5 მაისს, 15:00 საათზე ბათუმის შოთა რუსთველის სახელმწიფო უნივერსიტეტის სტუდენტური საცხოვრებელი გაიხსნება. თანამედროვე სტანდარტების 200 მობინადრეზე გათვლილი სტუდენტთა საცხოვრებელი ბათუმში, ლეონიძის ქ. #15-ში მდებარეობს.
სტუდენტთა ახალი, ოთხსართულიანი საცხოვრებელი სრულად შეესაბამება თანამედროვე სტანდარტების მოთხოვნებს. შენობა ძირითადად 2 სტუდენტზე გათვლილი ბლოკური პრინციპის კონსტრუქციით არის აგებული და უზრუნველყოფილია დამოუკიდებელი სველი წერტილებითა და სამზარეულოთი. სტუდენტურ საცხოვრებელში განთავსებულია საკონფერენციო დარბაზი, თავისუფალი სივრცეები, ბიბლიოთეკა, ლიფტი, დაცვის ოთახი, სამრეცხაო-საშრობი და ა.შ. სპეციალური საჭიროების პირთათვის გათვალისწინებულია ადაპტირებული ბლოკები.
მშენებლობისათვის უნივერსიტეტის ბიუჯეტიდან 2 მილიონ 359 ათასი ლარი იყო გამოყოფილი, საიდანაც ნაწილი აჭარის ავტონომიური რესპუბლიკის ბიუჯეტიდან პროგრამული დაფინანსებით ჩაირიცხა.
სტუდენტთა ძველი საერთო საცხოვრებელი გაიხსნა მე-20 საუკუნის 50-60-იან წლებში, იყო არასტანდარტული ამორტიზირებული, მოძველებული ინფრასტრუქტურის შენობა, საერთო სარგებლობის სანიტარული კვანძებით, წყალმომარაგებისა და გაზმომარაგების არაცენტრალიზირებული სისტემით.
| უკან |
