ახალი ამბები

ბათუმის შოთა რუსთაველის სახელმწიფო უნივერსიტეტში გამართული მედიის კვლევებისადმი მიძღვნილი საერთაშორისო კონფერენციის ფარგლებში, ბსუ-ს რექტორი ტიტე აროშიძე, ჰუმანიტარულ მეცნიერებათა ფაკულტეტის დეკან თეონა ბერიძესთან და ჟურნალისტიკის პროგრამის ხელმძღვანელ ინგა შამილიშვილთან ერთად ერევნის სახელმწიფო უნივერსიტეტის ჟურნალისტიკის ფაკულტეტის დეკანს ნაგაშ მარტიროსიანს და სოფიას სახელმწიფო უნივერსიტეტის ჟურნალისტიკისა და მასობრივი კომუნიკაციის ფაკულტეტის დეკანს ვესელინა ვალკანოვას შეხვდა.

ბათუმის შოთა რუსთაველის სახელმწიფო უნივერსიტეტში საერთაშორისო სამეცნიერო კონფერენცია - „შავიზღვისპირეთი ცივილიზაციათა გზაჯვარედინზე - V” გაიხსნა. ორდღიანი სამეცნიერო კონფერენცია ბსუ-ს ნიკო ბერძენიშვილის ინსტიტუტისა და კონსტანცას ოვიდიუსის უნივერსიტეტის ორგანიზებით იმართება.

ბათუმის შოთა რუსთაველის სახელმწიფო უნივერსიტეტს ბრიტანეთის ელჩი საქართველოში გარეტ უორდი საელჩოს წარმომადგენლებთან ერთად ეწვია. ბრიტანეთის ელჩმა ბსუ-ს რექტორის მოადგილე თამარ სირაძესთან გამართულ შეხვედრაზე ისაუბრა ბათუმისა და გაერთიანებული სამეფოს ისტორიულ კავშირებზე, სხვადასხვა სფეროში არსებულ თანამშრომლობასა და სამომავლო პერსპექტივებზე. განსაკუთრებული ყურადღება გაამახვილა ბრიტანეთის საბჭოს დაფინანსებით ბათუმის შოთა რუსთაველის სახელმწიფო უნივერსიტეტსა და წმინდა ენდრიუსის უნივერსიტეტს შორის მიმდინარე თანამშრომლობის პროექტზე.

„ტრანსსასაზღვრო მეცნიერება უფრო სუფთა და მდგრადი შავი ზღვისათვის“ - ამ სახელწოდებით CARE SEA პროექტის დასკვნითი საერთაშორისო სამეცნიერო კონფერენცია გაიმართა. ღონისძიებაზე პროექტის ფარგლებში განხორციელებული კვლევების შედეგები, მიღებული გამოცდილება და შავი ზღვის ეკოლოგიური მდგომარეობის გაუმჯობესების მიმართულებით სამომავლო თანამშრომლობის შესაძლებლობები განიხილეს.

„ახალგაზრდები მშვიდობისთვის“- ამ სახელწოდებით სახელმწიფო მინისტრის აპარატის ორგანიზებით, მშვიდობის საერთაშორისო დღისადმი მიძღვნილი ღონისძიება გაიმართა. ღონისძიების ფარგლებში, თეა ახვლედიანმა სახელმწიფო მინისტრის აპარატის მიერ დაწესებული ყოველწლიური კონკურსის „მშვიდობის ჯილდოს ახალგაზრდებისთვის“ გამარჯვებულები დააჯილდოვა.ნომინაციაში „საუკეთესო სამშვიდობო იდეა“ გამარჯვება ბსუ-ს სტუდენტებმა - ანა დუმბაძემ და ზეინაბ აკვაზბამ მოიპოვეს, რომლებიც ბათუმის შოთა რუსთაველის სახელმწიფო უნივერსიტეტის სამშვიდობო ცენტრის „ახალგაზრდული პლატფორმა მშვიდობის მშენებლობისთვის“ საქმიანობაში არიან ჩართულნი. გამარჯვებულებს გადაეცათ სახელმწიფო მინისტრის აპარატის მიერ დაარსებული პრემია 3000 ლარის ოდენობით. ამასთან, ევროპის საბჭოს მხარდაჭერითა და უშუალო ჩართულობით, გამარჯვებული ახალგაზრდები ქალაქ სტრასბურგში მონაწილეობას მიიღებენ დემოკრატიის მსოფლიო ფორუმში. ღონისძიებას ასევე ესწრებოდა ბსუ-ს რექტორი ტიტე აროშიძე, რექტორმა სტუდენტებს ამ მნიშვნელოვან ნომინაციაში „საუკეთესო სამშვიდობო იდეა“ გამარჯვება მიულოცა და წარმატებები უსურვა.