ახალი ამბები

ევროკომისიის მიერ დაფინანსებული ერთობლივი სამაგისტრო პროგრამების (Erasmus Mundus JMD) წარდგენა გაიმართა ბათუმის შოთა რუსთაველის სახელმწიფო უნივერსიტეტში. საქართველოს ერაზმუს+-ის ოფისის წარმომადგენლებმა თათა ლორთქიფანიძემ და ნინო ურუშაძემ სხვადასხვა ფაკულტეტის სტუდენტებს ერთობლივ სამაგისტრო პროგრამებზე სწავლებისა და კონკურსში მონაწილეობის პირობები გააცნეს. ევროკაშირი ერაზმუს+-ის პროგრამის ფარგლებში მიღებას აცხადებს 123 ერთობლივ სამაგისტრო საგანმანათლებლო პროგრამაზე, რომლის განხორციელებაშიც ჩართულია ევროპის სხვადასხვა ქვეყნის უნივერსიტეტი.

ცნობილი ბელგიელი მწერლის ჟორჟ სიმენონის ვაჟი ჯონ სიმენონი ბათუმის შოთა რუსთაველის სახელმწიფო უნივერსიტეტს ეწვია. ჯონ სიმენონმა სტუდენტებთან და პროფესორ-მასწავლებლებთან გამართულ შეხვედრაზე მამის ბათუმში მოგზაურობის ისტორია გაიხსენა და მხატვრულ ნაწარმოებებზე „ხალხი მოპირდაპირე მხარეს“ ისაუბრა, სადაც მოქმედება ზღვისპირა ქალაქში ხდება. ჟორჟ სიმენონი ბათუმს 1933 წელს შავი ზღვის გარშემო საკრუიზო მოგზაურობის დროს ეწვია. ბელგიელი მწერალი 200-მდე რომანისა და ნოველის ავტორი გახლავთ, რომლის შემოქმედებაც 47 ენაზეა თარგმნილი. შეხვედრის დასასრულს ჯონ სიმენონმა სამომავლო თანამშრომლობის შესაძლებლობებზე ისაუბრა და სტუდენტების შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტში მაინცის უნივერსიტეტის პროფესორ მარკუს ბონერის ღია ლექციები და ვორკშოფი ტარდება თემაზე: „ხარისხი და მეთოდოლოგიური მიდგომები პროფესიულ განათლებაში“. პროფესორი მარკუს ბონერი ორი დღის განმავლობაში ბსუ-ს პროფესორ-მასწავლებლებსა და პროფესიული განათლების დარგის სპეციალისტებს ისეთ აქტუალურ საკითხებს გააცნობს, როგორიცაა: პროფესიული საგანმანათლებლო სფეროს ხარისხის მართვა, სასწავლო პროცესის მართვა, სწავლება-სწავლის მეთოდოლოგია. ღონისძიება ბსუ-ს პროფესიული პროგრამების მართვის და უწყვეტი განათლების ცენტრისა და გერმანიის თანამშრომლობის საზოგადოების GIZ-ის ორგანიზებით იმართება.

4-6 ოქტომბერს, ოდესაში, „ჰორიზონტ 2020-ის“ საგრანტო პროექტის „ცოდნის და აკადემიური კულტურის მიმოცვლა ჰუმანიტარულ მეცნიერებებში: ევროპა და შავი ზღვის რეგიონი, XVIII ს. მეორე ნახევარი - XXI საუკუნე“ ეგიდით გამართულ საერთაშორისო კონფერენციაში მონაწილეობა მიიღეს ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებმა: თამარ სირაძემ, მარინე აროშიძემ, მანუჩარ ლორიამ, დალი დობორჯგინიძემ და დოქტორანტმა ანასტასია მახარაძემ. კონფერენციის ფარგლებში გაიმართა საგრანტო პროექტის სამუშაო შეხვედრა და დაიგეგმა მეორე საზაფხულო სკოლის „თარგმანის როლი მეცნიერების განვითარებაში - 2020“ ბათუმის შოთა რუსთაველის სახელმწიფო უნივერსიტეტში ჩატარება.

ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის დეკანმა, პროფესორმა გიზო ფარცხალაძემ მონაწილეობა მიიღო 1-5 ოქტომბერს, ყაზახეთში, ქალაქ ნურსულთანში ERASMUS+-ის საგრანტო პროექტის „InnoCENS Project“-ის ფარგლებში გამართულ კონსორციუმის წევრი უნივერსიტეტების წარმომადგენელთა და საერთაშორისო მრჩეველთა საბჭოს წევრთა შეხვედრაში. პროგრამის 30-მა ქართველმა, შვედმა, ფინელმა, ესპანელმა, ბელორუსმა, სომეხმა, ყაზახმა მონაწილემ შეაჯამა პროექტის სამწლიანი მუშაობის შედეგები.