ახალი ამბები

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტისა და სახელმწიფო ენის დეპარტამენტის ორგანიზებით Zoom-ის ონლაინ პლატფორმაზე ქართული ენის დღისადმი მიძღვნილი ვიდეოკონფერენცია ჩატარდა. კონფერენციის მუშაობაში მონაწილეობდნენ ბათუმის შოთა რუსთაველის სახელმწიფო უნივერსიტეტის, ივანე ჯავახიშვილის სახელობის თბილისის სახელმწიფო უნივერსიტეტის, აკაკი წერეთლის სახელმწიფო უნივერსიტეტისა და თავისუფალი უნივერსიტეტის პროფესორები.

ბათუმის შოთა რუსთაველის სახელმწიფო უნივერსიტეტი წითელ ჯვართან ერთად COVID-19 ვირუსის წინააღმდეგ ბრძოლის კამპანიაში ჩაერთო. უნივერსიტეტისგან წითელი ჯვრის ორგანიზაციას 75 ოჯახისათვის 12 დასახელების პროდუქტისგან შემდგარი სასურსათო კალათა და ჰიგიენური საშუალებები, ხოლო მოხალისეებს საველე სამუშაოებისთვის 50 საწვიმარი ლაბადა და ჩანთა გადაეცა. აღნიშნული დახმარება უნივერსიტეტის თანამშრომლების მიერ ინიცირებული სოციალური პროექტის ფარგლებში განხორციელდა.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის ორგანიზებით Zoom-ის ონლაინპლატფორმაზე, ვებპანელი „კორონავირუსის პანდემიით გამოწვეული რეცესია, მისი შემაკავებელი ბარიერები და პოსტკორონავირუსული კრიზისის დაძლევა საქართველოში“ გაიმართა. ვებპანელში 100-მდე ეკონომისტმა მიიღო მონაწილეობა და იგი საქართველოს დამოუკიდებლობის აღდგენის 29-ე წლისთავს მიეძღვნა.

ბათუმის შოთა რუსთაველის სახელმწიფო უნივერსიტეტის ფსიქოლოგიის კლინიკა კორონავირუსის ინფექციით (COVID-19) შექმნილი მდგომარეობის გათვალისწინებით, მუშაობას დისტანციურ რეჟიმში განაგრძობს. კლინიკა 3 აპრილიდან უფასო პირველად დახმარებას გაუწევს მოქალაქეებს კორონავირუსის პანდემიით გამოწვეული ფსიქოლოგიური სირთულეების დაძლევაში. ფსიქოლოგიის კლინიკის მომსახურებით პირველ რიგში ისარგებლებენ კარანტინში მყოფი პირები და მათი ოჯახის წევრები.

ბათუმის შოთა რუსთაველის სახელმწიფო უნივერსიტეტის ჯანდაცვის მიმართულების სტუდენტების ინიციატივით მოხალისეთა ჯგუფი შეიქმნა. სტუდენტები დისტანციურად დახმარებას გაუწევენ სამედიცინო პერსონალს, კორონავირუსის პრევენციის მიზნით გასატარებელ ღონისძიებებში.