განათლების ყველა საფეხურზე, ტრადიციული საგნების სწავლებასთან ერთად, განსაკუთრებული ყურადღება უნდა მიექცეს სწავლებაში გლობალური უნარების ინტეგრირებას. მიზანი თანმიმდევრულია: ისეთი თაობების აღზრდა, რომლებიც აღჭურვილია ინოვაციური და კრიტიკული აზროვნებით.  თანამედროვე, სწრაფად განვითარებად  სამყაროში  საჭირო გახდა ახალი უნარების შეძენა მომავალი თაობების მოთხოვნების დასაკმაყოფილებლად და მდგრადი განვითარებადი ქვეყნის უზრუნველსაყოფად,  სადაც აღარ არის სიღარიბე, უთანასწორობა, გაუნათლებლობა და თანაგრძნობის ნაკლებობა.  მოსწავლეებში კრიტიკული უნარების გამომუშავება თანამედროვე განათლების სისტემის ერთ-ერთი უმნიშვნელოვანესი გამოწვევაა. ტექნოლოგიების ინტეგრაცია ქმნის დინამიურ და ინტერაქტიულ საკლასო გამოცდილებას, რომელიც ასტიმულირებს კრიტიკულ აზროვნებას, პრობლემის გადაჭრისა და გადაწყვეტილების მიღების უნარს. კვლევის მიზანია ქართულ კონტექსტში ციფრული ტექნოლოგიების გამოყენებით მოსწავლეებში კრიტიკული აზროვნების უნარის გამომუშავების ხელშემწყობი მექანიზმების შეფასება. ნაშრომში წარმოდგენილია ორ ეტაპად ჩატარებული პრაქტიკული კვლევების ყოვლისმომცველი ანალიზი: დიაგნოსტიკის ეტაპი და თერაპიის სტადია. ინტერვენციის განსახორციელებლად, გადავწყვიტეთ გამოგვეყენებინა Double Diamond-ის  მიდგომა, რათა მოსწავლეები აქტიურად ჩაერთონ დისკუსიაში და შეძლონ პრობლემის გადაჭრის გზების ძიება. მთავარი დასკვნა ის არის, რომ ამ მეთოდებმა გააძლიერა სტუდენტების თანამშრომლობა, კრიტიკული აზროვნება და ციფრული უნარები. ციფრული ხელსაწყოების და ურთიერთდაკავშირებული სასწავლო სივრცეების გამოყენება არა მხოლოდ ცოდნის გაზიარების კოორდინაციის საშუალებას იძლევა, არამედ აძლიერებს სწავლის გამოცდილებას და კომუნიკაციის უნარებს საკლასო ოთახებში.