12-17 მარტს, ბათუმის შოთა რუსთაველის სახელმწიფო უნივერსიტეტის ფიზიკა-მათემატიკისა და კომპიუტერულ მეცნიერებათა ფაკულტეტის სტუდენტები თბილისის სახელმწიფო სამედიცინო უნივერსიტეტში გამართულ სეზონურ სკოლას ესწრებოდნენ თემაზე: „რადიაციული მედიცინა XXI საუკუნეში, ტენდენციები, გადაწყვეტის გზები“. ფიზიკის სპეციალობის სტუდენტებმა ნიკა თავართქილაძემ, მაია ბოლქვაძემ, მარი შაქარიშვილმა და რეზო თუმანიძემ მნიშვნელოვანი ინფორმაცია მიიღეს რადიაციული საფრთხეებისა და პრევენციული ზომების შესახებ. სტუდენტებს ლექციები უცხოელმა პროფესორებმა და მოწვეულმა სპეცილისტებმა ჩაუტარეს, მათ შორის: მადან რეჰანი - ნობელის პრემიის ლაურეატი მშვიდობის დარგში, დარიელ ფიშერი - შეერთებული შტატების ჯანმრთელობის ფიზიკოსთა ასოციაციის პრეზიდენტი, სორენ მათსონი - სამედიცინო ფიზიკის საერთაშორისო ორგანიზაციის 2013 წლის პრემიის „Outstanding contributions over the last 50 years“ ლაურეატი. სტუდენტებმა მონაწილეობა მიიღეს დიკუსიებსა და გამოკითხვებში.
სეზონური სკოლა შოთა რუსთაველის ეროვნული სამეცნიერო ფონდის დაფინანსებით ჩატარდა და მასში საქართველოს სხვადასხვა უნივერსიტეტის სტუდენტები მონაწილეობდნენ.

2016 წლის 15-19 თებერვალს ბიბლიოთეკის „ამერიკულმა კუთხემ“ ამერიკის საელჩოს ორგანიზებით „ბათუმის მეცნიერების კვირეულს’’ უმასპინძლა. ერთკვირიანი ღონისძიება მოიცავდა პროგრამირების კურსს, სემინარს გარემოს დაცვის საკითხებზე, კინოჩვენებებს. მეცნიერების კვირეული გამოფენით დასრულდა. ბათუმის სახელმწიფო უნივერსიტეტის და აგრარული უნივერსიტეტის პროფესორებმა და სტუდენტებმა სამეცნიერო პროექტები წარმოადგინეს, გამოფენაზე სტუდენტები გაეცნენ ამერიკაში სწავლის შესაძლებლობებსაც, გაიმართა ვებჩატი სან დიეგოს უნივერსიტეტის დეკან კენ უოლშთან, რომელმაც საქართველოში საბუნებისმეტყველო საგნების სწავლების მნიშვნელობაზე ისაუბრა.

ბათუმის შოთა რუსთაველის სახელმწიფო უნივერსიტეტში, ფიზიკა-მათემატიკისა და კომპიუტერულ მეცნიერებათა ფაკულტეტის ინიციატივით, მსოფლიო რადიოს დღისადმი მიძღვნილი საჯარო ლექცია მოეწყო. ლექციაში მონაწილეობა მიიღეს ფიზიკის დეპარტამენტის პროფესორ-მასწავლებლებმა, სტუდენტებმა, აჭარის ტელე-რადიოს დეპარტამენტის თანამშრომლებმა და ბათუმის საჯარო სკოლის მოსწავლეები.

მიმდინარე წლის 31 იანვრიდან 9 თებერვლის ჩათვლით ბათუმის შოთა რუსთაველი სახელმწიფო უნივერსიტეტის ფიზიკის სპეციალობის სტუდენტებმა მალხაზ დიმიტრაძემ, ანა სლიუსარევამ, ჯაბა შაინიძემ და ჯუმბერ გიორგაძემ მონაწილეობა მიიღეს ზამთრის სკოლაში, რომელიც მიეძღვნა თემას: „მიკრო და ნანო სტრუქტურები“. ზამთრის სკოლა ორგანიზებული იყო თბილისის ივანე ჯავახიშვილის სახელმწიფო უნივერსიტეტის მიერ.

ფიზიკა-მათემატიკისა და კომპიუტერულ მეცნიერებათა ფაკულტეტზე კურსდამთავრებულებთან შეხვედრა მოეწყო. რეგიონის სხვადასხვა სკოლაში დასაქმებულ კურსამთავრებულებთან შეხვედრის მიზანი ფაკულტეტისა და სკოლების თანამშრომლობის გაღრმავება, აბიტურიენტთა მოზიდვა და ამ პროცესებში ყოფილ სტუდენტთა როლის გააქტიურება იყო. კურსდამთავრებულებს ფიზიკა-მათემატიკისა და კომპიუტერულ მეცნიერებათა ფაკულტეტის დეკანმა, ასოცირებული პროფესორმა გულადი ფარტენაძემ და ფაკულტეტის ხარისხის უზრუნველყოფის სამსახურის უფროსმა, პროფესორმა ნუგზარ ღომიძემ სამომავლო გეგმები გააცნეს. შეხვედრაზევე განიხილეს ფაკულტეტის პრიორიტეტულ მიმართულებებზე (ფიზიკა, მათემატიკა) აბიტურიენტთა მოზიდვისა და შემდგომი ღონისძიებათა განხორციელების შესახებ. კურსდამთავრებულებს საინფორმაციო ბროშურები და ბუკლეტები გადაეცათ.