ახალი ამბები

ბათუმის შოთა რუსთაველის სახელმწიფო უნივერსიტეტში „Erasmus+“-ის პროექტის „უნივერსიტეტების როლი რეგიონის განვითარებაში“ („Role of Universities in the Regional Development (RURD)“) ფარგლებში საერთაშორისო სამუშაო შეხვედრა ტარდება. შეხვედრაზე 10 რეგიონული უნივერსიტეტის წარმომადგენელი რექტორთა კონფერენციის დაარსების ხელშეკრულების საბოლოო ვარიანტს განიხილავს. პროექტის ფარგლებში იგეგმება რეგიონული პარტნიორობის სქემის რექტორთა კონფერენციის აკადემიური სტრუქტურის ჩამოყალიბება, რომლის პრეროგატივა იქნება საუნივერსიტეტო მისიით გათვალისწინებული დასახული მიღწევის გზებზე მსჯელობა, სტრატეგიული გეგმის ძლიერი და სუსტი მხარეების გაანალიზება და გამოცდილების გაზიარება.

საქართველოს განათლებისა და მეცნიერების მინისტრის მოადგილე თამარ ქიტიაშვილი ბათუმის შოთა რუსთაველის სახელმწიფო უნივერსიტეტს ეწვია და ბსუ-ს ახალ სასწავლო კორპუსში განთავსებული პროფესიული პროგრამების მართვის და უწყვეტი განათლების ცენტრი დაათვალიერა. მინისტრის მოადგილე სასწავლო პროცესის მიმდინარეობას ადგილზე გაეცნო და თითოეული პროგრამისთვის შექმნილი, ადაპტირებული აუდიტორიები, ლაბორატორიები, კომპიუტერული კლასები და სამკითხველო დარბაზები დაათვალიერა.

ბათუმის შოთა რუსთაველის სახელმწიფო უნივერსიტეტში სტუდენტთა საუნივერსიტეტო სამეცნიერო კონფერენცია - 2021 გაიხსნა. სხვადასხვა ფაკულტეტის 180-ზე მეტი სტუდენტი სამეცნიერო მოხსენებებს ცხრამეტი სექციის მიმართულებით წარმოადგენს. სამეცნიერო სესიის მიზანია, ხელი შეუწყოს ახალგაზრდების სამეცნიერო საქმიანობაში ჩართვას, მეცნიერული უნარ-ჩვევების ჩამოყალიბებასა და განვითარებას. ახალგაზრდა მკვლევართა ნაშრომებს უნივერსიტეტის პროფესორ-მასწავლებლები შეაფასებენ და სექციის საპრიზო ადგილზე გასული მოხსენებების ავტორებს ფულად ჯილდოს გადასცემენ. კონფერენციის ფარგლებში გამოიცემა კრებული, რომელშიც თითოეული სექციის სამი საუკეთესო სამეცნიერო მოხსენება დაიბეჭდება.

ბათუმის შოთა რუსთაველის სახელმწიფო უნივერსიტეტში „Horizon 2020”-ის პროექტის „საზღვაო კვლევების და ინოვაციების კოორდინირება შავ ზღვაზე - Black Sea Connect” წარდგენა გაიმართა. ბსუ-ს პროფესორ-მასწავლებლებსა და მკვლევრებს პროექტის თსუ-ს სამუშაო ჯგუფის წარმომადგენელმა სალომე კობაიძემ პროგრამის მიზნები და ამოცანები გააცნო. პროექტი ეფუძნება შავი ზღვის აუზში კვლევისა და ინოვაციების განხორციელების მიზნით შემუშავებულ „შავი ზღვის სტრატეგიული კვლევებისა და ინოვაციების დღის წესრიგს“, რომელიც ევროკავშირის მიერ არის ინიცირებული.

ბსუ-ს რექტორმა მერაბ ხალვაშმა მონაწილეობა მიიღო ქუთაისის საერთაშორისო უნივერსიტეტში გამართულ საქართველოს პარლამენტის განათლებისა და მეცნიერების კომიტეტთან არსებულ უმაღლესი განათლებისა და მეცნიერების სამეცნიერო-საკონსულტაციო საბჭოს პირველ სამუშაო შეხვედრაში. შეხვედრის მონაწილეებს მისასალმებელი სიტყვით მიმართა საქართველოს პარლამენტის თავმჯდომარემ კახაბერ კუჭავამ. საბჭოს წევრებმა, განათლებისა და მეცნიერების კომიტეტის წევრებთან და საქართველოს პარლამენტის თავმჯდომარესთან ერთად, უმაღლესი განათლების მიმართულებით სისტემაში არსებული საჭიროებები და გამოწვევები განიხილეს.