ბათუმის შოთა რუსთაველის სახელმწიფო უნივერსიტეტში პირველკურსელთა რეგისტრაცია დაიწყო. რეგისტრაციის პარალელურად სტუდენტები საკონსულტაციო ცენტრში ღებულობენ დეტალურ ინფორმაციას უნივერსიტეტში მოქმედ სამართლებრივ რეგულაციებზე, სწავლის საფასურის გადახდის წესზე, გაცვლით პროგრამებზე, სოციალურ პროექტებზე, სტიპენდიებსა და შემოქმედებით წრეებზე. პირველკურსელთა რეგისტრაცია გრძელდება 19 სექტემბრის ჩათვლით.
ბათუმის შოთა რუსთაველის სახელმწიფო უნივერსიტეტი მათემატიკოსთა კავშირის XIV საერთაშორისო კონფერენციას მასპინძლობს. ექვსდღიან კონფერენციაში საქართველოსა და უცხოეთის უნივერსიტეტებისა და სამეცნიერო-კვლევითი დაწესებულებების 350-მდე მეცნიერი მონაწილეობს. წარმოდგენილი სამეცნიერო მოხსენებები ხელს შეუწყობს ინფორმაციის გავრცელებას, თანამშრომლობის გაძლიერებას, საქართველოში მიმდინარე მათემატიკური კვლევებისა და ქვეყნის ცნობადობის ამაღლებას. საუკეთესო ნაშრომები გამოქვეყნდება საერთაშორისო ჟურნალში „Journal of Mathematical Sciences” (Springer).
მოხარული ვართ გაცნობოთ, რომ ხარისხის განვითარების ეროვნული ცენტრის ავტორიზაციის საბჭომ ბათუმის შოთა რუსთაველის სახელმწიფო უნივერსიტეტს 6-წლიანი ავტორიზაცია მიანიჭა! ეს წარმატება ჩვენი მეცნიერების, პროფესორ-მასწავლებლების, თანამშრომლებისა და სტუდენტების შრომისა და ერთგულების შედეგია. მადლობას ვუხდით ყველას, ვინც წვლილი შეიტანა ამ მნიშვნელოვან პროცესში: ხარისხის განვითარების ეროვნულ ცენტრს, ავტორიზაციის საბჭოს, ექსპერტებს და უნივერსიტეტის ყველა გულშემატკივარს.
ბსუ მეცხრედ მასპინძლობს ბათუმის საზაფხულო უნივერსიტეტს „ბირთვული უსაფრთხოების რეჟიმი გაჭიანურებული კრიზისის პირობებში: წარსულის გაკვეთილები, მიმდინარე გამოწვევები და მომავლის ხედვა”. სამი დღის განმავლობაში ბათუმის საზაფხულო უნივერსიტეტის მონაწილეები საქართველოდან, დიდი ბრიტანეთიდან, შვედეთიდან, ჰოლანდიიდან, ტაივანიდან, ავსტრიიდან და უკრაინიდან განიხილავენ გლობალური უსაფრთხოების, საგარეო პოლიტიკის, ბირთვული გაუვრცელებლობის რეჟიმის, არსებული კრიზისის და გამოწვევების საკითხებს.
16 წელი გავიდა რუსეთ-საქართველოს ომიდან. ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა მერაბ ხალვაშმა, პროფესორ-მასწავლებლებმა და სტუდენტებმა აგვისტოს ომის მემორიალი ყვავილებით შეამკეს და საქართველოს ერთიანობისთვის დაღუპულ გმირებს პატივი მიაგეს. ასევე სტუდენტებმა, აჭარის მთავრობის თავმჯდომარესთან, თორნიკე რიჟვაძესთან ერთად, სოფელ ბარათაულში პატივი მიაგეს 2008 წლის რუსეთ-საქართველოს ომში დაღუპული გმირის, ბსუ-ს სტუდენტის, ვახტანგ გორგასლის I ხარისხის ორდენოსან ამირან მამალაძის ხსოვნას და საფლავი გვირგვინით შეამკეს.
