ახალი ამბები

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და ტერნოპილის ეროვნული ეკონომიკური უნივერსიტეტის რექტორმა, პროფესორმა ანდრეი კრისოვატოვმა თანამშრომლობის მემორანდუმს მოაწერეს ხელი. ხელშეკრულება მიზნად ისახავს სტუდენტთა, პროფესორ-მასწავლებელთა და მკვლევართა გაცვლითი პროგრამების განხორციელებას, ერთობლივი კვლევების წარმოებას, საერთაშორისო სამეცნიერო და პრაქტიკული კონფერენციების, სემინარების, სიმპოზიუმების, კონგრესებისა და ტრენინგების ჩატარებას. მხარეთა შეთანხმებით, შემუშავდება საგანმანათლებლო პროგრამები და ხელი შეეწყობა ერთობლივი ცენტრების, ლაბორატორიების, ტექნიკური პარკების შექმნას. მემორანდუმის გაფორმების შემდეგ პროფესორი ანდრეი კრისოვატოვი სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებთან ერთად პროფესორ-მასწავლებლებს შეხვდა და სამომავლო თანამშრომლობის მიმართულებებზე ისაუბრა.

რეფერატულ ნაშრომთა კონკურსისა და სტუდენტთა სამეცნიერო კონფერენციის მონაწილეთა დაჯილდოება გაიმართა შოთა რუსთაველის დარბაზში. სტუდენტთა სამეცნიერო ცენტრის ორგანიზებით გამართულ კონკურსსა და კონფერენციაში ბათუმის შოთა რუსთაველის სახელმწიფო უნივერსიტეტის სხვადასხვა სპეციალობის 239 სტუდენტი მონაწილეობდა. პროექტ „განათლების სივრცის“ ფარგლებში რეფერატულ ნაშრომთა კონკურსში საკუთარი შესაძლებლობები წარმოაჩინა ასევე ბათუმის საჯარო სკოლების 160-მა მოსწავლემ. ახალგაზრდებმა რეფერატული ნაშრომები 18 სექციის, ხოლო სამეცნიერო მოხსენებები - 22 სექციის მიმართულებით წარმოადგინეს.

"შეაჩერე ანექსია" - ამ მოწოდებით ბათუმის შოთა რუსთაველის სახელმწიფო უნივერსიტეტის სტუდენტებმა ცოცხალი ჯაჭვით მცოცავი ოკუპაცია გააპროტესტეს და დაგმეს. სტუდენტური თვითმმართველობის ორგანიზებით, ახალგაზრდები ილია ჭავჭავაძის ძეგლთან შეიკრიბნენ, ცოცხალი ჯაჭვით იაკობ გოგებაშვილის ქუჩის მიმართულებით გაემართნენ და წუთიერი დუმილით პატივი მიაგეს იუნკერების ხსოვნას. სტუდენტური აქცია ქვეყნის მასშტაბით 15:00 საათზე დაიწყო, ერთდროულად შვიდ ქალაქში: თბილისში, ბათუმში, რუსთავში, თელავში, გორში, ქუთაისსა და ზუგდიდში მიმდინარეობდა და მასში სხვადასხვა უმაღლესი საგანმანათლებლო დაწესებულების სტუდენტები მონაწილეობდნენ. ახალგაზრდების განცხადებით, აქციის მიზანია დაანახონ საერთაშორისო საზოგადოებას, როგორც პოლიტიკურ მოკავშირეებს, ისე მოწინააღმდეგეებს, რომ პოლიტიკური და იდეოლოგიური განსხვავებების მიუხედავად, საქართველოს მოქალაქეების აბსოლიტური უმრავლესობა არ ეგუება და ერთიანი ძალებით იბრძვის მცოცავი ოკუპაციის წინააღმდეგ.

ჰოსპისისა და პალიატიური მზრუნველობის საერთაშორისო დღისადმი მიძღვნილი სტუდენტური სამეცნიერო-პრაქტიკული კონფერენცია გაიმართა ბათუმის შოთა რუსთაველის სახელმწიფო უნივერსიტეტში. პალიატიური მზრუნველობის საქართველოს ეროვნული ასოციაციის თავმჯდომარემ, პროფესორმა დიმიტრი კორძაიამ და პალიატიური მზრუნველობის რეგიონულმა კოორდინატორმა აჭარაში მემედ ჯინჭარაძემ და მედიკოსებმა დარგის აქტუალურ საკითხებზე იმსჯელეს. კონფერენციაზე წარმოდგენილი იყო ისეთი მნიშვნელოვანი საკითხები, როგორიცაა: პალიატიური მზრუნველობა საქართველოში, პალიატიური მზრუნველობა საუნივერსიტეტო სამედიცინო განათლებაში, რეგიონული პალიატიური მზრუნველობის სამსახური - აჭარის ავტონომიური რესპუბლიკის გამოცდილება, დაზღვევა პალიატიურ მზრუნველობაში, პალიატიურ მზრუნველობას დაქვემდებარებულ პაციენტთა მონახულება სტუდენტთა მიერ ბინასა და სტაციონარში.

ბათუმის ხელოვნებისა და მუსიკის ცენტრში ბათუმის შოთა რუსთაველის სახელმწიფო უნივერსიტეტისა და საქართველოს საპატრიარქოს წმიდა თამარ მეფის უნივერსიტეტის ორგანიზებით მამა ადამისა (ვახტანგ ახალაძე) და ნანა ავალიშვილის ლიტერატურულ-მუსიკალური პერფომანსი „ზღვა კი იყო უშფოთველ“ შედგა. არქიმანდრიტ ადამის, საპატრიარქოს წმინდა თამარ მეფის სასწავლო უნივერსიტეტის რექტორის მიერ შექმნილი ლექსებისა და ჩანაწერების მიხედვით შექმნილ ლიტერატურულ-მუსიკალურ ღონისძიებაში სხვადასხვა თეატრის მსახიობები მონაწილეობდნენ.