ბსუ-ს ქიმიის დეპარტამენტმა აბაშის მუნიციპალიტეტის კეთილარის საჯარო სკოლის მოსწავლეებს უმასპინძლა. სტუმრებს ქიმიის სამივე საფეხურის საგანმანათლებლო პროგრამების და საერთოდ სტემ განათლების პოპულარიზაციის მიზნით ესაუბრა ქიმიის დეპარტამენტის ხელმძღვანელი, ასოცირებული პროფესორი მაია ვანიძე, ხოლო მოწვეულმა პედაგოგებმა მაია ხარაძემ და ნონა აბაშიძემ აჩვენეს სახალისო ცდები. სასკოლო კვლევების ფარგლებში დოქტორმა მერი ხახუტაიშვილმა მოსწავლეების ჩართულობით ჩაატარა სხვადასხვა ლოკაციიდან აღებული წყლის ნიმუშების ანალიზი. აგრეთვე მოსწავლეები ეწვივნენ დასავლეთ საქართველოს რეგიონულ ქრომატოგრაფიულ ცენტრს, სადაც პროფესორი ალეკო კალანდია სტუმრებს ესაუბრა ცენტრში მიმდინარე კვლევებზე, ხოლო დოქტორმა მაია ხარაძემ გააცნო რეფრაქტომეტრის მუშაობის პრიციპები და ჩაატარა რამოდენიმე ნიმუშის კვლევა მოსწავლეთა მონაწილეობით.

ბათუმის შოთა რუსთაველის სახელმწიფო უნივერსიტეტში სისხლის დონაციის აქცია გაიმართა. აქციაში მონაწილეობა მიიღეს დიპლომირებული მედიკოსის ერთსაფეხურიანი ინგლისურენოვანი საგანმანათლებლო პროგრამის სტუდენტებმა. ღონისძიება მიზნად ისახავდა უანგარო დონორობის დამკვიდრებასა და პოპულარიზაციას. სისხლის ბანკის შესავსებად, ბსუ-ში რამდენიმე წელია ეტაპობრივად იმართება უანგარო დონორთა აქცია. ღონისძიება ბსუ-ს საბუნებისმეტყველო მეცნიერებათა და ჯანდაცვის ფაკულტეტისა და სისხლის ბანკის ორგანიზებით მოეწყო.

28-31 მარტს თბილისში ჩატარდა მოსწავლეთ საერთაშორისო გუნდური შეჯიბრება ქიმიაში. International Chemistry Competition „Golden Fleece 2024" ტურნირში „ოქროს საწმისი“ ერთმანეთს ეჯიბრებოდნენ საქართველოსა და სხვა ქვეყნების მოსწავლეები. ბათუმიდან შეჯიბრებაში მონაწილეობა მიიღო ბათუმის წმინდა ანდრია პირველწოდებულის სახელობის სკოლის გუნდმა ბათუმის შოთა რუსთაველის სახელმწიფო უნივერსიტეტის ბუნებრივ ნაერთთა სადოქტორო პროგრამის დოქტორანტის, ნონა აბაშიძის მენტორობით. გუნდმა მეორე საპრიზო ადგილი და ვერცხლის მედალი მოიპოვა. ბსუ ულოცავს მოსწავლეებს გამარჯვებას და უსურვებს წარმატებებს.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ბიოლოგიისა და ეკოლოგიის სტუდენტებმა პროფესორ-მასწავლებლებთან ერთად, მონაწილეობა მიიღეს ბათუმის ბოტანიკურ ბაღშის შემეცნებითი და საველე პრაქტიკული ღონისძიებაში. დარგეს ხემცენარეების, Jacaranda mimosifolia-ის ნერგები. ბოტანიკური ბაღის სამხრეთ ამერიკული ფიტოგეორაფიული განყოფილების კურატორმა ლანა კოდანოვმა სტუდენტებს გააცნო ბოტანიკური ბაღის როლი სახეობათა კონსერვაციაში.

ბსუ-ს დიპლომირებული მედიკოსის ინგლისურენოვანი პროგრამის სტუდენტებმა ქართველ სტუდენტებთან ერთად ჰოლის, ფერების ფესტივალი აღნიშნეს. უნივერსიტეტის ეზოში ფერად სარებში გამოწყობილმა ახალგაზრდებმა ეროვნული ცეკვები შეასრულეს. ჰოლი პოპულარული უძველესი ინდუისტური ფესტივალია, ცნობილია, როგორც ინდური „გაზაფხულის ფესტივალი“, „ფერების ფესტივალი” და „სიყვარულის ფესტივალი,”რომელიც სიკეთის ბოროტებაზე გამარჯვებას ნიშნავს.