ახალი ამბები

ბათუმის შოთა რუსთაველის სახელწმიფო უნივერსიტეტში ორგანიზაციის „განათლების, მეცნიერებისა და „ტექნოლოგიების განვითარების თს ფონდი ხვალინდელი წარმატებისთვის“ სტუდენტთა ინოვაციური პროექტების საგრანტო კონკურსის პრეზენტაცია გაიმართა. ფონდის აღმასრულებელმა დირექტორმა ირაკლი ნოსელიძემ და ფონდის პროგრამულმა კოორდინატორმა ანა ჩიქოვანმა სტუდენტებს კონკურსის მიზნები და მასში მონაწილეობის პირობები წარუდგინა. ახალი კონკურსის საფუძველზე გამოვლინდება ის საუკეთესო სტუდენტური პროექტები, რომლებიც მიზნად ისახავს კომერციული ღირებულების მქონე ინოვაციური იდეების რეალიზაციას, გამოგონებების სრულყოფას, საცდელი ნიმუშების (პროტოტიპების) დამზადებას და ახალი ან გაუმჯობესებული ტექნოლოგიის შექმნა-დამუშავებას.

ფსიქოლოგიის მეცნიერებათა დოქტორის, ივანე ჯავახიშვილის სახელობის თბილისის სახელმწიფო უნივერსიტეტის პროფესორ თამარ გაგოშიძის საჯარო ლექციების ციკლი დაიწყო ბათუმის შოთა რუსთაველის სახელმწიფო უნივერსიტეტში. ღონისძიება აჭარის ა.რ. განათლების, კულტურისა და სპორტის სამინისტროს „უმაღლესი განათლების ხელშეწყობის“ პროექტის ფარგლებში ტარდება და მიზნად ისახავს ნეიროფსიქოლოგიის, როგორც ახალგაზრდა და განვითარებადი ფსიქოლოგიის დარგის გაცნობას ფართო საზოგადოებისათვის. მომხსენებელი სამი დღის განმავლობაში ლექციებს წაიკითხავს შემდეგ თემებზე: „ნეიროფსიქოლოგია, როგორც ინტერდისციპლინური მეცნიერება და მისი როლი ადამიანის ქცევის გაგებაში“, „მეტყველებისა და კომუნიკაციის დარღვევები ბავშვებში“ და „დემენციების ნეიროფსიქოლოგია“.

გაცვლითი პროგრამის ერასმუს+Credit Mobility–ის საინფორმაციო შეხვედრა შედგა ბათუმის შოთა რუსთველის სახელმწიფო უნივერსიტეტში. საგარეო ურთიერთობათა და სტრატეგიული განვითარების სამსახურის უფროსმა ნანა ყურშუბაძემ სხვადასხვა სპეციალობის სტუდენტებსა და პროფესორ-მასწავლებლებს ახალი გაცვლითი პროგრამის განხორციელების წესები და კონკურსის ჩატარების პირობები გააცნო. ევროპის წამყვან უნივერსიტეტებში სწავლის შესაძლებლობა ეძლევა ყველა საფეხურის სტუდენტს, აკადემიურ პერსონალსა და მკვლევარს.

ქვემო სილეზიის (პოლონეთი) დელეგაცია ეწვია ბათუმის შოთა რუსთაველის სახელმწიფო უნივერსიტეტს. ქვემო სილეზიის სავოევოდოს მარშალის ოფისის საერთაშორისო ურთიერთობათა განყოფილების დირექტორი კაროლ პშივარა, ქვემო სილეზიის სავოევოდოს მარშალის ოფისის ტურიზმის, სპორტის და დასვენების განყოფილების დირექტორი ვოიჩეხ ბილინსკი, ქვემო სილეზიის სავოევოდოს მარშალის ოფისის საერთაშორისო თანამშრომლობის კოორდინატორი ალექსანდრა მიროვსკა-პიალუხა, სილეზიის სავაჭრო პალატის აღმოსავლეთ ბაზრების დეპარტამენტის დირექტორი ირინა ტყეშელაშვილი უნივერსიტეტის რექტორის მოვალეობის შემსრულებელს მერაბ ხალვაშს, რექტორის მოადგილეებსა და ფაკულტეტების დეკანებს შეხვდნენ. ქვემო სილეზიის დელეგაციის ვიზიტი მიზნად ისახავდა სასწავლო-სამეცნიერო პროექტების განხორციელებას, ერთობლივი საბაკალავრო და სამაგისტრო საგანმანათლებლო პროგრამების შემუშავებასა და გაცვლითი პროგრამების ამოქმედებას.

საქართველოს სახელმწიფო მოდერნიზაციის ინსტიტუტის (GISM) პროექტის „უკან მომავალი’’ პრეზენტაცია გაიმართა ბათუმის შოთა რუსთაველის სახელმწიფო უნივერსიტეტში. ინსტიტუტის წარმომადგენელმა გიორგი ლემონჯავამ სტუდენტებს პროექტის არსი, მიზნები, კონცეფცია და მოსალოდნელი შედეგები წარუდგინა. პროგრამა მიზნად ისახავს დემოკრატიული პროცესების ხელშეწყობას, გამჭვირვალე და ანგარიშვალდებული მმართველობის მხარდაჭერასა და რეფორმათა პაკეტების მომზადებას სხვადასხვა მიმართულებით. პროექრტის ფარგლებში დაგეგმილია „საუნივერსიტეტო ქსელის“ ჩამოყალიბება და ონლაინ პლატფორმის შექმნა, რაც საშუალებას მისცემს სტუდენტებს უშუალოდ ჩაერთონ პროექტის განხორციელებაში მსოფლიოს ნებისმიერი ქვეყნიდან.