ეკონომიკისა და ბიზნესის ფაკულტეტს საქმიანი ვიზიტით „პროკრედიტ ბანკის“ დირექტორი ალექსი მატუა, ბათუმის ფილიალის მმართველი ბექა ბიბილაშვილი და ბიზნეს კლიენტთა მრჩეველი ზურაბ ორაგველიძე ეწვივნენ. ფაკულტეტის ადმინისტრაციასთან გამართული შეხვედრა მიზნად ისახავდა უახლოეს მომავალში ეკონომიკისა და ბიზნესის ფაკულტეტსა და გერმანულ ბანკს შორის თანამშრომლობის მემორანდუმის გაფორმებასა და სტრატეგიული ურთიერთობების ჩამოყალიბებას. ვიზიტი ასევე ითვალისწინებდა ერთობლივი ტრენინგების ორგანიზების, საჯარო ლექციების ჩატარებას, გამოცდილების გაზიარებას, სტუდენტთა სტაჟირებისა და დასაქმების პროგრამის განხორციელებას.

საქართველოს პარლამენტის ევროპასთან ინტეგრაციის კომიტეტის თავმჯდომარე თამარ ხულორდავა და ევროპარლამენტარები, ევროპარლამენტში საქართველოს მეგობრობის ჯგუფის წევრები: ქლერ მუდი, მიჰაილ გალერი და რომან სტრასერი ბათუმის შოთა რუსთაველის სახელმწიფო უნივერსიტეტის სტუდენტებს შეხვდნენ. ევროპის დღეების ფარგლებში გამართული ვიზიტი მიზნად ისახავდა ისეთი აქტუალური საკითხების განხილვას, როგორიცაა საქართველოს საგარეო პრიორიტეტები და ევროპასთან ინტეგრაციის პროცესი.

ბათუმის შოთა რუსთაველის სახელმწიფო უნივერსიტეტის სტუდენტებმა მონაწილეობა მიიღეს სტუდენტურ კონკურსში - „სტუდენტები სოციალური მეწარმეობის მხარდასაჭერად“, რომელიც ევროკავშირის დაფინანსებითა და საქართველოს პრეზიდენტის მხარდაჭერით იმართება. კონკურსში საქართველოს მასშტაბით კონკურსში დარეგისტრირებული იყო 100 გუნდი (400 სტუდენტი), რომელთაგან ბსუ-ს სტუდენტებით დაკომპლექტებული იყო ორი ნაკრები: „კრეატივი“ (დავით ბალაძე - კაპიტანი, თემურ ირემაძე, მართა ბალაძე, ამირან აბაშიძე) და „შხარა“ (ნინო ბასილაძე - კაპიტანი, მაგდა აბულაძე, შორენა აბუსელიძე, გიორგი ართმელაძე). ორივე გუნდმა წარმატებით იასპარეზა სამ ეტაპზე და მონაწილეობას მიიღებს 8 მაისს, თბილისში დაგეგმილ ნახევარფინალში.

ეკონომიკისა და ბიზნესის ფაკულტეტის ბაკალავრიატისა და მაგისტრატურის დამამთავრებელი კურსის სტუდენტებისათვის „საქართველოს ბანკის“ ანაზღაურებადი სტაჟირების პროგრამის წარდგინება გაიმართა. ახალგაზრდებს შესაძლებლობა ეძლევათ, დასაქმების პერსპექტივით ანაზღაურებადი ექვსთვიანი სტაჟირება გაიარონ „საქართველოს ბანკის“ ბათუმის ფილიალში. პროექტის მიზანია ფუნქციური ცოდნის, სწორი მიდგომების, სიახლეების ათვისების უნარისა და პოტენციალის მქონე ტალანტების მოზიდვა და განვითარება. ინტენსიური და მრავალმხრივი განვითარების პროგრამა მოიცავს პრაქტიკულ დავალებებს, დისკუსიებს და გუნდურ სამუშაოებს.

საქართველოს სოფლის მეურნეობის მეცნიერებათა აკადემიის აკადემიკოსმა, პროფესორმა პაატა კოღუაშვილმა ბათუმის შოთა რუსთაველის სახელმწიფო უნივერსიტეტში ღია ლექცია წაიკითხა თემაზე: „საქართველოს სოფლის მეურნეობა - ტენდენციები, გამოწვევები, პერსპექტივები“. მომხსენებელმა ეკონომიკისა და ბიზნესის ფაკულტეტის სტუდენტებს არსებული სიახლეები და განვითარების შესაძლებლობები გააცნო. ღონისძიება ეკონომიკისა და ბიზნესის ფაკულტეტთან არსებული სტუდენტური კვლევების და პროექტების ცენტრის „ახალი ხედვის“ ორგანიზებით გაიმართა.