მოხსენება ეხება ეთნოლოგიური ლექსიკონის შედგენის მეთოდოლოგიურ მიდგომებს. საქართველოში არსებული გამოცდილების საფუძველზე წარმოჩენილია ის გამოწვევები, რომლებიც თან ახლავს დასურათებული ეთნოლოგიური ლექსიკონის შედგენის პროცესს.
ლაზური ეთნოლოგიური დასურათებული ლექსიკონი, როგორც თემატურად, ისე არქიტექტონიკის კუთხით, განსაზღვრულ მეთოდურ პრინციპებზე დამყარებულ სტრუქტურას ეფუძნება და იმავდროულად ერთმანეთთან დაკავშირებულ სხვადასხვა მეთოდურ მიდგომასაც ითვალისწინებს, ისეთს, როგორიცაა ლიტერატურული წყაროების თანდართვით მოკლე სტატიების ანბანურ რიგზე დალაგება, ეთნოგრაფიული მოვლენის ვიზუალური და შინაარსობრივი თანხვედრა, ნივთის კონკრეტული მახასიათებლის ფოტო-ამონარიდის სახით წარმოჩენა.
ეთნოლოგიური ლექსიკონი სპეციფიკური ხასიათის ფუნდამენტური ნაშრომია, რომელიც დარგის მიღწევების ერთგვარ შეჯამებას ახდენს. მას სამეცნიერო ნარკვევის სახე აქვს და მისი ძირითადი აგებულება ტერმინის ეთნოგრაფიულ აღწერაზეა დაფუძნებული. ლექსიკონის ფუნდამენტურობა და თემატური მრავალფეროვნება მისი შედგენის მეთოდოლოგიურ მიდგომათა მრავალფეროვნებას განაპირობებს.
| უკან |
