ახალი ამბები

ბსუ-ს იურიდიული და სოციალურ მეცნიერებათა ფაკულტეტის სამართალმცოდნეობის პირველი კურსის სტუდენტთა საინიციატივო ჯგუფის „საგზაო მარშალის” პროექტმა „გახდი საგზაო მარშალი“ IFES-ის კონკურსში გაიმარჯვა. კონკურსი სამოქალაქო განათლების ლექტორთა ასოციაციის (CELA) მხარდაჭერით გაიმართა და მასში საქართველოს სხვადასხვა უნივერსიტეტის სტუდენტურმა ჯგუფებმა წარადგინეს 2021-2022 აკადემიურ წელს განხორციელებული სამოქალაქო ჩართულობის პროექტები. კომპეტენტურმა ჟიურიმ 14 პროექტიდან 6 საუკეთესო პროექტი გამოავლინა. IFES-ის კონკურსში ბსუ-ს სტუდენტთა 8 საინიციატივო ჯგუფი მონაწილეობდა. პროექტს „გახდი საგზაო მარშალი“ ახორციელებენ სტუდენტები: მარიამ სურმანიძე, თემურ ქოქოლაძე, რევაზ ზაქარაძე, არჩილ კეკელიძე და ქრისტინა მეტრეველი.

ბათუმის შოთა რუსთაველის სახელმწიფო უნივერსიტეტში საქართველოს სახელმწიფოებრივი დამოუკიდებლობის აღდგენის დღისადმი მიძღვნილი კონფერენცია და ფოტოგამოფენა გაიმართა. კონფერენციის მონაწილეებს მიესალმა და საქართველოს დამოუკიდებლობის აღდგენის დღე მიულოცა ბსუ-ს რექტორმა, პროფესორმა მერაბ ხალვაშმა. სამეცნიერო სესიაზე ბსუ-სა და სხვადასხვა უმაღლესი საგანმანათლებლო დაწესებულების პროფესორ-მასწავლებლებმა მოხსენებები წარმოადგინეს საქართველოს სახელმწიფოებრივი დამოუკიდებლობის აღდგენის აქტუალურ საკითხებზე და 104 წლის წინ განვითარებულ მოვლენებზე იმსჯელეს.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა და გერმანიის მასპინძლობის საერთაშორისო ინსტიტუტის ხელმძღვანელმა გერალდ ვიტცელმა თანამშრომლობის მემორანდუმს მოაწერეს ხელი. ხელშეკრულების ფარგლებში, ყოველწლიურად, ტურიზმის ფაკულტეტის 100-მდე სტუდენტი სამთვიან ანაზღაურებად პრაქტიკას გერმანიის მაღალი კლასის სასტუმროებში გაივლის და გაეცნობა სასტუმროს ძირითადი სტრუქტურული ერთეულის ფუნქციონირებას.

ბათუმის შოთა რუსთაველის სახელმწიფო უნივერსიტეტში, ჟან მონეს კათედრის ორგანიზებით საჯარო ლექცია და დისკუსია გაიმართა თემაზე „საქართველო და ევროპა: ისტორიული კავშირები და თანამედროვეობა“. იურისტმა, საქართველოს ახალგაზრდა იურისტთა ასოციაციის თავმჯდომარემ (2018-2020), ძველი ევროპული რუკების და გრავიურების კოლექციონერმა სულხან სალაძემ მოხსენება წაიკითხა თემაზე - „საქართველო ძველ ევროპულ რუკებზე, წარსულის პარალელები და თანამედროვეობა“, ხოლო ბსუ-ს იურიდიული და სოციალურ მეცნიერებათა ფაკულტეტის პროფესორმა, ჟან მონეს კათედრის ხელმძღვანელმა მალხაზ ნაკაშიძემ - „საქართველოს 1921 წლის 21 თებერვლის ევროპული კონსტიტუციის დაბადება, ბათუმი და ევროპული ღირებულებები“.

ბათუმის შოთა რუსთაველის სახელმწიფო უნივერსიტეტმა ზუგდიდში აბიტურიენტებისთვის გამართულ ღონისძიებაში მიიღო მონაწილეობა. ბსუ-ს სტუდენტებმა და სტუდენტთა კარიერული განვითარების, კულტურისა და სპორტის დეპარტამენტის წარმომადგენლებმა სამეგრელოს რეგიონის ახალგაზრდებს ბსუ-ს საბაკალავრო პროგრამები, სერვისები, გაცვლითი პროგრამები და სტუდენტური ცხოვრება გააცნეს. ღონისძიება ზუგდიდის მუნიციპალიტეტის მერიისა და ახალგაზრდული სათათბიროს ინიციატივით გაიმართა და მასში აბაშის, ზუგდიდის, მარტვილის, მესტიის, სენაკის, ფოთის და ჩხოროწყუს სკოლის მოსწავლეები მონაწილეობდნენ.