ბათუმის შოთა რუსთაველის სახელმწიფო უნივერსიტეტში, 2025 წლის 4-5 აპრილს, ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტისა და ჟურნალ „შავი ზღვის“ სარედაქციო საბჭოს ორგანიზებით, გაიხსნა მეოთხე საერთაშორისო სიმპოზიუმი სოციალურ მეცნიერებებში. იგი მიზნად ისახავდა სხვადასხვა დარგში არსებული ტენდენციებისა და გამოწვევების წარმოჩენას და მათ ირგვლივ სამეცნიერო დისკუსიის გაშლას.

რელიგიის მუზეუმში ბსუ-ს ნიკო ბერძენიშვილის ინსტიტუტის მეცნიერ-თანამშრომელმა, ისტორიის აკადემიურმა დოქტორმა ტარიელ ებრალიძემ, წმ. დემეტრე თავდადებულის ხსენების დღესთან დაკავშირებით, საჯარო ლექცია ჩაატარა თემაზე „დემეტრე თავდადებულის გმირობა“. ლექციას ესწრებოდნენ სამედიცინო აკადემიის - ფარმაციის ფაკულტეტის სტუდენტები და ორგანიზაცია: ვეტერან ქალთა კავშირის - „ღიმილის ქალბატონების“ წევრები.

მიმდინარე წლის 15-18 თებერვალს ბსუ-ს ნიკო ბერძენიშვილის ინსტიტუტის დირექტორი როინ მალაყმაძე საქართველოს სამთავრობო დელეგაციასთან ერთად თურქეთის რესპუბლიკაში იმყოფებოდა. ოფიციალურმა პირებმა ქალაქ სამსუნში ქართული კულტურის საზოგადოების გახსნის ღონისძიებაში მიიღეს მონაწილეობა. ასევე, შეხვედრები გაიმართა რეგიონის გუბერნიის წარმომადგენლებთან, ქართველებით დასახლებული ქალაქების (უნიე, ფაცა, ჩარშამბა, ორდუ) მაცხოვრებლებთან, ქართველ მუჰაჯირთა შთამომავლებთან.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის ისტორიისა და არქეოლოგიის განყოფილების მთავარმა მეცნიერ თანამშრომელმა ოლეგ ჯიბაშვილმა და ბსუ ჰუმანიტარულ მეცნიერებათა ფაკულტეტის ისტორიის, არქეოლოგიისა და ეთნოლოგიის დეპარტამენტის ასოცირებულმა პროფესორებმა: ხათუნა დიასამიძემ და ირაკლი ბარამიძემ ბათუმის №2 საჯარო სკოლის მე-4 კლასის მოსწავლეებთან დავით აღმაშენებლის ხსენების დღესთან დაკავშირებით სასწავლო-შემეცნებითი ღონისძიება ჩაატარეს.

ნიკო ბერძენიშვილის ინსტიტუტის მკვლევართა გუნდი აქტიურად მუშაობს ფუნდამენტური კვლევების მიმართულებით, რომლის ფარგლებშიც გასულ 2024 წელს რამდენიმე კრებული და მონოგრაფია მომზადდა. უცხოეთში არსებული ქართული კულტურული მემკვიდრეობის კვლევების მიმართულებით, გამოიცა კრებულის „წერილები სტამბოლის ქართული სავანიდან“ მესამე ნაწილი. ნაშრომში წარმოდგენილია თურქეთის ქალაქ სტამბოლში, ქართველ კათოლიკეთა ეკლესია-მონასტრის ბიბლიოთეკასა და არქივში დაცული ქართული კულტურული მემკვიდრეობის ნიმუშები, მათ შორის, ქართველ ლეგიონერთა საქმიანობის ამსახველი საარქივო მასალები, მემუარული ჩანაწერები, ოფიციალური თუ კერძო მიმოწერის ბარათები, სავანის „შთაბეჭდილებათა წიგნი“ და ა. შ.