ბსუ-ს პროფესიული პროგრამების მართვისა და უწყვეტი განათლების ცენტრის წარმომადგენლებმა მონაწილეობა მიიღეს სამუშაო შეხვედრაში, რომელსაც დასავლეთ საქართველოში არსებული საჯარო და კერძო საგანმანათლებლო დაწესებულებების წარმომადგენლები დაესწრნენ. შეხვედრას უმაღლესმა საზღვაო-საინჟინრო სასწავლებელმა "ანრიმ" უმასპინძლა.
აჭარის ა.რ. სოფლის მეურნეობის მინისტრი ტიტე აროშიძე ბსუ-ს ტექნოლოგიური ფაკულტეტის აგრარული მიმართულების და საბუნებისმეტყველო მეცნიერებათა და ჯანდაცვის ფაკულტეტების სტუდენტებს შეხვდა და პროგრამის „აგროსექტორის მდგრადი განვითარების“ ქვეპროგრამა „საგანმანათლებლო და სამეცნიერო პრაქტიკის დანერგვა“ წარუდგინა. ღონისძიების ფარგლებში, ასევე გაიმართა სამინისტროს აგროსერვის ცენტრსა და გარემოს დაცვისა და ბუნებრივი რესურსების სამმართველოში ანაზღაურებადი, ექვსთვიანი სტაჟირების პროგრამის მონაწილე ექვსი სტუდენტის შემაჯამებელი პრეზენტაცია. სოფლის მეურნეობის მინისტრმა ტიტე აროშიძემ ახალგაზრდებს მადლობა გადაუხადა სტაჟირების პროგრამაში წარმატებული მონაწილეობისათვის და ბათუმის შოთა რუსთაველის სახელმწიფო უნივერსიტეტის რექტორთან მერაბ ხალვაშთან ერთად სერტიფიკატები გადასცა.
ბათუმის შოთა რუსთაველის სახელმწიფო უნივერსიტეტში ჭადრაკის ტურნირი „ბსუ-ს თასი - 2020“ გაიმართა. ტურნირი ორ დღეს გრძელდებოდა და მასში სხვადასხვა ფაკულტეტის 32 სტუდენტი მონაწილეობდა. პირველობის საპრიზო ადგილები ბიზნესის ადმინისტრირებისა და ეკონომიკის ფაკულტეტის სტუდენტებმა მოიპოვეს. პირველი ადგილი თედო ბოლქვაძეს ერგო, მეორე ადგილი - მამუკა ჩოჩაკიძეს და მესამე ადგილი - თენგო დიდმანიძეს. ტურნირი ბსუ-ს საბუნებისმეტყველო მეცნიერებათა და ჯანდაცვის ფაკულტეტის სტუდენტის, პირველი თანრიგოსანი მოჭადრაკის ლიკა ამყოლაძის ინიციატივით, აჭარის ჭადრაკის ფედერაციისა და ბსუ-ს სტუდენტთა კარიერული განვითარების, კულტურისა და სპორტის დეპარტამენტის მხარდაჭერით ჩატარდა.
ბათუმის შოთა რუსთაველის სახელმწიფო უნივერსიტეტში გამოფენა „თანამედროვე სახელმწიფო სიმბოლოები“ გაიხსნა. გამოფენაზე წარმოდგენილია დამოუკიდებლობის აღდგენის შემდეგ შექმნილი და დამტკიცებული საქართველოს სახელმწიფო სიმბოლოები, ავტონომიური რესპუბლიკების, თვითმმართველი ორგანოების სიმბოლოები (გერბი, დროშა), სახელმწიფო და უწყებრივი ჯილდოები, უნიფორმები, ფულადი ნიშნები და სხვა ინსიგნიები. ღონისძიების ფარგლებში საქართველოს პარლამენტთან არსებული ჰერალდიკის სახელმწიფო საბჭოს თავმჯდომარის მოადგილემ, საქართველოს სახელმწიფო გერბის ავტორმა მამუკა გონგაძემ და ჰერალდიკის სახელმწიფო საბჭოს დიზაინისა და ანალიტიკის სამსახურის უფროსმა დავით ჩხეიძემ ლექცია წაიკითხე თემაზე: „ქართული ჰერალდიკა“.
ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა აკადემიური საბჭოს წევრებს, ფაკულტეტის დეკანებსა და ადმინისტრაციის წარმომადგენლებს 2019 წელს გაწეული მუშაობის ანგარიში წარუდგინა. საანგარიშო პერიოდში საქმიანობა ძირითადად წარიმართა ბსუ-ს სტრატეგიული განვითარების და რექტორის სამოქმედო გეგმების შესაბამისად, შემდეგი მიმართულებებით: სასწავლო პროცესიის სრულყოფა, სწავლა-სწავლების ხარისხის ამაღლება, სამეცნიერო-კვლევითი მუშაობის ხელშეწყობა, ინტერნაციონალიზაცია, სტუდენტთა მომსახურების გაუმჯობესება, საგანმანათლებლო პროგრამების აკრედიტაცია და ავტორიზაცია, მატერიალურ-ტექნიკური ბაზის გაუმჯობესება, ინფრასტრუქტურული და სოციალური პროექტები. რექტორმა ასევე, ყურადღება გაამახვილა მნიშვნელოვან საუნივერსიტეტო აქტებსა და ღონისძიებებზე. დეტალურად განიხილა ყველა ის მიღწევა და წარმატებული პროექტი, რომელიც უნივერსიტეტმა 2019 წელს განახორციელა.
