2020 წლის 21 მაისს, 12.00 საათზე, ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტი ევროსაბჭოს პროექტის „დისკრიმინაციის, სიძულვილით მოტივირებული დანაშაულისა და სიძულვილის ენის წინააღმდეგ ბრძოლა საქართველოში“ ფარგლებში ატარებს სტუდენტთა ონლაინ სამეცნიერო კონფერენციას თემაზე: „ჰარმონიული თანაცხოვრება მრავალფეროვან გარემოში“.

ბათუმის შოთა რუსთაველის სახელმწიფო უნივერისტეტი ღრმა მწუხარებას გამოთქვამს ფიზიკის დეპარტამენტის ლექტორის ბატონი შოთა ბოლქვაძის გარდაცვალების გამო.
შოთა ბოლქვაძე დაიბადა 1946 წლის 23 ოქტომბერს, 1969 წელს დაასრულა ბათუმის შოთა რუსთაველის სახელობის სახელმწიფო პედაგოგიური უნივერსიტეტის ფიზიკის სპეციალობა და მუშაობა დაიწყო ამავე უნივერსიტეტის ფიზიკის კათედრის მასწავლებლად. ბატონი შოთა უკანასკნელ პერიოდამდე იყო ფიზიკის დეპარტამეტის უფროსი მასწავლებელი და უძღვებოდა ლექციების კურსს: ასტრონომია, ასტროფიზიკის საფუძვლები, აგროფიზიკა და ა.შ. მის სახელს უკავშირდება 10-მდე სამეცნიერო შრომა და ორი სამეცნიერო გამოგონება. მნიშვნელოვანია შოთა ბოლქვაძის წვლილი ფიზიკის ლაბორატორიების სრულყოფაში, მისი ინიციატივით შეძენილი ხელსაწყოები კვლავაც ფუნქციონირებს და ეხმარება სტუდენტებს პრაქტიკული უნარების გამომუშავებაში. მისი სახელი დამსახურებულად დაიმკვიდრებს ადგილს ბსუ-ს ისტორიის ფურცლებზე.

8-12 ივლის, ბათუმის შოთა რუსთველის სახელმწიფო უნივერსიტეტში საზაფხულო სკოლა „თანამედროვე მიდგომები განათლების დარგში“ გაიმართება. ტრენერები როის ჯეფერსონ ჯორჯი და დავით დარსაველიძე მსმენელებს გააცნობენ განათლების დარგის კვლევების თანამედროვე მეთოდოლოგიას. საზაფხულო სკოლის მუშაობაში ბათუმის შოთა რუსთველის სახელმწიფო უნივერსიტეტის, ივანე ჯავახიშვილის სახელობის თბილისის სახელმწიფო უნივერსიტეტის, ქუთაისის აკაკი წერეთლის სახელმწიფო უნივერსიტეტის დოქტორანტები და განათლების დარგის კვლევებით დაინტერესებული პირები. საზაფხულო სკოლა თსუ-ს სტუდენტური პროექტის ფარგლებში ტარდება.

გარდაიცვალა ბათუმის შოთა რუსთაველის სახელმწიფო უნივერსიტეტის ემერიტუს-პროფესორი ჯემალ ბერიძე. ღვაწლმოსილმა პროფესორმა მნიშვნელოვანი წვლილი შეიტანა უნივერსიტეტის განვითარებასა და მომავალი თაობების აღზრდაში. ღვაწლმოსილ მეცნიერს გამოქვეყნებული აქვს 100-მდე სამეცნიერო ნაშრომი და ორი მონოგრაფია. მის სახელს უკავშირდება ფიზიკის მიმართულებით მნიშვნელოვანი სამეცნიერო კვლევების წარმოება, უნივერსიტეტში გაბნევ გარემოთა ოპტიკის ლაბორატორიის გახსნა და ასპირანტურის განყოფილება დაარსება. პროფესორ ჯემალ ბერიძის ორგანიზებით დაიწყო სამეცნიერო შრომების გამოცემა, იგი იყო საბუნებისმეტყველო მიმართულებით გამოქვეყნებული 4 ტომის რედაქტორი.

გარდაიცვალა ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის მათემატიკის დეპარტამენტის ღვაწლმოსილი მათემატიკოსი ვლადიმერ ხალვაში. ბატონმა ვლადიმერ ხალვაშმა მნიშვნელოვანი წვლილი შეიტანა მომავალი თაობების აღზრდასა და მათემატიკის სკოლის განვითარებაში. იგი პარალელურად ეწეოდა ნაყოფიერ სამეცნიერო-კვლევით მუშაობას, იკვლევდა რიცხვთა თეორიას, განსაკუთრებულ ყურადღებას აქცევდა ერთ მაგიურ კვადრატს, რომელიც შედგება მხოლოდ მარტივი რიცხვებისაგან და უკავშირდება წმინდა ნინოს სახელს. ვლადიმერ ხალვაში არის რამდენიმე ათეული სამეცნიერო სტატიისა და თერთმეტი მონოგრაფიის ავტორი.