ახალი ამბები

ფრანკოფონიის დღეები ბათუმის შოთა რუსთაველის სახელმწიფო უნივერსიტეტში ტრადიციულად რამდენიმე ღონისძიებით აღინიშნა. ბსუ-ს ჰუმანიტარულ მეცნიერებათა ფაკულტეტის ევროპეისტიკის დეპარტამენტის ორგანიზებით სტუდენტთა სამეცნიერო კონფერენცია გაიმართა თემაზე: ,,საფრანგეთის კულტურა და ცივილიზაცია“. ღონისძიების ფარგლებში ფრანგული ენის ტესტირება „Bonjour la France“ ჩატარდა. კონკურსში სტუდენტებთან ერთად აჭარის საჯარო და კერძო სკოლების მოსწავლეები მონაწილეობდნენ. კვირეულის ეგიდით კინოთეატრში ,,აპოლო“ ფრანგულენოვანი ფილმის ჩვენება შედგა. ფრანკოფონიის დღეების საზეიმო დახურვაზე ფრანგული ინსტიტუტის დირექტორმა ჟან-ივ ლავუარმა კონკურსში გამარჯვებულებს სერტიფიკატები და სამახსოვრო საჩუქრები გადასცა. კვირეული უნივერსიტეტის თეატრალური დასის სპექტაკლით ,,ნაფტალინი“ და ფოტოგამოფენით დასრულდა. ღონისძიება მიზნად ისახავდა ფრანგული ენის პოპულარიზაციას, საფრანგეთის კულტურის გაცნობასა და აბიტურიენტთა მოზიდვას.

აკადემიკოს ნიკო ბერძენიშვილის 120 წლისადმი მიძღვნილი სამეცნიერო სესია ჩატარდა ბათუმის შოთა რუსთაველის სახელმწიფო უნივერსიტეტში. უმაღლესი საგანმანათლებლო დაწესებულების ნიკო ბერძენიშვილის ინსტიტუტის მკვლევრებმა, ჰუმანიტარულ მეცნიერებათა ფაკულტეტის ისტორიის არქეოლოგიისა და ეთნოლოგიის დეპარტამენტის პროფესორ-მასწავლებლებმა და ბათუმის არქეოლოგიური მუზეუმის მეცნიერ-თანამშრომლებმა კონფერენციაზე მოხსენებები წარმოადგინეს ცნობილი ქართველი მეცნიერის ცხოვრებასა და სამეცნიერო მოღვაწეობაზე. მომხსენებლებმა ისაუბრეს აკადემიკოსის მის მიერ წარმოებული არქეოლოგიური გათხრების შედეგებზე, ჯავახეთის ექსპედიციის დღიურებზე, ისტორიული გეოგრაფიის, ადრეფეოდალური ხანის დასავლეთ საქართველოს ეკლესიისა და რუსეთ-საქართველოს ურთიერთობების პოლიტიკურ საკითხებზე.

უნივერსიტეტის სააქტო დარბაზში ტრენინგის - ,,სასწავლო-სააღმზრდელო პროგრამა საბავშვო ბაღებისთვის“ მონაწილე 397 აღმზრდელსა და 26 თავისუფალ მსმენელს სერტიფიკატები გადაეცა. მოკლევადიანი პროგრამა განათლების ფაკულტეტთან არსებულ პედაგოგთა დახელოვნებისა და პროფესიული გადამზადების ცენტრის მიერ ბათუმის შოთა რუსთაველის სახელმწიფო უნივერსიტეტსა და ბათუმის საბავშვო ბაღების გაერთიანებას შორის გაფორმებული ხელშეკრულების საფუძველზე განხორციელდა. პროგრამის ამოქმედებიდან დღემდე უნივერსიტეტის ბაზაზე სულ რეგიონის 700-მდე აღმზრდელი და თავისუფალი მსმენელია გადამზადებული. პროექტის მიზანია უწყვეტი განათლების პირველი რგოლის განვითარების ხელშეწყობა და თანამედროვე გამოცდილების გაზიარება.

ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის დირექტორის, ქიმიის მეცნიერებათა დოქტორ რაულ გოცირიძის 60 წლისადმი მიძღვნილი საიუბილეო სხდომა გაიმართა შოთა რუსთაველის დარბაზში. ბატონ რაულ გოცირიძეს მნიშვნელოვანი წვლილი მიუძღვის საქართველოში მემბრანული ტექნოლოგიების განვითარებაში. მკვლევარი ავტორია 74 სამეცნიერო ნაშრომისა და მონოგრაფიისა: „ადამიანის ყოფიერება და წყალი”. მეცნიერს მიღებული აქვს 11 საავტორო მოწმობა და 4 პატენტი.

ბათუმის შოთა რუსთაველის სახელმწიფო უნივერსიტეტში რექტორის არჩევნები გაიმართა. უნივერსიტეტის საარჩევნო კომისიის ოქმის საფუძველზე, ვერცერთმა კანდიდატმა აკადემიური საბჭოს სიითი შემადგენლობის უმრავლესობის - 5 ხმა ვერ დააგროვა, არ გამოვლინდა საუკეთესო შედეგების მქონე 2 კანდიდატი და შესაბამისად არ ჩატარდა მეორე ტური. აკადემიურმა საბჭომ მიიღო გადაწყვეტილება რექტორის განმეორებითი არჩევნების გამოცხადების შესახებ. საარჩევნო კომისიაში 8 კანდიდატი იყო დარეგისტრირებული: რამაზ ხალვაში, ირაკლი ბარამიძე, მალხაზ ნაკაშიძე, მანუჩარ ლორია, ბესიკ ბერიძე, ანთაზ ქიქავა, მარინა გიორგაძე, როსტომ ბერიძე. კენჭისყრაში მონაწილეობა მხოლოდ 6-მა კანდიდატმა მიიღო. კონკურსანტმა როსტომ ბერიძემ 13 მარტს საარჩევნო კომისიას კანდიდატურის მოხსნის განცხადებით მიმართა, ხოლო ბესიკ ბერიძემ - არჩევნების დაწყებამდე.