უკრაინის ქალაქ პოლტავაში ვაჭრობისა და ეკონომიკის უნივერსიტეტეტში გაიმართა მენეჯმენტის კათედრის 20 წლის იუბილესადმი მიძღვნილი საერთაშორისო-სამეცნიერო პრაქტიკული კონფერენცია თემაზე: „სოციალურ-ეკონომიკური განვითარების სისტემების მენეჯმენტი ახალ ეკონომიკაში“. კონფერენციაზე ეკონომიკისა და ბიზნესის ფაკულტეტის ბიზნესის ადმინისტრირების დეპარტამენტის ხელმძღვანელმა, ასოცირებულმა პროფესორმა ბადრი გეჩბაიამ პლენარულ სხდომაზე მოხსენება წარადგინა თემაზე: „გადაწყვეტილებების მიღების პროცესები თანამედროვე მენეჯმენტში“. სამეცნიერო სესიის ფარგლებში ასოცირებულმა პროფესორმა ბადრი გეჩბაიამ მენეჯმენტის სპეციალობის სტუდენტებისათვის საჯარო ლექცია წაიკითხა თემაზე: „ბიზნესის ქსელური ორგანიზაცია: კლასტერული მენეჯმენტი და მათი ინტეგრაციული პროცესები“.

ეკონომიკისა და ბიზნესის ფაკულტეტის მოწვეულმა მასწავლებელმა, დოქტორანტმა ჯემალ ანანიძემ საჯარო ლექცია წაიკითხა თემაზე: „პირდაპირი უცხოური ინვესტიციები და საქართველოს მაკროეკონომიკური დინამიკა“. მომხსენებელმა სტუდენტებსა და პროფესორ-მასწავლებლებს გააცნო ინვესტიციების მაკროეკონომიკური როლი, ადგილობრივი და უცხოური ინვესტიციების გავლენა საგარეო ეკონომიკურ პროცესებზე და უცხოური სავალუტო რეზერვების ფორმირებაზე, უცხოური ინვესტიციები საქართველოში დარგებისა და ინვესტორი ქვეყნების მიხედვით. მომხსენებელმა ასევე განიხილა უცხოელთა მიერ განხორციელებული რეინვესტიციის ტენდენცია, მისი ეკონომიკური მნიშვნელობა, ინვესტიციების წმინდა და საერთო ნაკადების მოძრაობა, ბოლო წლების მიხედვით უცხოური ინვესტიციებისა და საქართველოს ეკონომიკის ზრდა და შეაფასა ურთიერთგავლენის შეფასება.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის პროფესორებმა მონაწილეობა მიიღეს ქალაქ ბაქოში გამართულ ჰეიდარ ალიევის დაბადებიდან 92 წლისადმი მიძღვნილ საერთაშორისო სამეცნიერო-პრაქტიკულ კონფერენციაში - ”ინვესტიციების ეკონომიკური ეფექტიანობა და პოლიტიკური მნიშვნელობა”. პროფესორმა გელა მამულაძემ პროფესორმა ასიე ცინცაძემ, ასოცირებულმა პროფესორმა გიორგი აბუსელიძემ ასოცირებულმა პროფესორმა ლელა ონიანმა და ასისტენტ-პროფესორმა რამინ ცინარიძემ ხუთდღიან საერთაშორისო სესიაზე მოხსენებები წარადგინეს ეკონომიკის აქტუალურ საკითხებზე. კონფერენციის დასასრულს დაიგეგმა ბათუმის შოთა რუსთაველის სახელმწიფო უნივერსიტეტისა და ბაქოს ბიზნესის უნივერსიტეტის ერთობლივი პროექტების განხორციელება.

ბათუმის შოთა რუსთაველის სახელმწიფო უნივერსიტეტის მენეჯმენტის სპეციალობის მე-IV კურსის სტუდენტი აჩიკო დიასამიძე კრივში აჭარის ჩემპიონი გახდა. მუხრან ვახტანგაძის სახელობის ღია პირველობა კრივში სხვადასხვა წონით კატეგორიაში ჩატარდა და მასში 80-მდე სპორტსმენი მონაწილეობდა. ფინალში აჩიკო დიასამიძემ 70კგ. წონით კატეგორიაში ნიკოლოზ აბუსერიძე დაამარცხა. ბათუმის შოთა რუსთაველის სახელმწიფო უნივერსიტეტი ულოცავს აჩიკო დიასამიძეს გამარჯვებას და წარმატებებს უსურვებს.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის დეკანმა, პროფესორმა ვლადიმერ ღლონტმა და საქართველოს პროფესიული განვითარების ცენტრის ხელმძღვანელმა დიანა ვაშაყმაძემ (GPDC) თანამშრომლობის მემორანდუმს მოაწერეს ხელი. ხელშეკრულება ითვალისწინებს ერთობლივი პროექტებისა და პროგრამების განხორციელებას. მემორანდუმის ფარგლებში ეკონომიკისა და ბიზნესის საგანმანათლებლო პროგრამების სტუდენტები სტაჟირებას გაივლიან ცენტრის ბაზაზე და ეტაპობრივად ჩაუტარდებათ ტრენინგები.