„დიგიტალური ჰუმანიტარიის აკადემია“ (https://adh.ge/) ფრანკფურტის გოეთეს სახელობის უნივერისტეტთან და ქართულ უნივერსიტეტებთან - თბილისის ივანე ჯავახიშვილის სახელმწიფო უნივერსიტეტი და ბათუმის შოთა რუსთაველის სახელმწიფო უნივერსიტეტი - თანამშრომლობით 29 ივლისიდან 30 აგვისტომდე ატარებს საზაფხულო სკოლას დიგიტალურ ქართველოლოგიაში თემაზე "დიგიტალური რუსთველოლოგია".
23-24 სექტემბერს, ბსუ-ში გაეროს ბავშვთა ფონდი ბათუმის შოთა რუსთაველის სახელმწიფო უნივერსიტეტთან პარტნიორობითა და აჭარის ა.რ. განათლების, კულტურისა და სპორტის სამინისტროს ეგიდით გამართავს მეორე საერთაშორისო კონფერენციას „ბავშვთა უფლებების საკითხების ჩართვა საუნივერსიტეტო საგანმანათლებლო პროგრამებსა და კურიკულუმებში“. კონფერენცია ეძღვნება ბავშვთა უფლებების საკითხების ჩართვას საუნივერსიტეტო საგანმანათლებლო პროგრამებსა და კურიკულუმებში, რათა გაჩნდეს სივრცე ბავშვთა უფლებების პრინციპების სწავლა-სწავლებისთვის, გაძლიერდნენ შესაბამისი სპეციალისტები და დაცულ იქნას ბავშვთა უფლებები ყოველდღიურად ოჯახებში, სკოლებსა და საზოგადოებაში. კონფერენცია ბავშვთა უფლებების ხელშეწყობა საქართველოს უნივერსიტეტების საშუალებით“ ფარგლებში იმართება.
11 ივნისს ევროპის იურისტ სტუდენტთა ასოციაცია საქართველო UNICEF-ის საქართველოს წარმომადგენლობასა და საქართველოს პროკურატურასთან თანამშრომლობით Google Meeting-ის საშუალებით ატარებს კონფერენციას ბავშვთა უფლებების შესახებ. გაეროს ბავშვთა ფონდის წარმომადგენელი საქართველოში, დოქტორ ღასან ხალილი, გაეროს ბავშვთა ფონდის მართლმსაჯულების პროგრამის ხელმძღვანელი თეონა კუჭავა და პროკურორი ია ჩხეიძე მოხსენებებს წარმოადგენენ ბავშვთა უფლებების დაცვის აქტუალურ საკითხებზე. ღონისძიებაზე დასწრების შესაძლებლობა აქვთ საქართველოს აკრედიტებული უმაღლესი სასწავლებლების იურიდიული ფაკულტეტის ბაკალავრიატის, მაგისტრატურისა და დოქტორანტურის ნებისმიერი კურსის სტუდენტებსა და კურსდამთავრებულებს.
ბათუმის შოთა რუსთაველის სახელმწიფო უნივერსიტეტში 5 ივნისს, 11:00 საათზე ზუსტ მეცნიერებათა და განათლების ფაკულტეტის ორგანიზებით, სკოლისა და უნივერსიტეტის თანამშრომლობის კლუბის „სკოლა-უნივერსიტეტი” ფარგლებში გაიმართება ონლაინ მერვე სამეცნიერო კონფერენცია. სესიაში სტუდენტებთან ერთად, აჭარის საჯარო და კერძო სკოლების მოსწავლეები მიიღებენ მონაწილეობას. კონფერენციის მიზანია უნივერსიტეტისა და სკოლის თანამშრომლობის ხელშეწყობა, მოსწავლეებსა და სტუდენტებში შემოქმედებითი, თანამშრომლობითი და კომუნიკაციური უნარ-ჩვევების განვითარება, კრიტიკული აზროვნების ჩამოყალიბება და ნიჭიერი ახალგაზრდების გამოვლენა.
27-28 მაისს ონლაინ-რეჟიმში ჩატარდება XI საერთაშორისო სამეცნიერო კონფერენცია „ბათუმი – წარსული და თანამედროვეობა“. კონფერენცია იმართება ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტისა და ქალაქ ბათუმის მერიის ორგანიზებით. სამეცნიერო ფორუმის მუშაობაში მონაწილეობას მიიღებენ საქართველოსა და უცხოეთის სხვადასხვა სამეცნიერო-კვლევითი თუ საგანმანათლებლო ცენტრის წარმომადგენლები, რომელთა მოხსენებები შეეხება ქალაქ ბათუმის წარსულისა და აწმყოს მნიშვნელოვან საკითხებს, სამომავლო პერსპექტივებს.
