ახალი ამბები
25.04.2025

განათლების საერთაშორისო ცენტრის აღმასრულებელი დირექტორი ნუნუ მიცკევიჩი, ბსუ-ს რექტორთან ტიტე აროშიძესთან, ცენტრის კურსდამთავრებულთან, აჭარის ა.რ. უმაღლესი საბჭოს წევრთან, გოგი ფუტკარაძესთან ერთად, ბსუ-ს სტუდენტებს შეხვდა. ცენტრის წარმომადგენლებმა ახალგაზრდებს პროგრამების შესახებ მიაწოდეს ინფორმაცია, საუბარი შეეხო საგრანტო პროგრამებს, რომელთა მეშვეობითაც უნივერსიტეტის სტუდენტებს, ასევე, აკადემიურ, სამეცნიერო-კვლევით და ადმინისტრაციულ პერსონალს შესაძლებლობა ეძლევათ, სახელმწიფოს მხარდაჭერით, სწავლა განაგრძონ ან კვალიფიკაცია აიმაღლონ საზღვარგარეთის წამყვან უნივერსიტეტებსა და კვლევით ცენტრებში.

განათლების საერთაშორისო ცენტრის მხარდაჭერით, ბათუმის შოთა რუსთაველის სახელმწიფო უნივერსიტეტში პედაგოგების, სტუდენტებისა და კლინიცისტი ექიმებისთვის სკოლა-ტრენინგი ჩატარდა თემაზე: „იმუნიტეტი, ანტიმიკრობული რეზისტენტობა და ფაგოთერაპია“. ცენტრის საგრანტო პროექტის მონაწილეა საბუნებისმეტყველო მეცნიერებათა და ჯანდაცვის ფაკულტეტი, ტრენინგზე მოწვეულ სპეციალისტებთან ერთად, მოხსენება წარადგინეს ბსუ-ს ასოცირებულმა პროფესორებმა: ლეილა ახვლედიანმა და თეა ქოიავამ.

ისტორიულ ტაო-კლარჯეთში ბსუ-ს ტურიზმის ფაკულტეტის ტრადიციული სასწავლო-პრაქტიკული ტური მოეწყო. სამდღიანი საგანმანათლებლო ტურის ფარგლებში, 50-მდე სტუდენტი ეწვია ხახულის, ოშკის, იშხანის, ოთხთას, პარხალის, დოლისყანის და ტბეთის ტაძრებსა და სამონასტრო კომპლექსებს. საველე პრაქტიკა განხორციელდა კულტურული ტურიზმის, საექსკურსიო საქმის და ტუროპერირების სასწავლო კურსების ფარგლებში და მიზნად ისახავდა სტუდენტებისთვის თეორიული ცოდნის გაღრმავებას და პროფესიული უნარ-ჩვევების განვითარებას.