისხლის ჯგუფი და განესაზღვრათ რეზუს ფაქტორი.

ბათუმის შოთა რუსთაველის სახელმწიფო უნივერსიტეტის ქიმიის დეპარტამენტში სადოქტორო საგანმანათლებლო პროგრამის „ბიოორგანული ქიმიის“ განმახორციელებელი აკადემიური პერსონალის, დამსაქმებლების, კურსდამთავრებულებისა და სტუდენტების შეხვედრა გაიმართა. პროგრამის ხელმძღვანელმა ასოცირებულმა პროფესორმა მაია ვანიძემ შეხვედრაზე მოხსენება წაიკითხა პროგრამაში აკრედიტაციის ექსპერტთა რეკომენდაციების გათვალისწინებით განხორციელებული ცვლილებების შესახებ. ღონისძიების ფარგლებში ჩატარდა ანკეტური გამოკითხვა და დამსაქმებლებმა რეკომენდაციები წარმოადგინეს. შეხვედრის მონაწილეებმა იმსჯელეს პროგრამის ძლიერ და სუსტ მხარეებზე და ისაუბრეს განვითარების გეგმებზე.

ბათუმის შოთა რუსთაველის სახელმწიფო უნივერსიტეტში გერმანიის ზაარლანდის უნივერსიტეტის ბიოორგანული ქიმიის ინსტიტუტის სადოქტორო პროგრამის დოქტორანტი თამარ საადი იმყოფება. თამარი კვლევას ბსუ-ს დასავლეთ საქართველოს რეგიონალური ქრომატოგრაფიული ცენტრის ბაზაზე ახორციელებს. იგი ბსუ-ში ERASMUS+ გაცვლითი პროგრამით, საბუნებისმეტყველო მეცნიერებათა და ჯანდაცვის ფაკულტეტის ბიოორგანული ქიმიის სადოქტორო პროგრამის ფარგლებში იმყოფება.